Култура
Со хуманост до светлина – прославен роденденот на Тоше
Дваесет и деветиот роденден на ѕвездата Тоше Проески синоќа беше прославен, каде што познати пејачи ги пееа песните кои Тоше ги има компонирано, а ќе се најдат на новиот албум „Још увијек сањам да смо заједно“
Собраните средства од продадените околу 9.000 влезници, како и од СМС пораките, ќе бидат искористени за електрификација на манастирот Свето Преображение, кој се наоѓа над родниот град на Тоше, Крушево. Од неговите најголеми пријатели пееја: Аки Рахимовски, Калиопи, Тони Цетински, Нина Бадриќ, Борис Новковиќ, Бојан Маровиќ, Јелена Томашевиќ и Елена Ристеска. Како специјален гостин со своја екипа, по цели дваесет години настапи и рокерот Оливер Мандиќ кој промовираше песна која му ја посвети на Тоше. Песната е во соработка со Гаро Тавитјан и неговите синови, а придружните вокали ги пее Беби Дол, а текстот на Марина Туцаковиќ. Спектакуларниот концерт го водеа македонскиот водител Игор Џамбазов и колегите Милан Калиниќ од Србија, Далибор Петко од Хрватска и Дражен Бауковиќ од Црна Гора. ТВ Сител во живо го пренесуваше концертот, а сигналот го презедоа регионалните ТВ-станици, што значи дека 25 милиони луѓе имаа можност да го следат овој важен настан. Сите кои не обезбедија билет, концертот можеа да го прослеат од плоштадот Македонија во Скопје, каде беше поставен голем лед-екран. Специјално, во чест на роденденот на Тоше на концертот беше промовиран спотот за носечката тема од актуелново цеде, реализирано со пријателите „Још увијек сањам да смо заједно“, која е напишана од Мирослав Рус. На концертот беа прикажани уште два спота од англиското CD на Тоше „The Hardest Thing“, објавено лани за неговиот роденден. Станува збор за песната „Guilty“, спонзориран од ЕВН Македонија, како и „For ever in the day“, во продукција на Аворд. Во чест на Тоше настап имаа и учениците од основното училиште Никола Карев од Крушево, предводени од внукот на Тоше, Кристијан. Тие ја отсвиреа инструменталната верзија на песната „Цреша“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Театар Куманово настапи на фестивалот „MOST“ во Германија
Претставата на Кумановскиот театар „Прво лице еднина“ вчера вечер настапи на Интернационалниот камерен театарски фестивал во Германија, „MOST“ кој од први до шести октомври се одржува во Хановер.
На огромно задоволство на германската публика актерката Владанка Крстевски потполно ги освои нивните срца со емоцијата која ја прикажа преку монодрамата – Прво лице еднина, во која на маестрален начин прикажа дванаесет женски ликови со своите проблеми, лични ставови и карактери.
Режијата на претставата е на Драгана Гунин.
Актерката доби признание за исклучително моќно и емотивно прикажување на карактерите во претставата.
-Околу нас има многу жени кои секојдневно се борат и работат по 12 часа дневно. Тие жени жртвуваат се за своите семејства, за своите деца, за да обезбедат подобар живот, а никој не зборува за нив. Ова е претстава во која зборуваме токму за тие жени. Ние денеска сме ќерки, а утре ќе бидеме мајки и сакаме да имаме поддршка, бидејќи не знаеме кај ќе не однесе животот. Инспирацијата за мојот текст е од книгата „Добра ноќ за бунтовни девојчиња“, во која се зборува за жени кои направиле многу за сите нас, но останале на маргините на општеството, – раскажува младата актерка Владанка Крстевски, пренесува Кумановски театар.
Култура
Премиера на комедијата „Жени во црвено“ во Македонија
Премиерата на комедијата „Жени во црвено“ во Македонија ќе се одржи на 9 октомври во 19 часот на сцената на Националната опера и балет во Скопје. Претставата, која ја носи JEС Продукција од Скопје, ги обединува на сцената неповторливите актерки Олга Одановиќ, Дубравка Мијатовиќ, Анастасија Мандиќ и Сена Ѓоровиќ, под режија на Бојана Лазовиќ.
Претставата раскажува за четири жени кои се наоѓаат во комична, но истовремено и сериозна ситуација. Поранешната стјуардеса Тамара и нејзината сестра Нора, која е невработена, се соочуваат со финансиски тешкотии и неможност да го платат својот станбен кредит. Динка, службеничка од банката, доаѓа со намера да го конфискува имотот, но се соочува со неочекуван отпор од сестрите. За да го задржат својот дом, тие преземаат драстични чекори, додека надвор од нивната зграда полицијата и специјалните единици го заоструваат конфликтот. Во меѓувреме, на местото на настанот пристигнува полицајката Анѓа, со свој личен проблем.
Комедијата „Жени во црвено“ на комичен начин ги обработува темите на долгови, финансиски кризи и животните предизвици, истовремено потсетувајќи на важноста од солидарноста, пријателството и заедничкото справување со проблемите.
Текстот е на Давор Шпишиќ, режијата на Бојана Лазовиќ, сценографија и костимографија на Јелена Стокуќа, а музиката на Ирена Поповиќ Драговиќ.
Култура
Изложба „Мотиви од полошкото поднебје“ на Илирјан Беќири и Агрон Абдули
Во галеријата на Културно-информативниот центар во Софија, на 3 октомври (четврток) 2024 ќе биде отворена изложбата „Мотиви од полошко поднебје“ на ликовните уметници Илирјан Беќири и Агрон Абдули.
Двајцата уметници од Тетово ќе изложат околу дваесетина дела од нивниот најнов сликарски опус. На изложбата ќе можат да се видат сликите на Илирјан Беќири, изработени во техниката маслени бои на платно и сликите на Агрон Абдули, изработени во техниката акрилни бои на платно.
На отворањето на изложбата во КИЦ во Софија ќе присуствуваат двајцата ликовни уметници – педагози, кои ќе ја запознаат публиката со нивната уметност, творештво и дејност.
Илирјан Беќири е роден во 1968 година во Тетово. Дипломирал 1998 година на Универзитетот во Тетово, отсек сликарство, во класата на проф. Тахир Емра, каде завршил и постдипломски студии. Живее и работи во Тетово како професор на Факултетот за ликовни уметности на Универзитетот во Тетово.
Самостојни изложби: 2019 – Prima Center Berlin – Berlin , 2017 – Културно информативен центар на РСМ во Софија, 2009 – MC Galery, New York, 2014 – Културно информативен центар – Скопје, 2008 – Национална галерија на С.Р. Македонија – Чифте амам, Скопје, 2008 – Ателје “Cite Internationale des arts”, Париз, 2004 – Галерија на Министерство за култура, Приштина, 2003 – Дом на култура, Тетово, 1998 – “Europe Galery”, Гостивар
Излагал на многу групни изложби во земјава (Тетово; Скопје, Куманово, Гостивар др.) и странство (Тирана, Приштина, Париз, Берат, Призрен, Истанбул).
Од 2007 год. е член на и активен учесник на изложбите на ДЛУМ .Во 2008 година имал студиски престој во “Cite Internationale des arts” Во Париз. Од 2019 година е претседател на ЗЛУТ – Тетово.
Агрон Абдули е роден 1971 година во Џепчиште, Тетово, РСМ. Основното образование го заврши во Џепчиште, средното во 1993 год. во гимназијата во Тетово. Дипломирал во 1999 година на Факултетот за Ликовна Уметност, сликарство, на Универзитетот во Тетово, во класата на познатиот педагог проф. Тахир Емра. Постдипломските студии, сликарство, ги заврши во 2002 година кај истиот професор во Факултетот за Уметност во Приштина.
Работи како професор на Факултетот на Уметности, Ликовна Уметност, на Универзитетот во Тетово
Самостојни изложби: 2023-Културен Информативен Центар, MC Gallery, Њујорк, 2022-Културен Информативен Центар, Скопје, 2021-Центар за Култура, Гостивар, 2016-Галерија на Министерство за Култура на Р. Косово ,,Ќафа” Приштина, 2015-Национална галерија на Република Македонија ,,Чифте амам”, Скопје, 2015-Градска галерија, Бихач, 2015-Галерија ,,Роман Петрович” Сарајево, 2011-Уметничка галерија, Тетово, 2008-Културен Информативен Центар, Скопје, 2008-Сите Интернатионале дес Артс, Париз, 2006-Уметничка галерија, Гилане, 2004-Музичко училиште, Тетово.
Учествувал во голем број на колективни изложби и ликовни колонии во Република Северна Македонија и во странство. Активен член е на Здружението на Ликовните Уметници на град Тетово и Друштво на Ликовни Уметници на Македонија.