Култура
Нова верзија на „Аватар“ ова лето
Најгледаниот филм на сите времиња, „Аватар“ на Џемс Камерон ќе доживее нова верзија веќе ова лето, а истата ќе ги содржи сцените што не биле вклучени во оригиналната варијанта од филмот
Кога нешто носи пари, тогаш тоа треба да се искористи до последен денар. Барем така мислат американските продуценти. Имено, иако „Аватар“ веќе ги собори сите рекорди на гледаност и стана најгледани филм на сите времиња (за заработката и да не зборуваме), продуцентите во договор со Камерон одлучија ова лето во киносалите да пуштат нова верзија на хитот со дополнителни сцени чие вкупно времетраење изнесува 40 минути. И не очекуваат ништо помалку од неверојатна заработка. Тридимензионалните филмови станаа најнов тренд во Холивуд. Само еден месец по промоцијата на научнофантастичниот хит на Камерон, кој ги преполни киносалите на благајните почна да доминира „Алиса во земјата на чудата“, кој веќе прерасна во најпрофитабилниот заеднички проект на режисерот Тим Бартон и на актерот Џони Деп. Се разбира и овој филм преполн со специјални ефекти, кој уште од почетокот беше осуден да стане хит е изработен во најновата тридимензионална техника. Неверојатниот успех на „Аватар“ и „Алиса“, јасно покажува дека тие го обележаа патот за најавените 3Д филмови кои треба оваа година да ги доживеат своите премиери. Тридимензионалнните филмови не се новитет во светот на седмата уметност (некои неодамнешни 3Д анимации како „Сончево со услови за ќофтиња“ остварија солидна заработувачка) , но проектите на Бартон и Камерон предизвикаа досега невиден интерес и го направија она што ниту еден таков проект претходно не успеа да го оствари: ги преполнија кино салите и предизвикаа кино манија која не стивнува со недели. И тука се поставува големото прашање, дали огромната гледаност на „Аватар“ и на „Алиса“ се должи на содржината или на тридимензионалниот приказ.„Аватар“ претставуваше голем ризик за Џемс Камерон, кој се подготвуваше да лансира скап филм без големи актерски имиња, без претходни групи обожаватели и во научно-фантастичниот жанр, кој не секогаш поминува добро во киносалите. Но, луѓето го гледаа овој спектакл и продолжија да го гледаат, што може да се припише на демонстрацијата на сето она што Камерон и неговиот тим умеат да го направат со специјалните ефекти. Тридимензионалната технологија очигледно го има обземено Џемс Камерон, кој и покрај тоа што постави рекорд на киноблагајните со „Аватар“, најави дека планира во 2012 г. повторно да го лансира епскиот филм „Титаник“. Се разбира, овојпат во 3Д форма. Со реизданието во чија подготовка ќе биде користена најновата 3Д технологија, ќе биде обележана 100-годишнината од потонувањето на бродот.„Титаник“ на Камерон постави рекорд во заработката со 1,8 милијарди долари. Неодамна, таа сума режисерот ја надмина со „Аватар“, кој оствари профит од 2,6 милијарди долари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Интер(но)фејс“ на Борис Шемов во „Мала станица“
На 18 декември 2025 година, со почеток во 20.00 часот, во Мултимедијалниот центар „Мала станица“, во рамките на програмските активности на Националната галерија, ќе биде отворена изложбата „Интер(но)фејс“ на уметникот Борис Шемов, курирана од д-р Ана Франговска.
„Интер(но)фејс“ е мултимедијален проект кој се фокусира на односот меѓу човекот и вештачката интелигенција, на улогата на јазикот како визуелно, идеолошко и комуникациско средство, како и на пост-интернет естетиката како нова културна реалност. Преку различни медиумски форми – текстуални интервенции, видео-содржини, алгоритамски и дигитални процеси – изложбата отвора прашања за моќта, контролата, технологијата и трансформацијата на субјектот во современиот дигитален контекст.
Насловот „Интер(но)фејс“ упатува на двојната природа на интерфејсот – како техничка површина на комуникација меѓу човекот и машината, но и како внатрешен, идеолошки простор во кој се преговараат значењата, одлуките и позициите на моќ. Изложбата го третира интерфејсот не само како функционален медиум, туку како критичка зона на судир меѓу човечкото искуство и алгоритамската логика.
Проектот се надоврзува на актуелните уметнички и теориски дискурси за постхуманизмот, визуелната култура и дигиталната медијација на реалноста. Во таа рамка, „Интер(но)фејс“ ја поставува вештачката интелигенција не како неутрален технолошки алат, туку како активен фактор во креирањето на современите културни, политички и етички релации.
Изложбата „Интер(но)фејс“ може да се посети во периодот од 18 до 24 декември 2025 година во Мултимедијалниот центар „Мала станица“, Национална галерија, Скопје.
Култура
Концерт на Драган Ѓорѓевиќ-Сузуки и Дино Имери во Музејот на македонската борба
На 17 декември (среда), со почеток во 20 часот, во амбиентот на Музејот на македонската борба, ќе се одржи концерт на двајцата истакнати уметници од регионалната и меѓународната сцена – виолончелистот Драган Ѓорѓевиќ Сузуки, еден од најценетите и највлијателни виолончелисти во регионот, и пијанистот Дино Имери, волшебникот на пијаното.
Сузуки е препознатлив по својата извонредна техничка виртуозност, длабока музикалност и силно сценско присуство, а критиката и публиката го вбројуваат меѓу најдобрите виолончелисти на Балканот. Заедно со Дино Имери, еден од најреномираните македонски пијанисти, тие носат концертна вечер од врвен уметнички ранг.
Публиката ќе има можност да ужива во внимателно избрана програма со дела од: Бетовен, Шнитке, Шуман, Дебиси, како и композиции од Имери Илкоска, носејќи свеж и современ израз во концертната вечер.
Концертот е со слободен влез, претставувајќи ретка можност за љубителите на класичната музика да доживеат висок уметнички квалитет и инспиративна интерпретација.
Култура
(Фото) Одржан традиционален предновогодишен концерт на Воениот оркестар
Под мотото „Заедно посилни во хармонија на звуците“, вчеравечер во Македонската филхармонија во Скопје се одржа традиционалниот предновогодишен концерт на Воениот оркестар на Армијата, овој пат збогатен со настап на музичари од Централниот оркестар на Вооружените сили на Романија.

По пречекот на претседателката и врховен командант на Вооружените сили Гордана Сиљановска-Давкова и интонирањето на химната на Романија и македонската химна, здружениот оркестар, под диригентската палка на мајор Каталин Ион од Вооружените сили на Романија, концертот го започна со свечена фанфара, a продолжи со позната љубовна тема од Романија. Првиот дел беше заокружен со популарен сплет на светски хитови аранжирани за дувачки оркестар и композицијата „Концертна прослава”, со мотиви од романското поднебје.

По него, под раководство на диригентот на Воениот оркестар на Армијата, потполковник Горан Илијевски, следеа блок на нумери од македонското поднебје, во кој беа опфатени фолклорни теми, народни песни, но и незаборавни забавни македонски евергрини.

Во третиот и последен блок, кој беше посветен на армиските припадници кои се секогаш подготвени да ја одбранат татковнината и да им помогнат на нашите сограѓани, покрај светски познати нумери со новогодишна тематика, беше изведена и македонската композицијата „Нашата Армија“, која претставува силен музички омаж на посветеноста и службата кон татковината.

Овој традиционален музички спектакл, покрај претседателката и врховен командант на Вооружените сили Гордана Сиљановска-Давкова, го проследија и министерот за одбрана Владо Мисајловски, началникот на Генералштабот на Армијата генерал-мајор Сашко Лафчиски, министри во Владата, пратеници во Собранието на Република Северна Македонија, претставници на дипломатскиот и воено-дипломатскиот кор акредитирани во Република Северна Македонија, активни и пензионирани генерали на Армијата, припадници на Министерството за одбрана, Генералштабот и командите на Армијата и други гости.

Мотото на традиционалниот предновогодишен концерт е уште еден доказ за сплотеност со сојузниците. Вчерашниот настан, преку хармонијата на звуците и универзалниот јазик на музиката, потенцира дека музиката продолжува да нè обединува и сплотува, ги поврзува луѓето кон заеднички вредности и стремежи и претставува мост помеѓу различни култури и традиции.



