Култура
„Од денес за утре„, нова играна серија
Прва македонска играна серија по подолг временски период, поставена на здрави, професионални и уметнички основи
„Од денес за утре“ е насловот на новата македонска играна серија, која ќе започне да се снима на почетокот на мај. Серијата обработува тематика од секојдневиот живот на просечно семејство од средната класа, составено од неколку генерации кои живеат под еден кров. Семејството се соочува со сите проблеми и предизвици на новото време, но серијата има намера да ги прикаже од духовитата, посветла страна на животот. „Од денес за утре“, се работи според сценарио на познатиот македонски драматург Братислав Димитров и легендарниот сценарист од бившите југословенски простори Предраг Перишиќ. Режијата е на Иво Лауренчиќ, а музиката на познатиот македонски композитор и пејач Ристо Самарџиев. За сцанографијата е задолжена Снежана Поњавиќ Муча, додека костимограф е познатата Розе Трајчевска. Режисерот на серијата од „Денес за утре“, Иво Лауренчиќ, кој е главен идеен творец на овој проект вели дека идејата се родила сосема случајно: „Сосема видлива е општата потреба да се помине дел од слободното време во светот на сериите. Се реков, зошто не направиме една наша, поставена на здрави етички и уметнички основи, приказна за обичниот човек и неговото секојдневие. Белег на една генерација современици, обработена од хумористичната, духовита страна, која пак жанровски е една од најтешките за работа. Следниот чекор беше да се одберат најдобрите за реализација и да се почне. И еве не денес веќе сме кон крајот на првата фаза, со готово сценарио и скоро целосно подготвен тим“,вели Лауренчиќ.
Изборот на актерската екипа е во тек и ќе бидат ангажирани реномирани македонски актери, а шанса ќе добијат и млади актерски имиња кои ќе ги играат улогите на помладите ликови во серијата. За сега е потврдено учеството на Сенко Велинов и Билјана Беличанец.„Да се најави релизација на играна серија во Македонија е голема работа, особено во ова врема на криза во сите сегменти. Затоа на почеток оваа првична идеја ја прифатив со сомнеж дека ќе се успее. Но подоцна сватив дека е повеќе од сериозно, си реков ајде да направиме серија која ќе ги надмине оние странските“, изјави Братислав Димитров.Поголемиот дел од серијата ќе се снима студиски во Скопје, а остатокот на неколку локации во Македонија. Ќе се одработи 13 часа монтиран материјал од кој постпродукциски ќе се реализираат 13 епизоди.
Серијата е во копродукција на „Идеа Плус комуникации“ и Сител телевизија, на чија програма и ќе се емитува.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.