„Матица македонска“ ја објави книгата „Сликање со светлина“ од авторот Цветан Гавровски, национален мајстор на фотографијата и ЕФИАП (Excellence FIAP) на светската федерација на фотографска уметност.

На 370 страници со двата циклуса, црно-бело и колор, во книгата се репродуцирани речиси 200 авторски фотографии со кус наратив за секоја од фотографиите.

Книгата е на македонски и англиски јазик со текст за авторското видување на креативната фотографија како ликовно изразно средство.

Цветан Гавровски (1947) е автор на дванаесет самостојни изложби и учесник на повеќе од 200 изложби во светот. Ја претставувал македонската фотографија со фотографии во националните колекции на светските изложби во: Кина (1997, 2006), Швајцарија (1999), Италија (2001), Унгарија (2004), Луксембург (2004), Словачка (2008), Ирска (2009), Индонезија (2015), Кореа (2016), Шпанија (2012, 2019).

„Локомотива“ – центар за нови иницијативи во уметноста и културата во 2020 година, во рамкте на програмата „Други простори“ поддржа развој на три современи уметнички дела на домашните уметници Зорица Зафировска, Оливер Мусовиќ и Филип Јовановски.

Користејќи разни медиуми, уметниците преку своите дела се занимаваат со исклучително важни теми поврзани со екологијата, која ја разгледуваат како динамична категорија на меѓусебно поврзани, еколошки, општествени, демократски, како и културни процеси на секојдневното живеење. Делата истражуваат и се занимаваат со јавниот простор, животната средина, урбаното планирање на градот и правото на одлучување на уредување и развивање на средината во која живееме. Делата опфаќаат истражување, документација и уметничка презентација на зелените површини, од планирање на градското зеленило и пошумување како дел од урбаните политики и просторното планирање до граѓански грасрут-инцијативи за развој на урбани градини во одредени градски маала и четврти.

Оливер Мусовиќ прв ќе се претстави во рамките на програмата со својот фотографски проект „Урбани шуми“, кој ќе може да го проследиме како виртуелна изложба на платформата „Кунстматрикс“. Кон изложбата може да се пристапи на следниот линк.

Насоките за разгледување и навигација низ изложбата се наоѓаат на веб-страницата на „Локомотива“ (www.lokomotiva.org.mk), како и на социјалните мрежи на организацијата. Тие се дадени и на самиот влез во виртуелниот простор на изложбата. Изложбата ќе биде отворена в петок, 27 ноември, и ќе биде достапна за посета до сабота, 12 јануари.

За својот проект Мусовиќ вели: „Дрвјата се едни од најотпорните креации на природата, кои играат важна улога во правењето на нашите градови погодни за живеење. Од јавните паркови, преку општествените градини, па до уличните дрвја, секој аспект на вегетацијата на градот, без разлика колку е мал, сочинува дел од неговата поголема урбана шума. Но, како што се зголемува густина на градовите и зградите заменуваат сè повеќе дрвја, сè поголема е загубата на градското зеленило, кое не секогаш е веднаш видливо, но секако таа загуба е значајна.

Проектот за фотографско истражување на урбаните и пери-урбаните шуми во Скопје ги испитува просторните политики и политиките кон животната средина во специфичниот локален контекст.

Резултатот на проектот е дигитална фотографска серија на урбани пејзажи, која мапира и документира индивидуални дрвја на ниво на улица наспроти заднина на изграденото опкружување, групи дрвја, паркови и други урбани шуми во Скопје. Ова не е научен еколошки проект, иако во својата методологија користи некои конвергентни трансдисциплинарни пристапи, туку личен, поетски поглед на еден од жителите на градот за тоа како природата во градот се повлекува“.

Оливер Мусовиќ (1971) самостојно изложувал во Македонија, Швајцарија, Словенија, Србија, Австралија и во Црна Гора. Учествувал на многубројни групни графички изложби и изложби на современа уметност во целиот свет. Учествувал и на резиденцијални престои во Германија, Чешка, Швајцарија, Кореја, САД и во Франција. Негови дела се застапени во повеќе јавни колекции и се публикувани во повеќе публикации – прегледи на современа уметност од најзначајните светски издавачи на уметничка литература.

Уметничките продукции се развиваат како дел од проектот „Програма на ‘Локомотива’ во кино ‘Култура’ – проектен простор за современи изведувачки уметности и современа култура“, финансиран од Град Скопје, и како дел од програмата „Други простори“ на проектот ACT: Act, Climate, Transition/„Уметност, клима, промена“, кофинансиран од програмата „Креативна Европа“ на Европската унија.

„КСП Центар-Јадро“ организира онлајн-дискусија со Антонио Аранѓеловиќ (Тонио Сан) за техничките елементи и аспекти на рецитирањето и пишувањето во рапот.

Преку заедничка анализа на дел од песните на Тонио Сан и неговата методологија во однос на пишувањето, ќе се разгледаат разните елементи во пишувањето: тема, punchline, интуитивност, интензитет на глас, емоција, flow, живописно раскажување и др. Целта на оваа дискусија е да се анализираат деталите на пишувањето рап-песни и колку таа техника придонесува кон градење автентичен идентитет на рап-артистот.

Антонио Аренѓеловиќ, професионално познат како Тонио Сан или РНС, e македонски рапер, стрип-уметник и универзитетски професор. Oд 2015 година работи на Универзитетот ФОН на Факултетот за дизајн и мултимедија. Во мај 2019 ја издаде својата прва графичка новела со наслов „Некои мали нешта“.

Има издадено три соло албуми: „Цветот на светот“ (2004); „Друштвото на мртвите поети“ (2010); „Синтеза на ум и меч“ (2012).

Во соработка со други артисти бил дел од повеќе албуми: Чаирскиот алмум со Кемп ОД (2013); Green out – „Некои скопски бандити“ (2009); Green out -„ Рапаноја“ (2014); „Легијата – Лош ден за империјата“ (2008); Легијата на проколнатите (2016).

И неколку компилации, како: Sk street beats (2002); „Прирачник за модерен рап“ (2009); „Деценија“ (2010).

Модератор на настанот ќе биде Ѓорги Пулевски (Џоџо).

Дискусијата ќе се одржи денес со почеток од 17 часот на фејсбук-профилот на „КСП Центар-Јадро“.