Култура
Објавена програмата на „Војдан Чернодрински“
Четириесет ипеттиот Македонски театарски фестивал „Војдан Чернодрински“ ќе се одржи од 4-ти до 10 јуни во Прилеп, пренесе МИА
Во официјалната конкуренција за награди се 11 претстави на македонските професионални театри, а годинашни добитници на наградата за животно дело се актерите Ратка Чоревска, Мите Грозданов и Чедо Христов„Фестивалот ќе биде отворен со претставата „Тупаница полна со љубов“ од Дејан Дуковски во режија на Санди Лопичиќ во изведба на Македонскиот народен театар од Скопје. Со „Крпен живот“ на Прилепскиот театар, на 10 јуни ќе биде затворена манифестацијат, а изведбата ќе биде во чест на наградените“, соопшти Петар Темелковски, претседател на Советот и селектор на ФестивалотПокрај претставата на МНТ, селекторот избра уште 10 на македонските професионални театри кои ќе се натпреваруваат за најдоброто остварување меѓу двата фестивала.Драмски театар од Скопје ќе ја прикаже „Жената како воено поле“ од Матеј Висниек во режија на Владлен Александров, Велешкиот театар ќе се натпреварува со претставата „Баханалии“ од Горан Стефановски во режија на Наташа Поплавска, а Албанскиот театар – Скопје со „Генерал на мртвата војска“ од Исмаил Кадаре во режија на Дино Мустафиќ.Во официјалната конкуренција се и „Госпоѓица Јулија“ од Август Стриндберг во режија на Алекдсандар Поповски, во изведба на Турскиот театар, „Не играј на Англичани“ по текст на Владимир Ѓурѓевиќ во режија на Кирил Петрески на Кумановскиот театар, „Браќа Карамазови“ од Достоевски во режија на Дејан Пројковски на Битолскиот, „Блаканот не е мртов“ од Дејан Дуковски во режија на Стојан Стојаноски на Штипскиот театар, претставата „Стрингберг досие“ во режија на Владо Цветановски на Струмичкиот театар, „Кавкаски круг со креда“ од Бертолд Брехт во режија на Мартин Кочовски на Прилепскиот и „Куќа на граница“ во режија на Арбен Тачи и Петрит Незири – претстава на Тетовскиот театар.Темелковски одгледал преку 30 претстави за да ја подготови годинашнава програма.„Има висок квалитет и енергија на младите талентирани актери. Тоа е сегашната одлика на македонските театри. Тоа многу не радува. Театрите имаат квалитет и младите актери се достојна замена на нашите постари генерации“, рече Темелковски констатирајќи дека македонските театри имаат што да понудат.Придружниот дел на програмата ќе понуди уште шест претстави меѓу кои и дипломски на студентите на ФДУ од Скопје. Ќе се дебатира на три теми кои треба да се допрецизираат, но се знае дека ќе бидат посветени на младите драмски автори.Од лани е воспоставена традиција најдобрата претстава на МТФ „Војдан Чернодрински“ да се прикажува на Фестивалот на античката драма во Стоби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Факултетот за музичка уметност го најави годишниот концерт „ОРИОН – каде што се раѓаат ѕвездите“
Факултетот за музичка уметност – Скопје го најави годишниот концерт насловен „ОРИОН – каде што се раѓаат ѕвездите“, кој ќе се одржи во петок, 5 декември, со почеток во 20:00 часот во Големата концертна сала на Македонската филхармонија. Настанот е дел од одбележувањето на 59-годишнината од постоењето на институцијата.
ФМУ – Скопје истакнува дека како алма матер на голем број уметници од земјата и регионот, останува централниот столб на музичкото и балетското образование, создавајќи генерации изведувачи, педагози и творци кои го обликуваат уметничкиот живот во Македонија.
На концертната програма ќе настапат Симфонискиот оркестар на ФМУ, Мешаниот хор „Драган Шуплевски“, Камерниот гудачки оркестар „ФМУ Солисти“, Оркестарот од народни инструменти со солисти, студенти од Катедрата за балетска педагогија, од Катедрата за џез и популарна музика, како и дувачкиот ансамбл на ФМУ, под водство на проф. м-р Цанев, проф. м-р Татарчевски и доц. м-р Спироски.
Публиката ќе има можност да слушне дела од Пурсел, Сен-Санс, Прокофјев, Тиле/Вајс, Коен, Сусато, Горецки, Гершвин, македонска традиционална музика, како и нови композиции од студентите А. Голчева и М. Цветановска.
Влезот на настанот е слободен.
Култура
Сè што ни е заедничко“ – во МСУ изложба што го иницира прашањето „Дали навистина го дишеме истиот воздух?“
Сè што ни е заедничко (Институција во дишење) – нова изложба во МСУ-Скопје од 27 ноември
Во Музејот на современата уметност – Скопје на 27 ноември 2025 година, со почеток во 20 часот, ќе биде отворена изложбата „Сè што ни е заедничко (Институција во дишење)“, кураторски проект на Мира Гаќина и Јованка Попова.
Во изложбата учествуваат Forensic Architecture, Денис Фереира да Силва и Арџуна Неуман, Дурмиш Ќазим, Џумана Мана, Зорица Зафировска и Палестинскиот музеј.
Проектот тргнува од прашањето дали навистина го дишеме истиот воздух. Изложбата го поставува воздухот како ресурс што формално го делиме, но не и еднакво, укажувајќи на токсичните атмосфери – буквални и политички – и на позицијата на маргинализираните заедници.
Инспирирана од концептот на Фанон за „борбено дишење“, поставката ги истражува уметничките практики што откриваат колонијални, империјални и капиталистички структури впишани во воздухот што го дишеме. Авторите визуелизираат токсични облаци, архиви на насилство и невидливи атмосфери што влијаат врз секојдневието.
Паралелно со изложбата, која ќе трае до крајот на февруари, ќе се одржат јавни програми. Во рамките на проектот „Институционални градини“ на Зорица Зафировска ќе има детски работилници за садење и изработка на семенски топчиња, активности за чистење и обновување на просторот околу МСУ, поставување компостна кутија и прикажување едукативни видеа.
Со оваа поставка МСУ-Скопје се претставува како „институција во дишење“ – отворена, инклузивна и ориентирана кон заедницата, со повик за заедничко размислување и акција. Визуелниот идентитет на проектот е дело на Албана Бектеши.
Култура
Промоција на монографијата „Рисима“ од Јасна Франговска
Во среда, 3 декември, со почеток од 19:00 часот во „Јавна соба“, Скопје, ќе се одржи промоцијата на монографијата „Рисима“ од Јасна Франговска, посветена на најпознатата и најуспешна македонска кореографка за современ танц ‒ Рисима Рисимкин. Изданието е на „ПНВ Публикации“ и објавено е со поддршка од Министерството за култура и туризам.
Монографијата низ разговор со Јасна Франговска и Рисима Рисимкин ќе ја претстави Јулијана Величковска, главен и одговорен уредник на „ПНВ Публикации“.
Во ова обемно и луксузно издание, на 180 страници, опфатени се сите значајни аспекти од 45-годишната кариера на Рисима Рисимкин ‒ од самите почетоци како балерина, со сите предизвици со кои се соочувала, до големите успеси што ја дефинираа како истакната кореографка од областа на современиот танц, којашто со нејзината едукациска работа зад себе остава нови генерации танчари и кореографи. Рисима Рисимкин е клучна фигура во македонската култура, а нејзиниот труд годинава беше крунисан и со високото признание ‒ Витез на францускиот ред на уметностите и книжевностите што го доделува државата Франција.
Покрај извонредно питкото писмо на Франговска, што на многу топол и непосреден начин го доближува животниот и професионалниот пат на Рисимкин, извадоците од позначајните рецензии за нејзините дела и обраќањата до читателот од самата Рисима, изданието е збогатено и со неверојатни фотографии од личната архива на Рисимкин и од архивата на „Интерарт културниот центар“, чиишто автори се: Андреј Гиновски, Драган Перковски, Сашо Димоски, Сердар Ајдин, Aнтонио Пиштолов, Ивана Тасев, Олга Ибатулина, Зоран Велјаноски ‒ Летра, Емил Петров и Борис Грдановски.
„Би ја опишала како македонската Пина Бауш, потпрена на белиот балет, којашто во еден момент посакува да излезе од таа рамка и да оди во слободата на движењето…“, ќе изјави Мирјана Радочевиќ за „Политика“, Белград во 2003 г.

