Култура
Данијела Мартиновиќ и Петар Грашо за Нова Година во Скопје
Во божиќен пазар со автентични германски производи, традиционална германска храна и пиво, како и варено вино ќе можат да уживаат граѓаните на главниот град од 25 декември до 1 јануари.
Со овој пазар, скопјани, како и останатите жители на Македонија ќе можат да доживеат уникатно искуство со новогодишен дух, на ист начин како и жителите на збратимениот Нинберг. Оваа година нема да има повеќедневни концерти, за разлика од минатата, туку само еден централен на 31 декември, на кој главни ѕвезди ќе бидат Данијела Мартиновиќ и Петар Грашо.
Од домашната музичка сцена свое учество ќе земат Ребека, Елена Ристеска, Гоце Арнаудов, Бени, Сузана Спасовска, Соња Тарчуловска и Кристина Арнаудова.
Германската амбасадорка во Македонија, Улрике Мариа Конц, рече дека Божиќ е празник на светото, новиот живот и пријателството и затоа ги повика сите граѓани да дојдат и заедно на плоштадот „Македонија“ да ја дочекаат Новата година.
„Божиќниот пазар е препознатилив белег на збратимениот Нинберг, а Македонците ќе имаат можност оваа година овој дух да го доживеат. Од 25. декември до 1. јануари за време на пазарот, на граѓаните ќе им се понуди одлична забава. Посебно мислевме на најмладите. За нив ќе има поставено бина каде ќе можат во текот на денот да гледаат разни претстави, но и да се фотографираат со Дедо Мраз“, рече амбасадорката Конц.
Градоначалникот на Скопје, Коце Трајановски, рече дека оваа година бината ќе биде поставена на просторот меѓу спомениците на Даме Груев и Гоце Делчев.
„Ќе има помалку место од минатата година, но ќе биде доволно за сите заедно да ја дочекаме 2011 година“, рече Трајановски.
Прашани за хонорарите на музичките ѕвезди, Жарко Луковски, извршниот директор на Т-мобиле рече дека хонорарите кои ги добиле се со големи попусти и дека пејачите ќе настапат во Скопје, најмногу поради љубовта која ја чувствуваат кон главниот град.
Организатори за овогодинешниот дочек за Нова Година се Град Скопје, Македонски телеком, Т-мобиле Македонија, Македонско-Германското стопанско здружение, како и Германската амбасада /крај/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Бизнисот на задоволството“ почна да се прикажува пред македонската публика, екипата се соедини на кинопремиерата
Со свечена кинопремиера и три проекции во „Синеплекс“ почна прикажувањето на еден од најнaградуваните македонски филмoви „Бизнисот на задоволството“, на режисерот, Гоце Цветановски.
Филмскиот настан ја соедини на едно место екипата на политичкиот трилер, а по проекцијата на коктел забава присутните гости ги собираа впечатоците.
Режисерот Гоце Цветановски ги повика сите љубители на филмот да го проследат неговото дело кое што отвора една деликатна тема како што е присилната проституција, а во фокусот се корупцијата и трулоста на целиот систем.
„Како режисер сум премногу задоволен од приемот на публиката на првите проекции. Коментарите се дека сме направиле филм кој се разликува од се’ останато што досега е направено во Македонија и ме радува што многумина искоментираа дека е храбар и задира чувствителни теми. Повеќе не би коментирал, ги повикувам сите љубители на филмот да дојдат во кино и да видат за што станува збор, па заедно ќе дебатираме. Веќе е на редовниот репертоар и се прикажува секој ден“, рече Цветановски.
Филмот од вчера почна со проекции и во другите градови низ Македонија. Во сабота ќе има можност да го види публиката во Кочани, додека во Штип и во Велес ќе биде прикажан в недела.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Филмот е финансиран од Агенцијата за филм.
Култура
КИЦ го најавува годинешното издание на „Звукот на Скопје“
Носечката манифестација на Културно информативниот центар – Скопје „Звукот на Скопје“, оваа година повторно ќе се случи во формат на летен фестивал на отворено на кој ќе настапат свежи и актуелни музички имиња. Програмата ќе биде збогатена со изложби и проекции на филмови, како дел од програмските активности на центарот.
Веќе знаете дека „Звукот на Скопје“ значи нов, летен, open air фестивал, кој прераснува во ново скопско музичко жариште. „Звукот на Скопје“ значи и свеж здив во долгото скопско лето и заситување на културните потреби на скопската сцена, со современи музички збиднувања и разновидна културна понуда. „Звукот на Скопје“ е и простор каде на голема сцена ќе може да се видат и етаблирани, но и нови групи, а значи и промовирање на нови концертни локации во градот, оживувајќи ги во културен контекст.
„Звукот на Скопје“ ќе се случи на 27 септември 2024, и тоа во Кулпарк (пред КИЦ), Салон 19:19 и галериите.
Култура
Со наградената претстава „Мојот маж“, Драмски театар ја отвора новата сезона
Новата сезона во Драмски започнува утре со претставата „Мојот маж“. Ансамблот на Драмски неодамна учествуваше на меѓународниот театарскиот фестивал Пургаторије 2024 во Тиват, Црна Гора каде за претставата „Мојот маж“ ја доби награда за „Актерска бравура”.
Во образложението на жирито е истакнато: „Неспорна работа е дека актерската уметност има свој автентичен простор во однос на режисерско-драматуршкиот концепт, но дека актерската подела во една претстава функционира како еден организам, еден комплексен ум, една добро организирана машинерија, која умее во целина темелно да ја разбере и преболи современата сурова стварност, меѓучовечката бездна што се отвора меѓу најблиските, е врвно мајсторство што се гледа сѐ помалку и помалку во театарот денес. Актерите во оваа претстава се сами по себе доволна критична маса за одличен театар, свесно поврзани со сопствената психолошка слоевитост, наелектризирани од личните неволји, подготвени да се поништат и повторно да се преродат одвнатре, откривајќи му ја на гледачот старо-новата терапевтска вистина за човечката совест“.
Режисер на претставата „Мојот маж“ е Нела Витошевиќ, драматург е Викторија Рангелова-Петровска. Драматизацијата е на Нела Витошевиќ и Викторија Рангелова-Петровска. Костимограф е Роза Трајчевска-Ристоска, сценограф е Костантин Трпеноски и асистент сценограф е Моника Ангелевска. Музиката е избор на Нела Витошевиќ.
Улогите во претставата ги толкуваат актерите: Сара Климоска, Сања Арсовска, Емилија Мицевска, Наталија Теодосиева, Трајанка Илиева-Вељиќ, Игор Ангелов, Исмет Шабановиќ и Филип Трајковиќ.
По премиерата во 2020 година претставата “Мојот маж” е веќе пет сезони на редовниот репертоар на матичната сцена.
На фестивалот Војдан Чернодрински во 2021 година претставата доби 4 награди и тоа: „Награда за костимографија“ на Роза Трајчевска–Ристоска за костимите во претставата, „Награда за современа сценска драматизација“ на Нела Витошевиќ и Викторија Рангелова–Петровска за драматизација на колажот од раскази на Румена Бужаровска и авторските монолози, „Награда за главна женска улога“ на Наталија Теодосиева за улогите во претставата „Мојот маж“ и „Награда за севкупен уметнички ангажман и резултат на авторот и актерите“.
Драмски театар Скопје со оваа претстава имаше повеќе гостувања со извонреден прием од публиката. Се играше во Словенија на сцената на „Местно гледалишче“ во Љубљана, во Црна Гора на сцената на „Градско позориште“ во Подгорица и минатата година на летната сцена на Бриони на хрватското издание на фестивалот „РУТА“.