Култура
Меморијалниот центар на холокаустот ќе се отвара на 10 март

Меморијалниот центар на холокаустот на Евреите кој е лоциран во поранешното еврејско маало во Скопје, ќе биде отворен на 10 март 2011 г., во знак на вечна почит за 7.148 Евреи убиени во логорот Треблинка
На отворањето ќе му претходат настани кои ќе се одржат во Скопје, Битола и Штип на 8 и 9 март следната година. На отворањето ќе присуствуваат државници од целиот свет, премиери, претседатели и претставници на еврејските заедници, а покровител на настанот ќе биде премиерот Никола Груевски.Меморијалниот центар претставува мултимедијален центар, составен од повеќе функционални делови, и ќе претставува споменик, музеј, образовен и истражувачки центар, културен центар, место за изложби и регионален центар за Југоисточна Европа.Меморијалниот центар во Македонија ќе биде еден од четирите центри во светот заедно со центрите во Израел, САД и Берлин.Центарот ќе биде отворен во неколку фази. Во првата фаза на 10 март ќе се отвори музејскиот комплекс кој во себе ќе содржи поставка која ќе го претстави животот на Евреите. За поставката ќе се погрижи познатиот Мајкл Беренбаум, кој во светски рамки претставува лидер за оваа проблематика. Беренбаум ја има поставено поставката и во Меморијалниот центар во Вашингтон.Средствата за изградбата на центарот се добиени од Фондот на холокаустот добиени со законот за денационализација, односно со враќање на имотите на Евреите во Македонија, кои немаат правни наследници, со голема поддршка од Владата и институциите во државава.Љиљана Мизрахи, претседател на Фондот, на денешната презентација на центарот истакна дека постапката за денационализација на имотите која заврши во 2007 година беше сериозен и тежок процес.„Македонија е прва и единствена земја во светот што на ваков начин се сети на оние кои загинаа во концентрациониот логор Треблинка, а кои нема кој да ги наследи. При тоа, треба да паметиме дека настаните што се случија на 11 март 1943 година се нешто што не може да се препише било каква вина на македонскиот народ и на етничките заедници во Македонија“ – истакна Мизрахи Панде Лазаревски, член на Управниот Одбор на фондот, истакна дека во Македонија не постои антисемитизам. Според Лазаревски за време на втората Светска војна 98 отсто од вкупната еврејска популација, од кои 50 проценти биле деца, биле испратени во концентрациониот логор Треблинка, на територијата на окупирана Полска„На 10 март ќе биде официјалниот погреб на 7.148 наши сограѓани, кои беа убиени во концентрациониот логор Треблинка. Да не се заборави дека тука живееле луѓе што повеќе ги нема, што исчезнале во лудилото на Втората светска војна“ – рече Лазаревски. Тој најави дека фондот следната година ќе побара од комисијата за одбележување на значајни настани да се одбележи и 100 годишнината од македонско – израелската поврзаност.Денеска еврејската заедница во Македонија брои 250 членови и важи за исклучително важна заедница во Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Љутков: Да изградиме индустрија што ќе создава игри со македонски печат и глобален потенцијал

Денес во Скопје беше отворена првата конференција за развој на видеоигри во Македонија „Game Dev Rev 2025“, во организација на Асоцијацијата на македонската индустрија за видеоигри (MGI).
Со своето обраќање пред присутните, министерот за култура и туризам Зоран Љутков нагласи дека оваа конференција не претставува само промоција на видеоигри, туку е симбол на креативноста, младинската енергија и новата културно-економска реалност за Македонија.
„Дали знаете што имаат заедничко една добра видеоигра и една успешна културна политика?“-праша министерот во своето обраќање. Двете почнуваат со идеја, момент на инспирација, што, ако е поддржан на вистински начин, може да прерасне во нешто големо. Некогаш дури и светски“, рече Љутков.
Министерот посочи дека индустријата за видеоигри денес е една од најбрзорастечките културни и економски гранки во светот, со годишен приход што го надминува оној на филмската и музичката индустрија. Таа индустрија, како што истакна, претставува спој на уметност, технологија, наратив и дизајн, и создава нови можности за младите.
Тој информираше дека Министерството за култура и туризам ја даде својата поддршка за иницијативата на асоцијацијата и за сите професионалци, ентузијасти и визионери вклучени во неа.
„Ова не е само конференција, туку повик до нашите млади креативци, дизајнери и програмери да го препознаат својот потенцијал, да се поврзат, да учат и да создаваат. Тука се гради иднината на македонската гејминг-индустрија,“ рече министерот.
Во своето излагање, министерот се заложи за поголема поддршка на новите културни индустрии, особено оние што го поврзуваат младинскиот потенцијал со глобалните трендови и носат нова економска вредност за земјата.
„Да го искористиме овој почеток за да создадеме заедница што ќе расте и ќе создава игри со глобален потенцијал–но со македонски печат,“ рече Љутков.
На конференџијата особено значајно беше присуството на претставници од Европската федерација за развој на видеоигри, како и поддржувачи од целиот регион и Европа, што претставува силен сигнал дека Македонија се позиционира како активен чинител на дигиталната и креативна мапа на Европа.
Култура
Сиљановска-Давкова: Фестивалот „Игор Маџиров“ уште еднаш покажа и докажа дека театарската моќ допира до сите генерации

Претседателката Гордана Сиљановска-Давкова вчеравечер се обрати на свеченото отворање на четвртото издание на Интернационалниот фестивал на детски театри „Игор Маџиров“, којшто под слоганот „Сцена за сечиј сон“, и годинава се одржува под нејзино покровителство.
За неа, фестивалот, иако е насочен кон најпрефинетата и најпробирливата целна група- најмладите, со оригиналниот и искрен пристап ги заведува, радува и восхитува не само нив, туку и возрасните, будејќи го детето во нив.
Според претседателката, името на фестивалот го отсликува и наликува на профилот и сензибилитетот на извонредниот, прерано починат Маџиров, чии незаборавни улоги од него направија театарска легенда.
Акцентирајќи ја не само естетската туку и педагошката мисија на „Театарот за деца и младинци“, Сиљановска-Давкова изрази неизмерна почит кон актерите и сите вработени во театарот кои, од скромен, но топол амбиент, небаре волшебници, создаваат прекрасна сцена, налик на онаа од соништата.
Таа укажа на потребата од нова, пристојна тетарска куќа, обраќајќи се до надлежните институции со зборовите: ,,Уште еднаш посакувам овој минијатурен дом на „Театарот за деца и младинци“ да порасне, како што пораснаа децата кои во изминатите три децении го посетуваа и му се насладуваа. Просторното растење нека соодветствува на потребите на домаќините, но и на гледачите”.
Култура
Наградена со Стериина награда, славена во Белград – претставата „Народен пратеник“ на МНТ сега патува за Брчко

Со претставата „Народен пратеник“ од Бранислав Нушиќ, во режија на Егон Савин, Македонскиот народен театар ќе настапи на претстојните 42. Интернационални театарски средби „Брчко Дистрикт“ во Босна и Херцеговина.
Фестивалската програма се одржува од 16 до 24 октомври, а МНТ ќе настапи на втората фестивалска вечер, утревечер, на 17 октомври.
Фестивалот „Брчко Дистрикт“, со речиси половина век традиција, важи за еден од најрелевантните во регионот, познат по специфичниот пристап кон продукцијата, селекцијата и наградувањето на претставите и поединците.
Селектор на годинашното издание е култниот и харизматичен актер и режисер, Ирфан Менсур.
Летово, претставата „Народен пратеник“ доби Специјална Стериина награда за колективна актерска игра во Нови Сад и е сè поактуелна во регионалниот театарски простор.
Веднаш потоа беше изведена и во Народно позориште во Белград, каде Менсур фасциниран од актерската игра ја вклучи претставата во официјалната селекција на фестивалот во Брчко, со зборовите „Значаен пример на сценска интерпретација на класичен текст“.
Режијата на Савин ја задржува суштинската визија на Нушиќ, избегнувајќи радикални режисерски интервенции. Наместо тоа, фокусот е ставен на колективната актерска игра и јасната критика на политичкиот театар, испорачана интелигентно, духовито и трезвено.
Во претставата играат: Александар Микиќ, Дарја Ризова, Тони Михајловски, Јордан Симонов, Тања Кочовска, Александар Михајловски (со снимен глас), како и ансамблот: Дејан Стамчевски, Синан Ракип, Скендер Бериша, Зекирија Алим, Мирослав Атанасовски, Мартин Китановски и Хусеин Халили.
Ова е трето учество на МНТ на фестивалот во Брчко. Во претходните години, театарот има учествувано со претставите „Народен непријател“ и со „Нема да биде крај на светот“ и двете во режија на Нина Николиќ.