Култура
Во понеделник е Роденден на уметноста
Со целодневна програмска активност, во понеделник, 17-ти јануари, Младинскиот културен центар ќе се вклучи во меѓународната манифестација, наречена: Роденден на уметноста.
Оваа манифестација, преку глобален радиопренос како и бројни концерти, арт перформанси и инсталации, програми за деца… секој 17-ти јануари се одржува во повеќе од дваесетина европски земји, вклучително и САД, Јапонија, Јужна Америка… а првпат воопшто Младинскиот културен центар ја вклучува и Македонија во оваа манифестација.Роденденот на уметноста е традиционален годишен настан, кој првпат бил предложен од страна на францускиот уметник Роберт Филиу во 1963 г. По смртта на Филиу, декември 1987 г., се формира меѓународна организација која ја презема одговорноста за славењето на овој ден, наречена Western Front. Имено, според Филиу, уметноста не постоела пред милион години, но еден ден, на 17-ти јануари, истата се родила. Тоа се случува кога некој човек испуштил сув сунѓер во кофа со вода. Филиу предложи овој датум да се слави како национален празник со тоа што ќе се слави присутноста на уметноста во нашите секојдневни животи. Од година во година, оваа идеја успева да одушеви сè повеќе уметници, групи на уметници, пријатели на уметноста кои се вклучуваат кон овој настан преку организацијата Western Front, организација, каде се разменуваат идеи и уметност преку различните алатки за телекомуникација.Уметниците почнуваат да го слават овој ден со забави и дружења, потоа со меѓународни честитки и официјална кореспонденција, преку уметност искажана со електронска пошта, поштенски пратки, телеграми, музика, наменски компонирана при телефонски повици, модем до модем МИДИ поврзување, на крај сето да се слави преку интернет благодарение на еволуцијата на технологијата.Младинскиот Културен Центар, за овој ден подготви програма со настани поврзани со сите жанрови на уметноста. Во галеријата на МКЦ ќе може да се посети изложбата на Калиопи Илиевска и Мила Ивановска со дела од нивниот дипломски труд како и дела настанати во текот на своите студии на Факултетот за ликовни уметности во Скопје. Циклусот на слики на Мила Ивановска носи наслов „Разговор со мојата душа (моето огледало)“, а Калиопи Илиевска својот циклус го наслови со „Лична легенда“. Изложбата ќе биде проследена со проекција на видео материјал кој е создаден во текот на настанувањето на делата откривајќи го процесот на нивното настанување.Со почеток во 19 часот, ќе биде промовиран краткиот роман „Приказни за август“ од авторот Дејан Велкоски, автор, зад чие издание стои издавачката куќа Антолог.„Приказни за август“ е кус приказ на љубовта, видена низ очите на еден просечен сонувач; збирка циклизирани раскази, поврзани од отсонуваната љубовна приказна. Сонувачот ќе направи сѐ за да извлече насмевка од неа, но понекогаш, сѐ не е доволно… На крајот, нему му останува да сонува некои други приказни, некои други светови.Во 20 часот ќе биде прикажан филмот „Пејзаж 2“ (2008) во режија на Винко Модерндорфер во кој настапуваат Марко Мандиќ, Петар Мусевски, Јанез Хоцавер. Во филмот, Сергеј и Поле се ситни крадци кои ќе украдат уметничко дело од резиденцијата на пензионираниот комунистички генерал кој е навикнат проблемите да ги решава по кратка постапка, па на помош го повикува мистериозниот помошник, кој добива задача да ја врати сликата со пејзажот, но и доверливиот документ кој по грешка завршува во рацете на крадците.За крај, во киното „Фросина“ ќе може да се проследи настапот на Тони Китановски заедно со Изет Кизил од Турција и Костас Теодору од Грција. Тројцата музичари првпат настапија во 2003 г. во Бон, Германија како членови на составот на нивниот заеднички пријател Теодосиј Спасов. Како што велат, соработката како трио се јави како неминовност генерирана од меѓусебната доверба, радост, страст и љубопитност кон се што може да се нарече музичка мисла и креативна изведба на сцена. Звукот на овој состав е сублимат на индивидуалните истражувања на традиционалните музички стилови од различни краишта на светот сместен во современ импровизаторски концепт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Интер(но)фејс“ на Борис Шемов во „Мала станица“
На 18 декември 2025 година, со почеток во 20.00 часот, во Мултимедијалниот центар „Мала станица“, во рамките на програмските активности на Националната галерија, ќе биде отворена изложбата „Интер(но)фејс“ на уметникот Борис Шемов, курирана од д-р Ана Франговска.
„Интер(но)фејс“ е мултимедијален проект кој се фокусира на односот меѓу човекот и вештачката интелигенција, на улогата на јазикот како визуелно, идеолошко и комуникациско средство, како и на пост-интернет естетиката како нова културна реалност. Преку различни медиумски форми – текстуални интервенции, видео-содржини, алгоритамски и дигитални процеси – изложбата отвора прашања за моќта, контролата, технологијата и трансформацијата на субјектот во современиот дигитален контекст.
Насловот „Интер(но)фејс“ упатува на двојната природа на интерфејсот – како техничка површина на комуникација меѓу човекот и машината, но и како внатрешен, идеолошки простор во кој се преговараат значењата, одлуките и позициите на моќ. Изложбата го третира интерфејсот не само како функционален медиум, туку како критичка зона на судир меѓу човечкото искуство и алгоритамската логика.
Проектот се надоврзува на актуелните уметнички и теориски дискурси за постхуманизмот, визуелната култура и дигиталната медијација на реалноста. Во таа рамка, „Интер(но)фејс“ ја поставува вештачката интелигенција не како неутрален технолошки алат, туку како активен фактор во креирањето на современите културни, политички и етички релации.
Изложбата „Интер(но)фејс“ може да се посети во периодот од 18 до 24 декември 2025 година во Мултимедијалниот центар „Мала станица“, Национална галерија, Скопје.
Култура
Концерт на Драган Ѓорѓевиќ-Сузуки и Дино Имери во Музејот на македонската борба
На 17 декември (среда), со почеток во 20 часот, во амбиентот на Музејот на македонската борба, ќе се одржи концерт на двајцата истакнати уметници од регионалната и меѓународната сцена – виолончелистот Драган Ѓорѓевиќ Сузуки, еден од најценетите и највлијателни виолончелисти во регионот, и пијанистот Дино Имери, волшебникот на пијаното.
Сузуки е препознатлив по својата извонредна техничка виртуозност, длабока музикалност и силно сценско присуство, а критиката и публиката го вбројуваат меѓу најдобрите виолончелисти на Балканот. Заедно со Дино Имери, еден од најреномираните македонски пијанисти, тие носат концертна вечер од врвен уметнички ранг.
Публиката ќе има можност да ужива во внимателно избрана програма со дела од: Бетовен, Шнитке, Шуман, Дебиси, како и композиции од Имери Илкоска, носејќи свеж и современ израз во концертната вечер.
Концертот е со слободен влез, претставувајќи ретка можност за љубителите на класичната музика да доживеат висок уметнички квалитет и инспиративна интерпретација.
Култура
(Фото) Одржан традиционален предновогодишен концерт на Воениот оркестар
Под мотото „Заедно посилни во хармонија на звуците“, вчеравечер во Македонската филхармонија во Скопје се одржа традиционалниот предновогодишен концерт на Воениот оркестар на Армијата, овој пат збогатен со настап на музичари од Централниот оркестар на Вооружените сили на Романија.

По пречекот на претседателката и врховен командант на Вооружените сили Гордана Сиљановска-Давкова и интонирањето на химната на Романија и македонската химна, здружениот оркестар, под диригентската палка на мајор Каталин Ион од Вооружените сили на Романија, концертот го започна со свечена фанфара, a продолжи со позната љубовна тема од Романија. Првиот дел беше заокружен со популарен сплет на светски хитови аранжирани за дувачки оркестар и композицијата „Концертна прослава”, со мотиви од романското поднебје.

По него, под раководство на диригентот на Воениот оркестар на Армијата, потполковник Горан Илијевски, следеа блок на нумери од македонското поднебје, во кој беа опфатени фолклорни теми, народни песни, но и незаборавни забавни македонски евергрини.

Во третиот и последен блок, кој беше посветен на армиските припадници кои се секогаш подготвени да ја одбранат татковнината и да им помогнат на нашите сограѓани, покрај светски познати нумери со новогодишна тематика, беше изведена и македонската композицијата „Нашата Армија“, која претставува силен музички омаж на посветеноста и службата кон татковината.

Овој традиционален музички спектакл, покрај претседателката и врховен командант на Вооружените сили Гордана Сиљановска-Давкова, го проследија и министерот за одбрана Владо Мисајловски, началникот на Генералштабот на Армијата генерал-мајор Сашко Лафчиски, министри во Владата, пратеници во Собранието на Република Северна Македонија, претставници на дипломатскиот и воено-дипломатскиот кор акредитирани во Република Северна Македонија, активни и пензионирани генерали на Армијата, припадници на Министерството за одбрана, Генералштабот и командите на Армијата и други гости.

Мотото на традиционалниот предновогодишен концерт е уште еден доказ за сплотеност со сојузниците. Вчерашниот настан, преку хармонијата на звуците и универзалниот јазик на музиката, потенцира дека музиката продолжува да нè обединува и сплотува, ги поврзува луѓето кон заеднички вредности и стремежи и претставува мост помеѓу различни култури и традиции.



