Во петок навечер во галеријата на Центарот за култура „Марко Цепенков“ во Прилеп, беше отворена изложба на слики и цртежи од уметницата Биљана Кајевиќ од Скопје која прилепската публика ќе има можност да ја погледне следните десетина дена

Ова е прва самостојна изложба на Кајевиќ во Прилеп каде ќе се претстави со дваесетина вои дела работени во изминатиот период.„Досегашното творештво на Биљана Кајевиќ претставува едно посветено негување на сопственото сликарско истражување, еден тивок и камерен опус, творечки созреван далеку од очите на јавноста. Се работи за смирен интимистички темперамент, деликатно третирање на цртежот, сигурна цртачка арматура – трпелива преплетеност; една органска сконцентрираност од детални и комплексни ликовни проблеми, со коишто таа си ги гради своите слики и објекти. Нејзиното творештво е посветен простор во однос на евокативното, во однос на емотивното и духовното спознание, коешто во овој пример, во основа, се приближува до поетското. Иако во својата уметност авторката е ’фокусирана’ на фигуративно сликарство, со својата занаетска умешност и природа, авторката не робува на реалитетот и на вулгарната дескрипција. Нејзините сликарски претстави се дотерани, но не и патетично измазнети“, вели меѓу другото за оваа изложба на Кајевиќ, ликовниот критичар Дејан Буѓевац.Откако во 1994 г. дипломира на Факултетот за ликовни уметности во Скопје, во класата на професор Рубенс Корубин. Кајевиќ од 1995 до 1997 г. работи на дизајн на поштенски марки  и разгледници за одделот за филателија при Пошти на Македонија (Марката од серијата Олимписки игри во Атланта се најде во најтесниот избор на 14 марки од 60 земји во светот за наградата Олимпија во организација на МОК и Меѓународната федерација на олимписката филателија). Од 1998 г. работи илустрации за едукативна детска книга за животни по нарачка на дизајн студиото при „Огласник М“  кога учествува со дел од илустрациите на Меѓународниот саем на детска книга во Болоња, Италија 2006. Од 1999 до 2001 г.  работи дизајн нарачки за продукцијата „Трето уво“ продукција, а од 2001 до  2008 г.  работи на илустрации, дизајн на логоа, корпоративен дизајн, дизајн на промотивни и музички CD- а, внатрешен дизајн на ентериери и др. за различни нарачатели. Во меѓувреме се Биљана Кајевиќ се занимава со фотографија (дигитална фотографија и компјутерска манипулација), работи на претставување на избрани работи  од областа на дигиталната фотогрфија во грчкиот часопис за уметност и дизајн Project Amoeba Mag. Од 2009 г.  работи како дел од тимот за внатрешно уредување на Музејот на македонска борба. Кајевиќ е автор на идејно–ликовно решение за централниот  витраж на куполата на Музејот на македонска борба.Претходно Кајевиќ самостојно изложуваше минатата година во Уметничка галерија „Безистен“ во Штип, своите илустрации ги изложи во Кинотека на Македонија во Скопје и се претстави пред кавадаречката публика во Дом на култура „Иван Мазов –Климе“.