Култура
УНЕСКО финансира 100 илјади долари за четири проекти
Четири од деветте проекти со кои Националната комисија на УНЕСКО при Министерството за култура аплицирала во двегодишна Програма за партиципација на УНЕСКО за 2010 и 2011 година, се поддржани со вкупна финансиска поддршка од 97.000 американски долари.
Четири од деветте проекти со кои Националната комисија на УНЕСКО при Министерството за култура аплицирала во двегодишна Програма за партиципација на УНЕСКО за 2010 и 2011 година, се поддржани со вкупна финансиска поддршка од 97.000 американски долари. Јубилејното, 50-то издание на светски реномираната манифестација „Струшки вечери на поезијата“ ќе биде поддржано со 22.000 американски долари. „Оваа одлука беше донесена со гласање на сите 135 членки на УНЕСКО во рамките на 35. Конференција на Генералното собрание на одржана во Париз пред две години.На 31 март годинава во седиштето на УНЕСКО во Париз, во присуство на тричлена делегација на СВП ќе биде промовирано и одбележано годинашното јубилејно издание.Пред претставници на земјите-членки на УНЕСКО, по повод Светскиот ден на поезијата, ќе биде промовиран филм посветен на фестивалот, а ќе биде претставен и годинашниот добитник на Златниот венец – академик Матеа Матевски. Во Париз ќе биде соопштено и името на добитникот на меѓународната награда на УНЕСКО за млад поет,“ изјави министерката за култура Елизабета Канческа- Милевска.Со поддршка на УНЕСКО ќе се реализираат и два проекта од областа на образованието, „Градење на капацитетите на средното образование во областа на влијание на проектите од обновливи извори на енергија врз животната средина и општеството“ поддржан со 26.000 американски долари, и проектот „Слободните ресурси за технолошки поддржано, креативно – учење во основните и средни училишта“ поддржан со 18.000 американски долари. Воедно ќе биде поддржан и проектот кој ја засега науката, “Антропогени ефекти на човечката околина во неогенетските басени во Југоисточна Европа“ за чија реализација се доделени 31.000 американски долари. Од центарот на УНЕСКО го информирале Министерството за култура дека досието за номинација на Кокино ги исполнува сите технички барања содржани во Оперативниот водич и дека е испратено до ИКОМОС за понатамошна евалуација. „Сакам да потсетам дека локалитетот Кокино, на чиј простор се наоѓаат мегалитската опсерваторија со веќе потврдени светски вредности и богато археолошко наоѓалиште со одлука на Владата во 2009 година беше прогласен за споменична целина „Археоастрономски локалитет – Кокино“, и истата година беше впишан на Тентативната листа на УНЕСКО. Оваа одлука на УНЕСКО за нас е стимул дека во иднина постои сериозна можност да добиеме уште едно значајно културно наследство, покрај Охрид и Охридското Езеро, на светската листа на заштитени богатства од страна на УНЕСКО,“ додаде министерката Канческа-МилевскаВо последните три години се реализирани донации од УНЕСКО во износ од 668.680 евра и 316.000 американски долари.крај/сж
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Во Кинотека ќе биде прикажан грчкиот филм „Што ако“
Грчкиот филм „Што ако“ (What If) во режија на Христофорос Папакаљатис, ќе биде прикажан вечер во 20 часот во Кинотека.
Прикажувањето на филмот е дел од тековната серија проекции на грчки филмови на Амбасадата на Грција, со наслов „Ајде да се запознаеме“, иницијатива која има цел да ја приближи публиката до современата грчка кинематографија.
Филмот „Што ако“ е трогателна романтична драма од креаторот на светски признатата серија на „Нетфликс“ – Маестро во сина. Дејството на филмот се одвива во Атина во периодот на економската криза и ја следува приказната на Димитрис, 33-годишен ерген, кој живее навидум обичен живот. Една вечер, кога неговото куче, женка германски овчар со име Лоунсом, го поттикнува да излезе, Димитрис се соочува со клучна одлука: да излезе или да остане дома. Ако излезе, ќе ја запознае Христина, љубовта на својот живот; ако остане дома, ќе ја пропушти шансата да ја сретне. Филмот ги истражува вечните прашања за судбината, вистинската љубов и изборот прикажувајќи го истовремено и влијанието на сериозната економска криза врз луѓето и личните односи. Истата приказна е раскажана од две перспективи.
Влезот за проекцијата во Кинотека е бесплатен по принципот прв дојден – прв услужен. Филмот е наменет за лица над 16 години, информираат од амбасадата.
Култура
Почина Кетрин О’Хара
Почина Кетрин О’Хара, легендарна актерка и ѕвезда на серијата Schitt’s Creek и култните филмови Бубимир и Сам дома. Имала 71 година, а веста ја потврдила нејзината менаџерка, пренесе „Пипл“. Засега не се соопштени дополнителни детали.
О’Хара е родена во Торонто во 1954 година и кариерата ја започнала во легендарниот комичарски театар Second City, а потоа стекнала голема популарност со телевизиската емисија SCTV, за која освоила и награда „Еми“.
Филмската публика ја памети по улогите во Бубимир, Сам дома и Сам дома 2, како и по бројни филмови на режисерот Кристофер Гест. Глобална популарност доживеа со улогата на Моура Роуз во Schitt’s Creek, за која во 2020 година освои „Еми“, „Златен глобус“ и награда SAG.
Последните години гостуваше во серии и филмови, меѓу кои The Last of Us и Argylle.
Зад себе ги остави сопругот Бо Велч и нивните два сина.
Фото: скриншот од филмот „Сам дома“
Култура
Почина поетот и преведувач Тихомир Јанчовски
На 58-годишна возраст денеска во Скопје почина поетот и преведувач Тихомир Јанчовски.
Веста за неговото прерано заминување ја соопшти Друштво на писателите на Македонија, изразувајќи длабоко жалење за загубата на еден од најзначајните современи македонски автори и педагози.
Од Друштвото информираат дека за точниот датум и час за испраќање последен поздрав ќе следи дополнително известување.
Јанчовски беше поет, писател, преведувач, професор, музичар, издавач, автор на над триесет книги, пред сè поезија, преводи и (поетски) романи, како и една книга историја („Историја на православното монаштво на територијата на денешна Република Македонија“, Сигмапрес, Скопје, 2010).
Избори од неговата поезија се преведувани и објавувани во различни литературни списанија, застапен е во голем број антологии, а четири од неговите книги се преведени на други јазици. Преведуван е на англиски, француски, словачки, хрватски, албански, босански, грчки, германски, српски, полски, грузиски, персиски и италијански јазик. Тихомир Јанчовски, со својата автентичност и креативност останува еден од најомилените наставници на повеќе генерации средношколци во гимназијата „Орце Николов“, во меѓународното училиште „Нова“ и во Американската гимназија во Скопје.

