Фестивалот за современ танц „Танц фест“ ќе биде свечено отворен со гостување на Сакапино балетот од Ротердам, во вторник навечер во Македонската опера и балет (МОБ) со почеток во 20 часот

На отворањето, ротердамскиот скапино балет ќе претстави триделна програма „Холанд“, „Браво Чарли“ и „Бесвинг“, а на  проф. Елисавета Кушовска ќе и’ биде доделена наградата „Менада“. Специјална награда „Менада“ ќе му биде доделена и на Самоил Вуерстен, уметнички директор на Холандскиот денс фестивал, за неговата поддршка за отворање на Танцовата академија во Скопје. Наградата ќе му биде врачена на затворањето на Танц-фест во МОБ.Предиграта во која ќе учествуваат повеќе балетски студија е наречена како и мотото на фестивалот „Танцот и ние. А вие?“.„Почестени сме што сме дел од овој фестивал. Ние сме најстарата танцова компанија во Холандија формирана во 1945 г., но сме најмлади во однос на свежината и новината на репертоарот. Програмата утре е вистинска слика на она што сме. Ќе гостуваме со 14 танчери, а нашиот постојан број е 20. Најголем дел од репертоарот е креиран специјално за нашата компанија. Се надеваме дека на вистински начин ќе допреме до публиката Убавината на танцот е во неговото изразување, јазикот е интернационален и исто разбирлив и во Холандија и Македонија“, истакна Ед Вуб уметнички директор на Скапино балет и успешен кореограф.„Јас сум огромен фан на современиот танц затоа што го презентира минатото, но и го отсликува општеството во кое што живееме и ги отвора хоризонтите,“ истакна холандската амбасадорка Симоне Филипини која за овие четири години даде несебична поддршка во развојот на современиот танц во Македонија.„Фестивалот станува еден врвен настан кој го следат европски уметнички директори, новинари и очекувам во тие осум-девет дена колку што ќе трае да биде едно збиралиште на сите кои се заинтересирани да видат што се случува на европската танцова сцена“, рече Рисима Рисимкин, уметнички директор на Танц-фест.На прес-конференцијата присуствуваа и танчерите Бесим Хоти, Ралица Маленовнова и Брендон О’Дил кои го истакнаа задоволството од гостувањето во Македонија и учеството на „Танц фест“. На фестивалот ќе има и повеќе други почесни гости, кореографи и претставници на танцови ансамбли од Европа,  а ќе дојде и претседателот на Меѓународниот комитет за танц (CID) при УНЕСКО, Алкис Рафтис.Во рамки на седмото издение на Танц-фест ќе гостуваат и танцови компании и балети од Загреб, Косово, Санкт Петербург и Балетот од Истанбул кој со класичната хит-претстава  „Дон Кихот“ на 12-ти април во МОБ ќе го затвори годинашниот Танц фест во Скопје. Фестивалот ќе гостува и во Битола, каде што на 13-ти април ќе биде свеченото затворање на манифестацијата со проектот „Меѓусвет“ на студентите од Танцовата академија во Скопје што во рамки на Универзитетот ЕСРА работи од септември.