Култура
„Дон Џовани“ за отворањето на МОВ
Мајските оперски вечери ќе се отворат со премиерата на операта „Дон Џовани“, традиционално на 9 мај, во понеделник со почеток во 20 часот. Режисер на претставата е Лев Пуљиезе од Италија, а со оркестарот на МОБ ќе диригира Оливер Балабурски
Екипата е во интернационален состав, а во улогата на Дон Џовани ќе настапи Валдис Јансонс од Латвија.„ Дон Џовани е комплексна работа и како психолошки карактер се крие во секој од нас. Ова што го правиме овде не се работи само за италијанска опера туку тоа е универзално нешто. Тоа е дел од нашата колективна свест. Се трудиме да го пронајдеме потсвесниот момент во психолошкиот карактер на Дон Џовани. Во текстот ја имаме пораката против насилството, што и Дон Џовани ја репрезентира. За претставата користиме слики од познати мајстори и сето тоа го правиме со цел, да ја покажеме тиранијата за да се отслика психолошкиот момент кај жените. Да ја доловиме скршената љубов на жените и заради тоа крајот на операта го изменивме и завршуваме со смртта на Дон Џовани,“ истакна режисерот Лев Пуљиезе.„Во оваа улога дебитирам и можам да кажам дека почнав да ја подготвувам од нула, почнав од ништо за да создадам еден карактер и лик. Драго ми е што за време на подготовките растевме заедно со музичарите и солистите,“ истакна Валдис Јансонс кој го толкува главниот лик Дон Џовани.Во улогата на Дон Отавио ќе се појави нашиот истакнат тенор Благој Нацоски на кој посебно му се омилени моцартовите арии и ова му е петта продукција во оваа улога.По четири години тој повторно ќе настапи на отворањето на МОВ.„Оваа улога ја толкувам првпат во Македонија, но се работи за претстава која е редовна на мојот репертоар од еден автор кој го негувам. Улогата на Дон Отавио е сосема спротивна од Дон Џовани и од карактерна гледна точка мојот лик не е атрактивен односно е маж кој во реалноста не постои. Но од музичка гледна точка Моцарт во оваа претстава ги напишал едни од најубавите арии за тој лик. Секогаш ми е прекрасно чувството кога го пејам,“ изјави Благој Нацоски.На денешната прес-конференција беа присутни и Хидеказу Цумаја (Јапонија), Марчела Орсати Таламанка (Италија), Катерина Стојановска, Ернес Ибраимовски, Благица Поп-Томова кои го изразија задоволството од соработката со раководството на МОБ, солистите и музичарите. Кореограф на претставата е Олга Панго, костимограф Марија Пупучевска и сценограф Марија Ветероска. Средствата од продадените карти ќе бидат наменети за народот во Јапонија како помош по катастрофалниот земјотрес што ја погоди оваа земја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Кинотеката на Македонија – Половина век филмска меморија
Програмата на Кинотеката на Македонија за јануари 2026 претставува внимателно осмислена и содржински богата целина што уште еднаш ја потврдува улогата на оваа институција како темел на филмската култура, едукацијата и критичката мисла во земјава. Во година во која Кинотеката одбележува значајни педесет години од своето формирање, јануарската програма функционира и како симболичен преглед на нејзината мисија — да го чува, прикажува и контекстуализира филмското наследство, истовремено отворајќи простор за современи авторски гласови и нови генерации гледачи.
Посебно место во програмата заземаат тематските целини КИНО УТРО, со проекции на анимирани филмови наменети за младата публика, чија цел е да ѝ се приближи киното како уметност и искуство уште од најрана возраст. Преку овие проекции, Кинотеката активно ја гради идната публика и ја зацврстува врската помеѓу младите и филмскиот медиум. Во јануарската селекција се вклучени и избрани содржини од фестивалот КИНЕНОВА, кои носат свежи авторски перспективи и современи филмски практики, како и проекции на значајни документарни остварувања, меѓу кои „Југо Флорида“ и „Фанк Ју“, филмови што со ангажиран и аналитичен пристап ги отвораат културните и општествените прашања на регионот.
Особено внимание привлекува и долгоочекуваниот музички документарец „Трет свет“, посветен на култниот хрватски бенд Хаустор, кој преку архивски материјали и сведоштва нуди длабински поглед кон една од највлијателните музички појави на екс-југословенскиот културен простор. Домашната продукција е застапена со проекции на најновите македонски филмови „Утре наутро“, во режија на Јани Бојаџи, и „Сите го викаат Реџо“, копродукција со Косово и Албанија, што сведочи за отвореноста на македонската кинематографија кон регионалната соработка и актуелните тематски предизвици.
Програмата се заокружува со проекцијата на антологиското ремек-дело „Небото над Берлин“ на Вим Вендерс — филм што и по децении останува непресушен извор на инспирација, поетски запис за човечката осаменост, љубовта и духовната потрага по смисла. Неговото прикажување во рамките на јубилејната година на Кинотеката има и дополнителна симболичка тежина, потсетувајќи на континуитетот на филмската уметност и нејзината моќ да опстои над времето.
Половина век по своето основање, Кинотеката на Македонија не е само простор за проекции, туку жив културен организам што активно ја обликува филмската свест, го чува колективното паметење и создава простор за дијалог меѓу минатото, сегашноста и иднината на киното. Јануари 2026 е уште една потврда дека оваа институција останува незаменлив столб на културниот живот и еден од најважните чувари на филмската уметност во земјава, се наведува во соопштението на Кинотеката.
Целосна ПРОГРАМА
Култура
Денеска ќе биде погребана Брижит Бардо
Француската филмска актерка Брижит Бардо, која почина минатиот месец на 91-годишна возраст, денеска ќе биде погребана во летувалиштето Сен Тропе на француската ривиера, објави Ројтерс, повикувајќи се на локалните власти.
Погребната церемонија ќе се одржи во 10 часот во црквата „Нотр Дам де л’Асумпсион“, по што Бардо ќе биде погребана во строга приватност на градските гробишта. Комеморација отворена за граѓаните и обожавателите ќе се одржи во старата градска четврт Ла Понш.
Бардо светската слава ја стекна со филмот „И Бог ја создаде жената“ и стана една од најголемите икони на француската поп-култура. По повлекувањето од филмот во 1973 година, се посвети на заштита на животните, но подоцна беше контроверзна фигура поради своите политички ставови.
Култура
Почина Георги Сталев Поповски
Друштвото на писателите на Македонија информира дека на 30 декември 2025 година, во 95. година од животот, почина Георги Сталев Поповски, поет, прозаист, преведувач, драмски писател, научен работник и поранешен универзитетски професор, доктор по филолошки науки и најстар член на писателската асоцијација.
Георги Сталев Поповски е роден на 22 април 1930 година во Витолиште, а почина во Скопје. Високото образование го завршил на Филозофскиот факултет во Скопје. Во текот на својата богата професионална кариера, меѓу другото, бил и долгогодишен уредник на списанието „Современост“.
Член на Друштво на писателите на Македонија бил од 1956 година, како прв член примен во Друштвото по заслуга на своите достигнувања во областа на книжевниот превод.
Поповски е добитник на бројни признанија и награди, меѓу кои двапати наградата „Димитар Митрев“ на Друштвото на писателите на Македонија за книжевна критика и есеистика, наградата „Златен лавров венец“ за најдобар драмски текст на фестивалот „Мали и експериментални сцени“ во Сараево (1972), наградите „Григор Прличев“ и „Кирил Пејчиновиќ“ за книжевен превод, медалот од Фондот „Лермонтов“ во Москва, како и македонските државни награди „11 Октомври“ и „Св. Климент Охридски“, како и наградата на Град Скопје „13 Ноември“.
Тој останува актуелен и во 2025 година како еден од авторите на збирката раскази Она што се памети живее („Никогаш докрај раскажани приказни“) во издание на ДПМ, во која е застапен со расказот „Доста ми е власт играње“ – сеќавање на неговиот татко, Стале Попов, корифејот на македонскиот роман.

