Култура
Промоција на книгата „Документ 103“ на Тина Иванова
Во четврток (9-ти јуни), во клубот „Ла Кања“ – Стара скопска чаршија, по 20 часот, во рамки на одбележувањето 20 години од постоењето на Музичкото радио Канал 103, ќе се случи промоција на книгата „Документ 103“ – публицистички труд на Тина Иванова, музиколог и новинар
„Документ 103“ е сведоштво: 20 години Стотројка на 200 страници. Оваа книга е првиот отисок на субјективни судови за објективното дведецениско егзистирање на култната скопска Стотројка. За раѓањето, почетоците, неговото зреење. За ѕвездените мигови на Канал 103, за падовите и за новите почетоци. За отпорот, за борбата на стотројкашите и фановите со противниците на радиото, со системот… „Документ 103“ сведочи за турбуленциите и за убавите мигови на ова радио кое, со невиден ентузијазам на сите негови креатори, од идеја прерасна во културно движење. Содржините во овој публицистички труд се сведоштва на авторката како и на многу некогашни и сегашни членови на радиото како: Ангела Јовковска, Александар Станковски, Јован Миовски, Виктор Рубен, Игор Иванов, Горан Путица, Кети Велјановска, Зоја Бузалковска, Јане Миљовски, Пеце Талевски, Диме Игњатов, Љупчо Јолевски и многу други.Дел од воведот на „Документ 103“:„Музичкото радио Канал 103 не е обично радио. Токму спротивното. Тоа е мошне необично за најголемниот дел од „надворешниот свет“. Ова радио е живот за плејада негови соработници и за нивните следбеници, за неверојатно верните слушатели. Радио кое перцепцијата за надворешниот свет ја рефлектира во неговата реална димензија.“Тина Иванова е музиколог и музички критичар. Изминативе 12 години работи како музички новинар во „Утрински весник“, а во последниве пет е уредник на Културната рубрика. Нејзини текстови се објавувани во повеќе македонски списанија. Пред „Утрински весник“ работи во Македонско радио во одделот за класична музика, како и во Музичкото радио Канал 103. „Документ 103“ е самиздат. Рецензенти на книгата се Отец Методиј Златанов и Милован Стефановски. Корицата ја дизајнираше Јана Ацевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Филмот на Цветановски со награда за најдобар филм во Калифорнија
„Бизнисот на задоволството“ на Гоце Цветановски ја доби наградата за најдобар долгометражен филм на „Риверсајд Филм фестивал“ во Калифорнија, САД.
Фестивалот којшто се одржа од 10 до 14 април, во своето 22-годишно постоење се залага за промоција на храбри филмови кои обработуваат општествени предизвици, но и говорат за смелоста на човековиот дух.
Цветановски го радува тоа што филмот по вторпат e наградeн во САД, откако минатиот месец беше прогласен за највпечатлив филм на 30. издание на „Седона интернешнал филм фестивал“ во Аризона.
„Калифорнија е центар на американската филмска индустрија, и секако дека како автор сум горд што добивме награда овде, и тоа во конкуренција со американски филмови со многу поголеми буџети. Едвај чекам да завршиме со оваа светска фестивалска турнеја и во септември да го презентираме пред нашата публика. Очекувам филмот да отвори теми за дискусија на повеќе нивоа, но пред се‘ сакам да го продолжиме трендот од последниве години, во кој на домашните гледачи им се враќа довербата и желбата да гледаат македонски филмови“, рече Цветановски.
„Бизнисот на задоволството“ досега доби осум награди на филмските фестивали низ светот, од кои пет се за најдобар долгометражен филм.
Филмот ја следи приказната на новинарка, која опседната со исчезнувањето на нејзината најдобра пријателка, подготвува тајна операција со цел да разоткрие мрежа за трговија со жени. Но, како што нејзините соучесници се приближуваат до шефот, ситуацијата излегува од контрола.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Филмот е снимен со поддршка на Агенцијата за филм.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.