Пет поети настапија на интернационалната вечер на 23-тата „Поетска ноќ во Велестово“. Во дворот на Домот за култура синоќа прозвучеа стиховите на Сим Кера, Жељко Миловиќ, Елена Рибет, Лука Бенаси и Патрик Котер.

Пет поети настапија на интернационалната вечер на 23-тата „Поетска ноќ во Велестово“. Во дворот на Домот за култура синоќа прозвучеа стиховите на Сим Кера, Жељко Миловиќ, Елена Рибет, Лука Бенаси и Патрик Котер.Интернационалната поетска ноќ во Велестово започна да се одржува од минатата година со наслов „Глобално поетско село“.„Идејата да се одржи интернационално поетско читање во Велестово беше да се поттикне културна размена помеѓу поети и уметници од земјава и од странство, со што во Македонија ќе прострујат новите движења во светската поезија, но од друга страна, впечатокот што со себе ќе го понесат гостите странци назад во своите држави ќе придонесе кон ширење на нашата култура и да отвори нови можности за соработка на полето на литературните преводи и размена на поети за учество на разни поетски фестивали“, изјави Јулијана Величковска, организатор на „Поетска ноќ во Велестово“.Брачната двојка Елена Рибет и Лука Бенаси во Велестово дојде директно од Рим. Бенаси учествувал на Струшките вечери на поезијата пред две години, каде се сретнал со организаторите од Велестово и ја прифатил нивната покана годинава да учествува на поетската ноќ.„Тука навистина се чувствувам како дома, во поетска смисла, но и во однос на дружењето и пријателството со другите поети“, изјави Бенаси.Сосема спонтано почнал да пишува поезија по една прошетка низ Сардинија пред десет години. Тоа што го почувствувал едноставно сакал да го оформи како поетски запис.Поетесата Елена Рибет почнала да пишува поезија од својата осма година, но дури откако се сретнала со Лука почнала својата поезија да ја претставува пред други луѓе. Вели дека има рационален и ирационален момент во пишувањато поезија. Пишувањето некогаш се случува како во транс, додека објавувањето на стиховите е рационалниот дел од процесот. Работи како новинарка и пишува за теми кои се поврзани со дискриминацијата на жените насилството и човековите права.Од Црна Гора во Велестово дојде поетот и новинар Жељко Миловиќ. Вели дека и во Црна Гора состојбата во книжевноста е слична како и во Македонија. Тешко се наоѓаат издавачи, тиражите на книгите се мали и дека недостига заеднички книжевен пазар за балканските држави. За Велестово рече дека е многу слично со неговото родно место Зупци, кое се наоѓа на пет километри од Бар.„Блиску е до морето, а сместено е високо во планината, и тоа го нарекувам „дива убавина“, објасни Миловиќ.Ирскиот поет Патрик Котер истовремено е издавач и организатор на поетски фестивал во неговиот роден град Корк. Со Јулијана Величковска се запознал преку Фејсбук, откако на неговиот фестивал учествувала минатогодишната учесничка во „Поетската ноќ во Велестово“, Марам ал Масри од Сирија. Прв пат е во Македонија и од Велестово ќе продолжи на Струшките вечери на поезијата, кои почнуваат на 25 август. Иако на повеќе полиња е ангажиран во областа на книжевноста, нагласи дека, сепак, и во Ирска тешко се наоѓаат средства за објавување книги со поезија, и дека поетите се повеќе го користат интернетот за своја промоција.Гостин во Велестово е и естонскиот поет Сим Кера. Се занимава со поезија и со пишување музичка критика. Го сака планинарењето и токму затоа му се допаѓа учеството во поетската ноќ во Велестово. Во 2010 учествувал на СВП, а ќе учествува и годинава. Во однос на објавувањето на својата поезија состојбата во Естонија ја спореди со македонската. Станува збор за мала држава, со 1.4 милиони жители и тиражите на книгите се движат до 400 примероци.На интернационалната вечер во Велестово, по поетските читања, настапи групата „Undone“, додека во изложбениот салон беа претставени ракотворбите на Елена Ристовска и Глигор Кузмановски.крај/макфакс/т.д.