На најголемиот Саем на издавачи во светот, што во Франкфурт по 63-ти пат ќе се одржи од 12 до 16 октомври, Македонија ќе се претстави со англиски преводи на повеќе од 130 класични дела од домашната литература, како и низа антологии, збирки и стручни остварувања

На најголемиот Саем на издавачи во светот, што во Франкфурт по 63-ти пат ќе се одржи од 12 до 16 октомври, Македонија ќе се претстави со англиски преводи на повеќе од 130 класични дела од домашната литература, како и низа антологии, збирки и стручни остварувања. “Пиреј“ на Петре М. Андреевски, “Пасквелија“ на Живко Чинго и “Калеш Анѓа“ на Стале Попов се само дел од романите што ќе бидат презентирани пред повеќе од 7.500 издавачи од 110 земји и над 280.000 лица вклучени во бизнисот на објавување и дистрибуција на книги.   „Годинава во Франкфурт Македонија ќе се претстави со повеќе од 600 публикации објавени меѓу двете изданија на Саемот. На Македонскиот ден, што ќе се одржи на 14 октомври, ќе го презентираме капиталниот проект “130 тома македонска книжевност“ на англиски јазик. На листата на дела што ќе ги претставиме ќе бидат и антологиите на современ македонски расказ и современа македонска поезија“, изјави прес-конференцијата Миле Бошески, директор на Националната и универзитетска библиотека на Македонија.Тој додаде и дека од сите досегашни учества на саемот, Македонија годинава за првпат ќе има каталог со информации за 26 издавачи чии дела ќе бидат поставени на штандот.„Освен дела од продукцијата на домашните издавачи, во Франкфурт ќе отпатуваме и со публикации од релевантните македонски институции и институти. Тие што ќе го посетат нашиот штанд ќе имаат можност да видат и неколку книги што содржат фрагменти од македонското историско наследство. Покрај тоа, ќе поставиме и многу информативни материјали, меѓу кои се и новите туристички водичи за Македонија и за Охрид“, рече Бошески.       Поддржана од  Министерството за култура на Република Македонија, Националната библиотека на Македонија е главен организатор и комесар на официјалниот штанд на земјава на манифестацијата што годинава ќе вклучува повеќе од 1.100 настани од светот на издаваштвото. Изминативе неколку години, преку оригинално осмислениот штанд, македонската литература доби вистинска шанса да ги претстави своите адути рамо до рамо со тие од остатокот од светот, а очекувањата се дека оваа традиција ќе продолжи и годинава. Освен за презентација, македонскиот литературен излог ќе послужи за проширување на мрежата на контакти и поставување темели за создавање нови бизнис-релации со најпрестижните европски и светски издавачи.  Саемот на издавачи во Франкфурт свечено ќе биде отворен на 11 октомври, а на церемонијата ќе присуствуваат и д-р Гвидо Вестервеле, министерот за надворешни работи на Германија, како и Олафур Рагнар Гримсон, претседателот на Исланд. Со оваа земја продолжува традицијата на манифестацијата и годинава токму таа е почесен гостин, а нивниот слоган гласи: “Чудесниот Исланд“. Меѓу многубројните гости што го потврдија своето присуство на саемот е и холивудскиот актер Руперт Еверет. Славниот режисер Роланд Емерих, пак, токму на собирот на издавачите ќе го презентира новиот филм “Анонимен“. Историјата на франкфуртскиот саем на издавачи почнува уште во 15 век, кога Јоханес Гутенберг ја измислил печатарската преса на неколку километри од овој германски град. До 17 век Франкфурт ја задржал позицијата на главен европски центар за саеми на издаваштвото, а во 18 век на ова поле почнал да се истакнува и Лајпциг. Во 1949 година, пак, во старата традиција бил внесен нов живот: 205 германски изложувачи се собрале пред црквата “Св. Павле“ и го одржале првиот поствоен книжевен саем. Повеќе од 60 години подоцна, ова е најголемата манифестација од ваков вид и репер за глобални активности на културно поле./крај/со/сн–