На официјалната фејсбук-страница на првиот македонски долгометражен анимиран филм „Јон Вардар против галаксијата“, објавен е нов трејлер.

„Со задоволство ви ја претставуваме американската верзија на новиот трејлер на ‘Јон Вардар против галаксијата’! Благодарност до Давид Мука за нарацијата и до Валентино Скендеровски за снимањето“, пишува во описот на видеото.

„Јон Вардар против галаксијата“ е хумористична приказна за еден натпросечно потпросечен човек, еден нарцисоиден робот и многу вонземјани, кои се на мисија да ја спасат галаксијата од себеси.

Режијата е на Гоце Цветановски, арт-директор е Михајло Димитриевски – Тхе Мичо, а директор на анимација е Димитар Ѓоргиев. Продуценти на филмот се Алан Кастиљо, Ева Конрад, Браќа Калинови и Ладо Шкорин. Во главните улоги настапуваат Жарко Димоски, Дамјан Цветановски и Емилија Мицевска. Другите улоги ги толкуваат Филип Трајковиќ, Тони Денковски, Атанас Атанасовски, Слаѓана Вујошевиќ, Мартин Ѓоргоски, Елена Тарчуговска и Бојана Тосковска.

Филмот е на редовниот репертоар на „Синеплекс“ и „Киноверзум“ во Скопје, Штип и во Велес. Информации за времето на прикажувањaта и во другите градови има на официјалната фејсбук-страница на филмот.

„Прагма продукција“, во копродукција со Македонската опера и Балет, го најавува спектаклот што ќе се одржи во арената „Борис Трајковски“ на 14 март 2025 година.

Еден од најголемите тенори на денешницата, но и врвен диригент, освојувачот на 12 Греми-музички награди, Пласидо Доминго, првпат доаѓа во Скопје со премиерен и ексклузивен концерт на 14 март 2025 година во арената „Борис Трајковски“.

Да се присуствува на оваа музичка магија не е само привилегија, туку и уметнички мевлем за сите сетила.

Пласидо Доминго го заслужи своето место во аналите на операта со ѕвездената кариера, која се протега 50-ина години. Како уметник сам по себе и како член на „Тројцата тенори“, тој стана едно од најпочитуваните имиња во класичната музика освојувајќи безброј признанија, вклучително и 12 Греми-награди. Тој продолжува да ја зацврстува својата репутација до денес пред публиката во целиот свет. И како извонреден пејач и од неодамна и како диригент. Карактеризиран како ренесансен човек од страна на критичарите, награден со почесни титули и престижни награди, Доминго е и претседател на престижниот меѓународен натпревар за пеење „Опералија“, на кој е и основач, со цел да открие и промовира млади таленти.

Неговиот репертоар вклучува повеќе од 150 улоги, достигнување што не го направил ниеден друг артист, со над 4.400 настапи, а потврда за неговиот уметнички статус е фактот што тој е почитуван диригент со повеќе од 600 настапи. Бил почесен уметнички директор на фестивалот со стогодишна традиција, „Арена ди Верона“, како и генерален директор на Операта во Лос Анџелес и Националната опера во Вашингтон.

Заедно со него на сцената во арената „Борис Трајковски“ ќе застанат и Марија Жозе Сири, една од водечките сопрани во светот, има богата дискографија со ЦД и ДВД-снимки. Нејзиниот репертоар опфаќа дела од Белканто до Веризмо, а таа се издвојува како истакната интерпретаторка на најпознатите херојки на Верди и Пучини. Жорди Бернасер, еден од врвните шпански диригенти денес, редовно диригира во најпрестижните традиционални театри и со реномирани оркестри. Тој ја почнал својата кариера како асистент на Зубин Мехта, Жорж Претр и особено на Лорин Маазел.

Невозможно е да се набројат сите брилијантни оперски улоги што Доминго ги остварил во својата извонредна уметничка кариера, која непрекинато трае повеќе од половина век, а за ова неверојатно достигнување бил прославен во оперите во Њујорк, Виена, Верона, Милано и во Буенос Аирес.

Ова е уникатна шанса Македонија, конечно, да биде позиционирана на светската уметничка мапа – момент што не смее да се пропушти!

ПЛАСИДО ДОМИНГО на голем спектакуларен концерт во Скопје во соработка со МОБ!
Запаметете го овој датум – 14 март 2025 година.

Билети преку продажната мрежа на www.kupikarta.com „Розе Веро 2“ и „ЈК травел“ во Бисер.

Линк за билети – https://kupikarta.com/event-details.nspx?eventid=5625

Снимањето на дебитантскиот краткометражен филмот „Мајка“, во режија на Ѓорѓи Лазов, е успешно завршено. Последната клапа падна вчера во општина Кисела Вода завршувајќи го четиридневниот интензивен процес на снимање, кој се одвиваше на неколку локации во Скопје.

„Мајка“ е интимна семејна драма, која ја раскажува приказната за комплексниот однос помеѓу мајка и ќерка. Наративот добива неочекуван пресврт за време на божиќните празници кога мајката објавува оглас во весник барајќи маж со цел повторно да се омажи. Преку емотивна и комична перспектива филмот истражува теми како што се осаменоста, љубовта, почитта и разбирањето во едно семејство.

Во главните улоги се истакнатите актери Наташа Петровиќ и Соња Михајлова, а актерската екипа дополнително ја збогатуваат Слободанка Чичевска, Ивица Димитријевиќ, како и дебитантката Јована Синадиноски, која првпат се појавува на филмската камера.

Продуцент на филмот е Александар Арсовски, директор на фотографија е Никола Марковски, а мајстор на светло е Сашко Стојановски-Меанџи. За костимите се погрижи Жаклина Крстевска, сценограф на филмот е Дејан Ѓошевски, а шминката и фризурата беа во рацете на Стефанија Илиевски, монтажер на филмот ќе биде Димитар Спирковски, а снимател на звук и микс Горазд Радевски.

Режисерот Ѓорѓи Лазов изјави:

„Снимањето на ‘Мајка’ беше неверојатно искуство благодарение на посветената екипа и талентираните актери. Иако беше предизвикувачки да се заврши во краток временски рок, успеавме да ја доловиме емоцијата што ја посакувавме. Очекувам дека оваа приказна ќе допре до срцата на публиката и ќе предизвика емоции и размислувања за односите во едно семејство“.

Филмот е реализиран со финансиска поддршка од Агенцијата за филм на Република Северна Македонија, како и со сопствени инвестиции на продуцентот и продукциската куќа „Скорпион филмс“, но и партерски фирми пријатели од Р. Хрватска, „Волфганг и Доли“ и „Мираж продукција“.

Филмот „Мајка“ е предвиден за премиера во текот на 2025 година.