Во кафулето „Цреша“ денеска (21 септември) ќе се случи скопската промоција на книгата поезија „Креветизам и хоризонтала“ од Пијан Славеј, што е уметничко име на Бранислав Николов, фронтменот на групата „Фолтин“.

На промоцијата закажана со почеток од 19 часот настап ќе има и „Фолтин“, а примероците од збирката ќе бидат достапни по промотивна цена.

Настанот е поддржан од Министерството за култура во рамките на „Нов културен бран“, а книгата „Креветизам и хоризонтала“ е финансиски поддржана од Драги Филевски, Де Ниро.

Дизајнот на корицата е дело на Мирослав Масин.

Во рамките на манифестацијата „Демир Хисар, град на културата, 2018“, в недела, 23 септември, со почеток во 19 часот, ќе биде отворена самостојна изложба на уметникот Перица Георгиев – Пепси.

Изложбата ќе биде поставена во фоајето на Домот на културата во Демир Хисар, а публиката ќе има можност да ја види сè до 1 октомври.

Перица Георгиев – Пепси денес живее и работи во Република Бугарија, а оваа самостојна изложба му е прва по 27 години во Република Македонија.

На изложбата ќе бидат прикажани 20 слики од мал формат, без одредена тематска определба. Експресивни по употребата на боите и апстрактни по содржина, каде што предметното е сведено на асоцијативно препознавање. Некои од изложените дела личат на имагинарни пејзажи од галактичкиот простор, други на пејзажи произлезени од бајките насликани во виолетово и златно, во кои проблеснува нетварната светлина, а трети се движат кон чиста апстрактност. Главното обележје на сликите е нивната трансцедентална природа, кои отсликуваат трансцедентални состојби на свеста, кои уметникот за време на своите медитативни пракси интимно ги доживува и живее, а преку својата уметничка практика ги пренесува пред очите на гледачот, со што индиректно или директно му укажува за еден интимен свет што постои интимно во сите нас, а кој се спознава кога човек место да гледа нанадвор, треба само да се сврти навнатре кон самиот себе.

По денешното отворање на Меѓународниот театарски фестивал „Млад отворен театар“, со филмската пародија „Блокбастер“ во Македонскиот народен театар фестивалот утре продолжува со две претстави во Младинскиот културен центар.т

Со почеток од 20 часот ќе се одигра претставата на Словенско младинско гледалишче „Идиоти“ во киното „Фросина“. Претставата настанува според сценариото на познатиот дански режисер Ларс фон Трир, а го поставува Нина Раиќ, една од најартикулираните театарски гласови на младата генерација, заедно со посветена група театарски работници. Се работи за богат театарски материјал, кој во исто време е и смешен и критичен, луд и промислен, лесен и возбудлив.

Втората претстава за вечерта, која ќе почне во 22 часот во Денсинг-салата е „Има уште“, во продукција на Кунстлерхаус Муузонтурм, Германија. Додека комбинацијата на термини звучи сè уште контрадикторно за повеќето, феминистичкото порно зазема сè поголем простор во изминатите децении. Наместо да ги прифати истите стари стереотипи и сцени, феминистичкото порно цели кон тоа да опише разни луѓе и задоволства. Како што е потврдено од страна на феминистичките работници во порноиндустријата, работата на феминистичкото порно вклучува етика на добри работни навики и услови, почит за изведувачите, стремеж да се портретираат сите изведувачи како имаат моќ во реализација на своите задоволства, како и непостоењето феминистичко претставување, без феминистички услови во продукција на филмовите.

Во склоп на придружната програма во 19 часот ќе биде отворена изложбата „Сценографии 35“ на Крсте С. Џидров, кој е еден од најистакнатите македонски сценографи од поновата генерација. Оваа изложба е резиме – ретроспектива на 35- годишната сценографска кариера на авторот, а на која ќе бидат изложени деведесетина паноа со скици, цртежи и фотографии од претставите. Изложбата воедно претставува јубилејни 35 години од првата изложба на сценографии одржана 1985 година, заедно со Симе Узуновски во истата галерија во МКЦ во рамките на МОТ.

Во рамките на изложбата ќе бидат изложени и петнаесетина оригинални скици-цртежи изработени во комбинирана техника (туш, пастел, акварел).

По претставите, ќе следува диџеј-сет на Соња Исмаил во „МКЦ клуб ресторан“.