Култура
Швајцарска програма за култура на Западен Балкан – десет години во Македонија
Во периодот помеѓу 23 октомври и 24 ноември Швајцарската програма за култура преку неколку настани организирани во соработка со локалните партнери ја одбележува 10-годишнината од своето делување во Македонија.
Во периодот помеѓу 23 октомври и 24 ноември Швајцарската програма за култура преку неколку настани организирани во соработка со локалните партнери ја одбележува 10-годишнината од своето делување во Македонија.Сите настани организирани од Швајцарската програма ќе се одвиваат под заеднички наслов – „Диверзии“ и се од сферата на независната културна сцена.Воедно, преку овие настани се одбележува и затворањето на локалната канцеларија во Скопје и регионализирање на оваа програма преку канцеларијата во Сараево. Швајцарската програма за култура, најпозната под името Про Хелветиа, во изминатите 10 години поддржа вкупно 450 индивидуални проекти преку програмската линија Мали акции и 8 среднорочни проекти, преку програмата Кооперативни проекти. Најголемиот придонес на Швајцарската програма за култура во Македонија е што ја промовираше културата како средство за социјални промени, со акцент на независната сцена, децентрализацијата во културата, мултикултурализмот, развојот на руралната култура, а благодарение на оваа програма во Македонија почнаа да функционираат независните културни простори и организации („Локомотива – Центар за нови иницијативи во уметноста и културата“, „Press to exit project space“, културните центри Точка и Место, Мултимедијалниот центар во Тетово, Македонскиот центар за фотографија, итн.) и преку нив ги популаризираше некои од уметнички форми кои дотогаш не беа доволно застапени кај нас, како современиот танц и документарната фотографија.Програмата на „Диверзии“ започна на 23 октомври во Културниот центар ЦК со регионална конференција која беше дел од проектот „Trans Balkans Express“. До 24 ноември продолжува со неколку проекти како две танцови претстави во рамки на фестивалот „LocoMotion“, музичкиот перформанс на Александар Пејовски „Дискреирање мантра“, 12 ноември, Младински културен центар; промоција на три нови публикации од „Press to exit project space“ во Културниот центар ЦК (14 ноември); групна изложба „Делокализација“ курирана од Фатош Уштек во ЦК; изведба на претставата „Празен град“ во центарот за култура во Гостивар (премиерно беше изведена на „МОТ“) и претставување на фотографскиот проект „Be right back“ на Ѓорги М. Унковски во Мала станица 924 ноември). Во меѓувреме, од 12-14 ноември во Скопје ќе присуствува регионалниот борд од канцеларијата во Сараево на кој ќе бидат договорени следните три регионални проекти помеѓу Македонија, Србија, Албанија, Косово и БиХ. Исто така, регионалната мрежа Крос радио, преку Канал 103 и останатите регионални радио-станици, ќе посвети 4 емисии на Швајцарската програма за култура на Западен Балкан. /крај/форум/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.
Култура
Настап на Дуња Иванова и концерт посветен на Кире Костов во изведба на Биг бендот на фестивалот „Крај Вардарот џез“
Во рамки на втората фестивалска вечер на „Крај Вардарот Џез“, утревечер на 23 април во Македонската филхармонија со почеток во 20 часот на пијано ќе настапи Дуња Иванова.
Нејзиниот концертен настап „Мирисот на липите“ ќе биде проследен со текст и нарација на Тина Иванова. Музичко-поетски проект, кој раскажува приказна за познатите урбани и скриени места на Општина Центар. Липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на Кеј, паркот на Горан Стефановски, кафеаната „Наџак“…
Ќе бидат изведени композицијата „Свита за Скопје“ од македонската композиторка Ана Пандевска, и песната „Ние сме од Скопје“ на Мирко Попов, чиј аранжман за пијано го направи Пандевска. Получасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина која пак, претставува ,,жива“ материја, блиска до човечкото срце.
Минатиот месец за „ПМГ Џез“, како 44 издание, излезе албум во живо, концерт на пијано на Дуња Иванова, кој беше реализиран во рамки на музичката програмата „Крај Вардарот Сесии во Аудиокултура“, која изведе композиции од Ана Пандевска.
Веднаш потоа во 21 часот на истата сцена ќе започне долгоочекуваниот концерт на Биг Бендот со музика од Кире Костов. Концерт посветен на еден од стожерите на современата џез композиција Кире Костов, преку интерпретација на негови избрани дела во современ аранжман од страна на Биг Бендот под диригентската палка на Љупчо Мирковски. Костов е едно од најзначајните имиња во современата џез музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на околу педесетина композиции во оркестарска изведба од областа на џезот и 300 песни во популарната музика и реализатор на сите изданија на Скопскиот фестивал од 1991. Подеднакво значајна ќе биде и изведбата на селектираните дела од Костов на еден од нашите најзначајни оркестарски формации, чија историја датира од далечната 1961 година (Биг Бендот на МРТ), кој во 2013 година се возобновува и продолжува да работи во музичка формација водена од Љупчо Мирковски како диригент.
Фестивалот ќе биде заокружен на 27 април во едукативно културниот центар Лабораториум со концертен настап на „Macedonian Free Society“ и со еден од највозбудливите музички проекти „Поетроника“.
Фестивалот е поддржан од Министерство за култура на Р.С. Македонија и се реализира во соработка со Македонска филхармонија и Лабораториум. Концертот „Мирисот на липите“ се реализира со поддршка на општина Центар.
Книги
МАИ ги додели наградите за изданијата меѓу два Саеми на книга
Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).