„Сфинга на гневот“ е петтиот роман од Жарко Кујунџиски во кој се преплетуваат историјата, митологијата, совремието, мистеријата и трилер елементите.

Лазар Отадески е уредник на издавачка куќа која е пред банкрот. Еден ден го посетува девојка која тврди дека е ѓаволот лично. Таа му носи стара и добросочувана книга со наслов на латински јазик во која се наоѓаат досега неоткриени стихови на Константин Миладинов.

Ден потоа, во Сплит, Хрватска, исчезнува писателот ексклузивец на неговата издавачка куќа. Младиот и надежен автор, Марко Ковачки. Со таинствената книга в раце, Лазар започнува сопствена потрага која го води низ историјата на градовите и која не е само потрага по исчезнатиот писател, туку и по самиот себеси.

Со оваа книга, Кујунџиски, отвора ново поглавје во сопственото творештво но ги предизвикува и каноните на македонската литература.

Министерката за култура, Ирена Стефоска, изврши увид во тековните активности на неколку значајни културни добра во Преспанскиот Регион. Посетата ја започна со црквата „Св. Ѓорѓи“ во Курбиново каде е започната првата фаза од непосредната заштитата на архитектурата на ова непроценливо културно наследство од 12 век.

Како што информираше директорката на НУ Завод за заштита на спомениците на културата и музеј – Битола, Мери Стојанова, веќе се извршени сите подготвителни работи и се реализирани зафатите за превентивна конзервација на ѕидното сликарство, неопходни за започнување на првата фаза од реализацијата на проектот.

Истовремено, Стојанова информираше дека како надлежна установа веќе поднеле инцијатива за прогласување на црквата во Курбиново за културно наследство во опасност. Како што кажа министерката Стефоска, тоа ќе помогне да се мобилизираат сите професионални, материјални и специјалистички ресурси за да се обезбеди трајна заштита на ова културно добро кое по своите вредности е на ранг на најдобрите репрезенти на своето време, со светско значење.

Придружувана од градоначалникот на Ресен , Живко Гошаревски, министерката за култура Ирена Стефоска беше и во Љубојно. Пред училиштето „Димитар Влахов“, во кое пред 75 години се одржал првиот час на македонски јазик во револуционерна Преспа, Стефоска најави дека Министерството за култура се вклучува практично во заживување на ицијативата на Владата на РСМ за формирање на Центар за македонски јазик, токму во ова училиште, изградено пред 113 години.

Со оглед на фактот дека Љубојно, а со тоа и старото училиште, се прогласени за заштитена споменична целина, се работи на преземање на сите неопходни подготвителни работи за заштита и ревитализација на објектот. Во план е изготвување на проект преку кој ќе се изврши конзервација и реставрација на училиштето, кое во иднина ќе прерасне во нов, модерен повеќе-функционален центар.
Во рамки на денешените активности во Преспа, министерката Стефоска го посети споменикот на Преспанскот состанок во Отешево. Овој споменик е изграден во чест на значајните историски настани од 1943 година во пресрет на одржувањето на АСНОМ. Се работи за еден од спомениците од НОБ за кои министерката Стефоска неодамна најави дека ќе ги посети и ќе се заложи за нивна достојна заштита и афирмација. Во таа насока, Општината Ресен, како надлежна за одржување на споменикот, се заложи дека во најкус временски рок ќе ги преземе сите неопходни активности за негово соодветно одржување.

„Антифашизмот е заеднички темел на нашата државност и на заедничка Европа, затоа спомениците од НОБ мора да ги одржиме заради вредностите со кои заслужуваат да растат новите генерации“, порача министерката за култура Ирена Стефоска пред споменикот во Отешево, дело на македонскиот скулптор Јордан Грабулоски, од 1973 година.

Деновиве во издание на „Современост“ излезе од печат првата поетска збирка од Стефан Костоски, „Гирланда“.

Книгата содржи триесетина песни пишувани во раздобје од повеќе години за кои Стефан Марковски пишува:

„Стиховите на Костоски се пијат и допиваат како нивниот последен зрак, како префинето старо вино, кое некогаш ги заплискувало ѕидовите од силно сјаечко шише фрлено на брегот од едно улисовски разбранувано море во кое поетот си ги пушта корабите за да бидат очи на неговото небо додека легнат на грб, ги посматра цветовите, кои во исто време патуваат низ него. (…) Со задоволство и желба за продолжување на творечката одисеја можеме да констатираме дека Костоски како еден од неколкумината млади неоромантични, неосимболични, а истовремено модерни македонски поети во своето деби успеал да ги амалгамира ваквите прекршувања, но и премини во елегантен и стилизиран, метафизички поетски дискурс втемелен на идејата за совршеноста и светоста на причинско-последичната врска за постоењето и функцијата на секој (светло)збор“.

Стефан Костоски е роден на 12 јуни 1991 во Охрид. Завршил основно и средно стручно економско училиште во Охрид, а дипломирал на Филолошкиот факултет „Блаже Конески“ во Скопје на катедрата за општа и компаративна книжевност.

Досега поезија и литературни есеи објавувал во периодични списанија. Тој е еден од десетте финалисти на меѓународниот поетски фестивал „Слово 21“ во Гостивар.