Книги
Објавена книгата „Тврдина“ на Сашо Огненовски

Друштвото за издавачка дејност „Македоника литера“ од Скопје, неодамна ја објави книгата „Тврдина“ на Сашо Огненовски, која содржи два драмски текста: „Тага“ и „Тврдина“.
Во книгата е објавен и поговор од академик Владимир Костов, кој, меѓу другото, за пиесите на Сашо Огненоски пишува:
„Двете пиеси во ова книга на актерот Сашо Огненовски, кој од неодамна е и драмски автор, носат едно ново театар¬ско возбудување, еден стил кој е интересен и загадочен, теми кои постојано загатнуваат нови прашања и доста комплексни ликови кои носат компактни и органични дејствија. И двете пиеси („Тага“ и „Тврдина“) имаат сосема различен третман на проблематиката со која се занимаваат. Едната од нив е конципирана на принципот на фрагментарна драматургија, но во една сосема нова констелација, а другата се покорува на стариот принцип на единство на местото и времето и е врамена во класични чинови.“
Сашо Огненовски (1964, Битола) е актер, режисер и писа¬тел. Во 1987 година дипломирал на Факултетот за драмски уметности во Скопје. Одиграл повеќе од сто улоги на сцената на Народниот театар од Битола. Во 2002 година магистрира на тема од областа на комуникациите и медиумите на Институтот за социолошки и политичко-правни истражувања во Скопје.
Автор е на книгите: Лавина (1995), Плодовите на пеколот, (2014), Пустински цвет, (2015), поетски збирки, Обична бајка (2002) и Волшебниот компас (2011), пиеси за деца, Тага (2012), драма, монографијата за актерот Ацо Ѓорчев (2010), како и научната книга Режисерската семантика на Владимир Милчин (2002). Покрај актерскиот ангажман работел и како стручен соработник и професор на Педагошкиот факултет во Битола и на Интернационалниот Славјански институт како професор по Сценски говор. Имал неколку студиски престои во странство, меѓу кои и оние на Универзитетот Јорк во Торонто, Канада и на Универзитетот Сантијаго де Компостела во Шпанија. Учест¬ву¬вал на низа конференции од областа на комуникологијата и медиумите во Гетеборг, Осло, Лондон, Софија итн. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Книги
Промоција на книгите „Историја на човештвото“ од Џани Родари и „Визуализација на современата македонска книжевност“ од група автори

На 29 април во 18 часот во Студентскиот културен центар ќе се одржи промоција на книгите „Историја на човештвото“ од Џани Родари и „Визуализација на современата македонска книжевност“ од група автори.
Двете изданија се резултат на соработката меѓу студентите и наставниот и соработничкиот кадар од Факултетот за ликовни уметности, Филолошкиот факултет „Блаже Конески“ и Машинскиот факултет при Универзитетот „Св. Кирил и Методиј“ во Скопје.
Издавањето на книгите е поддржано од Инситутот „Данте Алигиери“ во Скопје, Здружението Данте Алигиери во Рим и Министерството за култура и туризам.
Книги
Книгата „Мајсторот“ од Димитар Башевски објавена во Софија

Во издание на издавачката куќа „Изида“ од Софија, деновиве е објавена книгата раскази мајсторот од Димитар Башевски. Тоа е трета книга од Башевски објавена во Бугарија. Претходно објавени се неговите романи „Бунар“ и „Круг“. Преводот на книгата „Мајсторот“ од македонски на бугарски јазик е на Тања Попова.
Во текстот кон објавената книга се вели дека „Димитар Башевски го води читателот на книжевно патување низ длабоките слоеви на човечките емоции и вечните потраги. Со екстремна леснотија и чувство за јазични нијанси, авторот слика живописни слики на љубов, страст и копнеж кои се испреплетени со огромните прашања за смислата на животот и човечкото место во светот“.
Димитар Башевски е автор на дваесеттина книги проза и поезија. Добитник е на највисоките книжевни и општествени награди во земјата. Неговите книги се преведувани и објавувани на повеќе европски јазици.
Книги
МАИ ги додели наградите за изданијата меѓу два Саеми на книга

Комисијата за доделување на наградите на Македонската асоцијација на издавачи за периодот меѓу два саема, по разгледувањето на апликациите и на примероците од книгите доставени од издавачите, на состанокот на 15.04.2024 г. донесе одлуки за доделување на наградите на МАИ меѓу двата саема во мај 2023 и април 2024 година.
Признание за најдобра едиција, при што основен критериум бил уредничкиот пристап, концептот на едицијата и унифицираниот изглед/дизајн, со 1. место наградена е едицијата „ПРОаЗА“ („Или-или“), со 2. место едицијата „Бранови“ („Антолог“) и со 3. место едицијата „Современи класици“ („Арс ламина“).
Признание за најдобар оригинален дизајн на корица добија „Не кажувам“ од Петар Андоновски, дизајнирана од Марко Трпески („Полица“), „Базирано врз речиси вистинити настани“ од Ѕвездан Георгиевски, дизајнирана од Наталија Лукомска („Бегемот“) и „Кабинет на чуда со ѕидови од огледала“ од Владимир Јанковски, дизајнирана од Марко Трпески („Антолог“).
Признание за најдобро ликовно-графички уредено издание добија „Варшава го исцртува Скопје“ од Кинга Нетман-Мултановска; автор на дизајнот: Петер Личковски („Бегемот“), „Костимот во Македонија од појавата на фотографијата до денес“ од Зорка Тодорова Младеновиќ; графичко уредување на „Арс ламина“ и „Гени, мени, сени“ од Владимир Лукаш (текст и илустрации), со графичко уредување на „Супрема“.
Признание за оригинални целосно илустрирани книги за деца (сликовници) добија „Си беше еднаш – Најубавите бајки на сите времиња“ (прир. Оливера Ќорвезироска, со илустрации на Наталија Лукомска) („Арс ламина “), „Момчето од зборови / Девојчето од ноти“ од Катерина Николовска („Чудна шума“) и „Рокчето“ од Никола Маџиров, со илустрации на Анета Илиевска („Арс ламина“).
Во категоријата најкреативно издание каде влегуваат оригинални изданија за возрасни или за деца, кои се издвојуваат по својата нестандардност, признанија добија „Момчето од зборови / Девојчето од ноти“ од Катерина Николовска („Чудна шума“), „Шарени ириси“ од Јована Матевска Атанасова, со илустрации на Симонида Филипова Китановска („Арс ламина“) и „Мојата прва библиотека“ од Деспина Мукоска („Арс ламина“).
Признанието за автор на годината го доби Лидија Димковска („Три“).