Култура
Mакедонскиот филм „Ќе му се јавам на татко ти“ во селекција на „Сараево филм фестивал“

Македонскиот краткометражен филм „Ќе му се јавам на татко ти“, во режија на Леон Ристов, е дел од селекцијата на годинешното издание на „Сараево филм фестивал“ и воедно ја има својата светска премиера.
Филмот, кој е е по сценарио и режија на Леон Ристов и во продукција на „Џолев и уметностите“, ќе биде прикажан утре во рамките на фестивалот, кој годинава се одржува онлајн.
Филмот го следи средношколецот Дамјан (Александар Андоновски), кој го среќаваме претепан од страна на маалски врсници. По дознавање на околностите, мајка му на Дамјан (Николина Кујача) е убедена дека проблемот нема цивилизирано решение. Таа му јавува на својот поранешен сопруг (Оливер Митковски) да се справи со ситуацијата.
Филмот ќе биде дел од селекцијата Teen Arena, која прикажува филмови што го испитуваат односот помеѓу тинејџерите и светот. Првпат во историјата „Сараево филм фестивал“ ќе се одвива комплетно виртуелно. Со почеток в сабота (15 август), па сè до крајот на фестивалот (22 август), „Ќе му се јавам на татко ти“ ќе биде достапен за онлајн-изнајмување на веб-страницата ondemand.sff.ba од секаде во светот.
„Идејата за филмот ја добив додека бев во првата година од филмските студии на Wesleyan University во САД, каде што студирам со целосна стипендија веќе три години. Дознав дека кариерниот центар при Wesleyan нуди летни грантови за искуства што би го унапредиле професионалниот развој на студентите. Оттука, решив да аплицирам за овој грант со филмот и успеав да го добијам. Скромната сума ја посветив на повратен лет и квалитетна опрема. Снимавме три дена во населбата Аеродром и во симпатично уредениот стан на мојата баба. Најдрага ми беше довербата од страна на искусни професионалци, како што се актерите Николина Кујача и Оливер Митковски и директорот на фотографија, Владимир Димоски. Со нив се запознав првпат со тоа што им го испратив сценариото за проектот. Фактот дека ја прифатија соработката со мене ми потврди дека имаме шанса да создадеме квалитетен филм“, изјави Ристов.

Леон Ристов – режисер на филмот „Ќе му се јавам на татко ти“
Ристов e студент во четврта година на Колеџот за филмски студии при Wesleyan University (Веслијан) во Конектикат, САД, шесторангиран на листата најдобри филмски факултети во САД од Hollywood Reporter. Тој е режисер и сценарист на два краткометражни играни филма, актер во повеќе филмски и театарски проекти, меѓу кои ја играше главната улога (ликот на Милан) во долгометражниот игран филм „Кога денот немаше име“, во режија на Теона Митевска, филм што светската премиера ја имаше на „Берлин филм фестивал“. „Ќе му се јавам на татко ти“ е неговиот втор краткометражен филм, кој по домашната премиера на Beach Film Festival Ohrid, ќе ја доживее својата светска премиера на престижниот Sarajevo Film Festival.
„Ќе му се јавам на татко ти“ е независна филмска продукција. Проектот е целосно финансиран од странана Wesleyan Summer Grants, во продукција на „Џолев и уметностите“, со постпродукциска поддршка од Machina Production Skopje.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.
Култура
Во Москва излезе „Пиреj“ од Петре М. Андреевски

Романот „Пиреj“ излезе од печат во Москва на инициjатива на Олга Панкина, познат популаризатор на македонските културни вредности во Русија. Таа го преведе уште во 2008 година, го обjави издавачката куќа „Феникс“, Скопjе. Како што обjаснува Панкина, романот на руски веднаш предизвика интерес каj публиката, но сепак книгата не можеше да допре до широк круг рускоjазични читатели. Сметаjќи го романот на основоположникот на современата македонска проза Петре М. Андреевски за ремек дело, таа си постави за задача да го преобjави во Москва.
Оваа година идеjата jа поддржа Центарот за книга „Рудомино“ со коj Олга Панкина плодно соработува веќе петнаесет години (Центарот за книга има обjавено творби на над 20 македонски автори).
Ова издание на „Пиреj“ е многу квалитетно (368 страни, тврд повез) и изгледа современо. На корицата има фрагмент од сликата „Стара куќа“ на Олга Панкина. Блескав предговор за книгата напиша Венко Андоновски, коj даде за руска читателска публика основни информации за историјата која е заднина на личната драма на едно македонско семејство од почетокот на ХХ век, семејството на Јон и Велика, jа подвлече актуелноста на романот и го нарече како најголем македонски бестселер на сите времиња.
Тукушто обjавениот роман веќе заживее своj книжевен живот – почна да стекнува читатели. Минатата недела, од 3 до 7 jуни, беше презентиран на Саемот на книга на Црвениот плоштад во Москва на штандот на издавачот Центар за книга „Рудомино“.