В понеделник, со почеток во 20 часот во Камерната сала на Филхармонија ќе настапи „Ченг дуо“ во кое свират Брајан Ченг (виолончело) и Силви Ченг (пијано). На програмата се дела од Дебиси, Равел, Де Фаља, Цинцадзе и Шостакович.

Оваа сестринско-братска врска ги освојува слушателите со својата страсна експресивност и ретка способност да воспостави блиска врска со публиката. Критичарите ги опишуваат нивните настапи како „блескави“ (The Sunday Times, Велика Британија), „вистински возбудливи“ (The WholeNote, Канада) и „апсолутно зачудувачки… со огромно владеење на инструментите“ (Pizzicato Magazine, Луксембург). Челистот Брајан Ченг, добитник на Наградата Virginia Parker на Канадскиот уметнички совет (2023) и Prix Yves Paternot на Фестивалот Вербие (2022) и пијанистката Силви Ченг, резидентен музичар на Cecilia Concerts (2022/23) и национален уметнички стипендист на National Arts Club, свират заедно речиси целиот свој живот. По нивното официјално деби како Cheng² Duo во Карнеги Хол (Weill Recital Hall) во 2011 година, нивната уметност остави траен впечаток ширум светот, со обемни турнеи низ Северна Америка, Европа, Азија и Јужна Африка. Брајан и Силви Ченг денес стојат во првите редови на креативното музицирање. Посветени се на традиционалните ремек-дела, повторното откривање на заборавени дела, како и на промоцијата на современата музика. Од 2013 година, тие имаат нарачано и аранжирано 15 нови дела, како и реализирано концерти што ги спојуваат класичната и современата музика со џез, поезија и визуелни/медиумски уметности.

Дуото има издадено четири албуми со одлични критики, од кои најновиот, Portrait (Centrediscs, 2023), е номиниран за JUNO награда во 2024 година, во категоријата „Класичен албум на годината – Мал ансамбл“.

Родени се во Отава и Токио од кинески родители, а Брајан и Силви се горди Канаѓани кои моментално живеат во Берлин и во Њујорк.

Во Македонскиот народен театар почнаа пробите за претставата со работен наслов „Кататонија“, по мотиви на драмскиот текст на Алис Бирч, во режија на Васил Христов и драматург Викторија Рангелова-Петровска.

Според режисерот Христов, претстои интензивен и динамичен процес, во кој преку драмскиот материјал што се обработува се отвораат повеќе горливи прашања за нашето современо општество.

Поигрувањето со драмската форма, драмската структура и специфичниот наратив, каректеристични за авторката Алис Бирч, ќе се применува и во адаптацијата на драмскиот материјал. Претставата се работи во копродукција на Македонскиот народен театар и Вондерленд театар – Скопје.

Во претставата играат: Игор Ангелов, Сања Арсовска, Верица Недеска, Дениз Абдула, Владимир Петровиќ, Јасмина Василева, Јасмина Билаловиќ и Ања Митиќ.

Како костимограф се потпишува Роза Трајческа-Ристовска, сценографското решение е на Васил Христов. Инспициент на проектот е Саво Ивановски. Премиерната изведба на претставата е предвидена за почетокот на јуни 2025 година.

Во просториите на Завичајниот музеј „Жарково“ – Музеј на град Белград синоќа беше свечено отворена изложбата на слики од реномираниот македонски уметник Тодор Јовановски, со што официјално почна годинешната традиционална манифестација „Денови на македонската култура во Белград“, со наслов „Допир на Македонија“. Манифестацијата се одржува 14-ти пат во организација на Здружението „Македониум“, а под покровителство на Националниот совет на македонското национално малцинство и Министерството за култура на Република Србија.

Изложбата на Јовановски, кој со своето уметничко творештво пренесува длабоки културни и емотивни релации со Македонија, оваа година доби и хуманитарен карактер. Уметникот ја донираше својата слика „Виолинистка“ (масло на платно, 70 x 50 см, 2016), со цел приходот од продажбата да биде наменет за помош на семејствата на пациенти од Кочани кои се лекуваат во Белград. Аукцијата е отворена до 29 мај, а на затворањето на изложбата на 30 мај ќе виде врачена на купувачот.

Манифестацијата ја отвори претседателката на Македонскиот национален совет, Зорица Митровиќ, додека за творештвото на Јовановски говореше историчарот на уметноста, Здравко Вучетиќ.

Програмата на манифестацијата продолжува со следните настани:

9 мај, Академија 28 – Јубилеен концерт по повод 10 години од основањето на ансамблот „Македониум“, со учество на гости од Културно уметничкото друштво „Колан“, пејачките групи „Срма“ и „Луњина“, како и хорот на ОУ „Доситеј Обрадовиќ“ од Умка. И овој настан е од хуманитарен карактер, а доброволниот билет чини 300 динари и ќе се користи за поддршка на повредените од Кочани.

15 мај, Театар 78 – Изведба на претставата „Земјата на штрковите“ од театарот „Провокација“ од Скопје, со почеток во 19:30 часот. Претставата потоа ќе биде играна и во Јабука 16 мај, и Вршац 17 мај.

22 мај, Градска библиотека Белград – Свечена академија по повод празникот на светите браќа Св. Кирил и Методиј, со гостување на Симона Груевска Маџоска од Институтот за македонски јазик од Скопје.

28 мај, куќа на Ѓуро Јакшиќ – Поетска вечер и портрет на поетесата Емилија Тодорова од Австралија.

2 и 3 јуни, кино сала на Етнографскиот музеј – Филмска ревија на македонскиот режисер Љубиша Георгиевски, со избрани дела од неговиот опус, во соработка со македонската кинотека.