Македонија
Агелер: Ако тешките одлуки не ги направите до декември, луѓе во Белата куќа ќе прашуваат колку сте посветени за ЕУ

Амбасадорката на САД, Анџела Агелер денес кажа дека е јасна поракатата што ја испрати американскиот сенатор Крис Марфи дека тешките одлуки за напредување во евро-атлантските интеграции треба да се направат до крајот на годинава.
„Ако тешките одлуки за напредување во евро-атлантските интеграции не се направат до крајот на годинава, ќе има луѓе во САД, во Белата куќа, кои ќе се прашуваат колкава е посветеноста на вашата земја во однос на европскиот пат“, рече Агелер и додаде дека нема потреба од толкување на неговата изјава – сенаторот бил јасен.
Агелер заедно со министерката за одбрана Славјанка Петровска беше во Кавадарци на отворениот ден организиран во рамките на вежбата „Брз одговор 23“.
Пред два дена, на заедничка прес конференција со премиерот Димитар Ковачевски, сенаторот Крис Марфи ги нарече технички уставните измени кои треба да се донесат за членство во Европската Унија. Тој од говорницата во Владата по средбата со премиерот Димитар Ковачевски кажа дека САД ќе продолжи да ја поддржува Македонија и во случај да не бидат усвоени уставните измени но нагласи дека таквата одлука ќе ги загрижи членките на НАТО.
Холандскиот амбасадор во земјава, Дирк Јан Коп, денес во интервју за Радио Слободна Европа изјави дека ако Уставот се смени, тогаш втората фаза од преговорите е автоматска и не може да има ново вето. Според него, ако не ги поддржи уставните измени ВМРО-ДПМНЕ ризикува да биде одложено членството во ЕУ за најмалку три до четири години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во повеќе градови почнува бесплатен скрининг за детектирање на болести на црниот дроб

Министерството за здравство, заедно со Хепар Центар-Битола и клиниките за гастроентерохепатологија и инфективни болести, по повод Светски ден за борба против хепатитисот, почнуваат заедничка национална кампања за бесплатен и анонимен скрининг за хепатитис Б, хепатитис Ц и ХИВ, како и еластографија за хронични црнодробни заболувања.
По тој повод, денеска од 10 до 13:00 часот ќе биде поставена мобилна единица на плоштад „Македонија“ во Скопје од каде почнува бесплатниот и анонимен скрининг за навремено детектирање на болести на црн дроб.
Националната кампања ќе се реализира во 10 градови во државата.
Целта е подигнување на свесноста за црнодробните болести, како што се црнодробен карцином, замастување на црниот дроб од алкохолна и неалкохолна природа, цироза и ретки болести на црн дроб.
СПИСОК НА ГРАДОВИ КАДЕ ЌЕ СЕ ВРШИ БЕСПЛАТЕН СКРИНИНГ
28 јули | Скопје: 10:00–13:00 / Куманово: 18:00–20:30
30 јули | Тетово: 10:00–12:30 / Гостивар: 18:00–20:30
01 август | Струга: 10:00–12:30 / Охрид: 18:00–20:30
04 август | Битола: 10:00–12:30 / Прилеп: 18:00–20:30
06 август | Штип: 10:00–12:30 / Гевгелија: 18:00–20:30
Македонија
Од утре изменет сообраќаен режим на мостот „Влајко“

Општина Карпош ја информира јавноста дека утре, вторник (29.07.2025) година со почеток во 07:30 часот ќе започнат работните активности за статичко испитување на надземниот премин „Влајко“ (во населбата Влае). Поради изведување на стручните мерења, ги известуваме сите граѓани дека ќе биде воведена времена измена на сообраќајниот режим, која ќе се реализира во две фази.
Имено, во првата фаза се предвидува затворање на дел од сообраќајницата, односно булеварот „Партизански одреди“, по принципот лента по лента, во насока исток – запад, поточно во правец кон населбата Ѓорче Петров. По завршување на првата фаза, ќе следи затворање на сообраќајот во насока запад – исток, (кон Центар), исто така по принципот лента по лента.
Во оваа пригода локалната самоуправа посочува дека во текот на изведување на работите, сообраќајот на тој потег ќе се одвива непречено, согласно сообраќајната сигнализација и опремата која ќе биде времено поставената, на која ќе биде означено прописно ограничување на брзината на движење од 30 km/h. Се предвидува овие активности да се одвиваат во период од седум работни дена, а по нивното завршување да биде воспоставен првобитниот режим на сообраќај.
Општина Карпош апелира до сите учесници во сообраќајот да го почитуваат и да се прилагодат кон времениот сообраќаен режим, за што однапред им благодари на разбирањето и соработката.
Македонија
АМСМ: Зголемена фреквенција на возила, но на граничните премини без гужви

Сообраќајот на државните патишта утрово се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е умерен. Поради летните одмори се бележи зголемена фреквенција на возила, но на граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.