Македонија
„Ако има корумпирани судии во Врховниот суд, тогаш можете да замислете како е во другите“, рече Мицкоски

„Што се однесува до лицето Блерим Рамадани можам да го кажам следново: ова не е прв случај, првиот случај се случил во 2016 година, а вториот случај во 2019 година. Ова е трет случај за кој што јас сум запознаен. Ме прашавте дали имам информација каде е? Знам каде е, а каде не е, не е во домашен притвор. Е сега прашањето е зошто е одлучено да биде во домашен притвор? Затоа што одлуката во 2019 година на Врховниот суд е многу јасна. Кога тогашното лице кое што било во екстрадициски притвор е ослободено. Повторувам, е ослободено. Зошто овој судија кој што во минатото е познат по многу контроверзни судски одлуки меѓу кои и онаа за насилниците и тепачите од „М-НАВ“ носи одлука која што го суспендира судското, како тоа е наречено, судската пракса и ја над синхронизира одлуката на повисок суд, а тоа е Врховниот суд. Тоа е прашање кое што треба многу озбилно да се разгледува“, истакна претседателот на Владата на Република Северна Македонија, Христијан Мицкоски одговарајќи на новинарско прашање и додаде:
„Зошто ова прерасна во политичка тема е исто така прашање кое што треба да се разгледува и многу озбилно да се анализира и уште една потврда дека правосудниот систем во Македонија не за бадијала ужива 2 проценти доверба кај граѓаните. И се додека вакви судии се дел од правосудниот систем ние не можеме да имаме правна држава, а ако немаме правна држава, нема да имаме силна економија, ако немаме силна економија ќе нема пари во Буџетот за вакви проекти. Ова не требаше да биде тема“, изјави премиерот.
Премиерот Мицкоски упати и апел до сите граѓани да не дозволиме нашите соседи да ја користат нашата држава како прокси во покажување меѓусебни мускули.
„Јасна е судската пракса. Дали нас ни се допаѓа или не тоа е друга тема. Но Врховниот суд во 2019 година има донесено одлука со која што тогашното лице кое што е заробено како резултат на меѓународна потерница од Србија во екстрадиционен притвор е ослободено. Зошто овој судија прави ваква судска гимнастика и инженеринг тоа е веќе друга анализа јас нема да ја коментирам. Има институција која сѐ уште е важечка се вика Судски Совет , а за кој знаете со какви контроверзии беше пропратен изминативе години, нека се занимаваат тие. Јас сум политичар иако сум и научен работник, професор на универзитетот, но сега сум политичар и немам право да коментирам судски одлуки. Ве молам да не дозволиме, повторно апелирам, нашите соседи да покажуваат мускули кај нас. Инаку јас пред никого не поднесувам објаснување. Можеби еден ден пред еден кој што никој не го гледа“ објасни тој.
Во однос на прашањето дали постои задоволство од казните за спогодба на Иџет Мехмети и Наќе Георгиев. Премиерот Мискоски изрази задоволство што тогаш во техничката Влада, Министерството за внатрешни работи спроведе перфектна акција кога за првпат на дело покажаа дека имаме корумпирани судии во највисокото тело, тоа е Врховниот суд.
„И ако вие имате корумпирани судии коишто се во највисокото тело, а тоа е Врховниот суд, тогаш можете да си замислите што се случува надоле. Понатаму, во истрагата се потврди дека не бил сам врховниот судија туку и лицето за кое исто така постои спогодба со обвинителството а тоа е Иџет Мехмети, ако не се лажам како претседател на Советот на јавни обвинители, ако не се лажам. Така што тука е јасна спрегата меѓу судско-обвинителскиот систем кај нас и затоа довербата ни е 2 проценти. Затоа што едни тефтерчиња од едно минато се заменија од други тефтерчиња само овие се од Струмица, Бихаќка и од Речица. И се додека имаме тефтерчиња и се додека не се распуштат овие луѓе нема да имаме правна држава. Ќе повторам, ако нема правна држава нема пари во Буџетот, ако нема пари во Буџет нема вакви проекти“ дециден е премиерот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Родителите на жртвите од „Пулс“: Привремено се прекинуваат блокадите, маршевите продолжуваат секоја сабота

Семејствата на трагично починатите деца во пожарот во дискотеката „Пулс“ во Кочани информираа дека по добивањето на датумот за почеток на судскиот процес, секојдневните блокади ќе бидат привремено прекинати, но маршевите ќе продолжат секоја сабота – како симбол на нивната упорност и борба за вистината.
Претходно беше соопштено дека главната расправа за предметот е закажана за 19 ноември 2025 година.
„Ние, родителите и семејствата на починатите деца, со големо внимание ќе го следиме судскиот процес, со единствена цел – да се открие вистината и да се обезбеди правдата за младите животи што беа изгубени во трагедијата што засекогаш го промени нашето општество,“ се наведува во соопштението.
Родителите очекуваат фер, транспарентен и непристрасен процес, во кој секој што има одговорност ќе ја понесе.
„Нашата болка е вечна, но нашата борба е и за сите идни генерации – никогаш повеќе да не се повтори ваква трагедија,“ додаваат тие.
Во изјавата се упатува и повик до јавноста, медиумите и институциите да го следат процесот со должно внимание, бидејќи, како што се наведува, „ова не е само судење за еден пожар – ова е судење за човечноста, совеста и одговорноста.“
Македонија
Царина и Централен регистар договорија е-размена на податоци за царински долг – хартиените потврди наскоро заминуваат во историјата

Царинската управа и Централниот регистар договорија дигитална размена на податоци за царински долг, со што хартиените потврди кои се потребни за упис и промени на правниот субјект наскоро стануваат минато.
Директорот на Царинска управа, Бобан Николовски и директорката на Централен регистар, Анита Стамнова, денеска официјално го потпишаа Договорот за соработка и размена на документи во електронска форма.
„Намалувањето на бирократските процедури и зголемувањето на ефикасноста на администрацијата преку поедноставување и забрзување на постапките е едно од нашите ветувања пред јавноста. Ова е само еден од чекорите кои ги преземаме во таа насока. Годишно досега се издаваа од седум до девет илјади потврди во хартиена форма, за што фирмите и граѓаните чекаа и по неколку дена. Во изминатите месеци, заедно со Централниот регистар интензивно работевме на дигитално поврзување на системите. Од почетокот на следниот месец, потврдите за царински долг Централниот регистар ќе ги добива автоматски, преку системот за интероперабилност – со само еден клик од Царинската управа “, вели директорот Бобан Николовски.
Николовски додава дека ова претставува уште еден важен чекор кон создавање подобра деловна клима и современи услови за водење бизнис.
Директорката на Централниот регистар, Стамнова, вели дека со овој начин на поврзување преку интероперабилност ќе се олеснат бизнис процедурите, а ќе се зголеми ефикасноста при обезбедување на неопходните документи при уписите на правните субјекти.
Македонија
Граѓанските организации алармираат: кога се штеди на превенција, последиците ги чувствуваат жените и ранливите групи

Граѓанските организации и институциите од здравствениот сектор отворија јавен дијалог за унапредување на пристапот до квалитетни превентивни здравствени услуги за жените, девојките и ранливите групи, на тематскиот форум „Кога се штеди на превенција, последиците се скапи“ одржан на 15.10.2025 година.
Главните заклучоци од дискусијата се дека неопходно е вклучување на граѓаните и граѓанските организации во планирањето и спроведувањето на превентивните програми, препознавање на граѓанските организации како даватели на превентивни здравствени услуги, потребно е зголемување на буџетите за превенција, како и зајакнување на свеста на граѓаните за нивното право на превентивна здравствена заштита.
На форумската дискусија граѓани и претставници на граѓански организации споделија лични сведоштва за пристапот до програмата за скрининг на рак на грлото на матката и до гинеколошки услуги во руралните средини, предизвиците на младите во сексуалното и репродуктивното здравје, искуства со Програмата за здравствена заштита на мајките и децата, како и состојбите со превенцијата од ХИВ. Форумот обезбеди двонасочна дискусија, на која учествуваа и претставници на Министерството за здравство, Институтот за јавно здравје и Меѓупартиската парламентарна група за ХИВ и СРЗ.
Настанот се одржа како дел од проектот „Унапредување на здравствените права на жените, девојките и ранливите групи“, во чии рамки, во изминатиот период се изврши мониторинг анализа на четири програми за превентивна здравствена заштита.
КЛУЧНИ НАОДИ ОД АНАЛИЗИТЕ
Превенција од ХИВ – Во споредба со 2021 година, буџетот за превенција е намален за околу 70%, што резултира со 50% помал опфат. Здруженијата откриваат еден ХИВ случај на 150 теста, додека здравствените установи еден случај на 1150 теста, што укажува дека за рано откривање критични се заедниците и граѓанските организации.
Скрининг на рак на грлото на матката – Во 2023 година со скрининг биле опфатени само 10% од жените од целната возрасна група,што е далеку под потребните минумум 25% годишно. Недостигот од матични гинеколози е трајна бариера, особено во руралните средини.
Програма за мајки и деца – Укинати се клучни скрининзи (прееклампсија во бременост, слух кај новороденчиња),намалени се средствата за медикаментозен абортус, а услугите за најранливите се недоволно искористени (само 27 жени добиле бесплатна контрацепција и само еден бесплатен преглед за жртва на сексуално насилство во 2024 година).
Програма за партиципација (за бремените жени, родилки и доенчиња) –Дури 92% од Ромките не знаат дека имаат право на бесплатни прегледи за време на бременоста, а 80% платиле за услуги што им следуваат бесплатно. Министерството за здравство покрило партиципација за само 2.850 пораѓања од 16.061 живородени деца во 2024 година, оставајќи 82% непокриени од страна на државата.
Проектот „Унапредување на здравствените права на жените, девојките и ранливите групи“ партнерски го спроведуваат Здружението за еманципација, солидарност и еднаквост на жените – ЕСЕ, ХЕРА – Асоцијација за здравствена едукација и истражување, Иницијативата за правата на жените од Шуто Оризари и Здружението за поддршка на луѓето што живеат со ХИВ – Заедно посилни, со поддршка од Владата на Швајцарија преку програмата Цивика мобилитас.
Консолидиран сет на препораки ќе биде финализиран и споделен со Министерството за здравство, надлежните институции и јавноста. Овој процес произлегува директно од барањето и учеството на граѓанските организации на форумот „Кога се штеди на превенција, последиците се скапи“.
Мислењата кои се изразени во ова соопштение не нужно ги одразуваат ставовите на Швајцарската Влада, Цивика мобилитас или организациите што ја спроведуваат.