Од опозициската ВМРО-ДПМНЕ соопштија дека меѓународниот Секретар на ВМРО-ДПМНЕ, Тимчо Муцунски заедно со портпаролката Марија Митева оствариле средба со Кристијан Сагарц, пратеник во Европскиот парламент и известител во сенка за Република Македонија.

На средбата како што пишува во партиското соопштение се разговарало за актуелната политичка состојба и предизвиците на Македонија во процесот на европска интеграција.

„Муцунски и Митева ја истакнаа нивната загриженост за добиените извештаи на релевантни меѓународни организации во кои преовладува укажување за постоење на високо ниво на корупција. Тие го информираа Сагарц дека процесот на европска интеграција мора да биде воден низ процес на вистински реформи кои примарно треба да се фокусираат на реформа на правосудството и јавната администрација“, стои во напишаното.

Муцунски и Митева истакнаа дека пристапните преговори треба да започнат што поскоро и тоа низ призма на европски вредности и критериуми, соопштија од ВМРО-ДПМНЕ.

Претседателот Стево Пендаровски денеска ја прими Доника Грвала-Шварц, заменик-премиер и министерка за надворешни работи и дијаспора на Република Косово.

На средбата, како што информираат од неговиот кабинет, било изразено задоволство од нивото на билатералните односи меѓу двете држави, кои се пријателски, динамични, засновани на меѓусебно почитување. Притоа соговорниците го реафирмирале интересот за продлабочување на соработката во сите области од заемен интерес, особено во економската, давајќи ја и поддршката за агендата на активностите меѓу владите на двете држави во наредниот период.

Покрај ова, двајцата соговорници разговарале за актуелностите во регионот, соработката и евроинтеграциите, при што било констатирано дека унапредувањето на добрососедските односи меѓу Северна Македонија и Косово ќе придонесе за напредокот, стабилноста и за безбедноста на целиот регион.

Во овој контекст претседателот Пендаровски ја реафирмирал поддршката во однос на дијалогот помеѓу Косово и Србија истаккувајќи дека секој постигнат резултат треба да биде насочен кон јакнење на регионалната стабилност и безбедност.

На средбата биле разменети информации и мислења за ширењето на делта-сојот на вирусот, темпото на вакцинација на граѓаните, како и справувањето со последиците од пандемијата во двете земји.

Директорот Фремзим Даути се разрешува од должноста директор на Националната установа, Национална и универзитетска библиотека „Свети Климент Охридски“ – Скопје поради работа што не е во согласност со законот и статутот и во други случаи предвидени со закон, врз основа на член 33, став 2 од Законот за културата, информира Министерството за култура.

„По повеќемесечни инспекциски надзори спроведени од страна на Министерството за култура во 2021 година, утврдени се низа сериозни неправилности во работата на директорот од аспект на Законот за културата и Законот за библиотеките“, стои во писмениот допис од ова Министерство.

Во соопштението се додава дека врз основа на утврдената фактичка состојба констатирана при инспекциските надзори, министерката за култура, Ирена Стефоска, оцени дека се исполнети законските услови за разрешување од должноста директор на Националната установа, Национална и универзитетска библиотека „Свети Климент Охридски“ – Скопје пред истекот на мандатот.

„До избор на нов директор, заради непречено функционирање на оваа установа, назначен е в.д. директор од редот на вработените“, соопштија од Министерството.