Активистката Моника Ристеска, која минатата година беше уапсена бидејќи јавно пушеше марихуана, објави на социјалните мрежи дека вчера била натепана од својот татко во нивниот дом во населбата Даме Груев во Скопје и објави вознемирувачки фотографии од неа со раскрвавено лице. Ристеска го пријавила татка си во полиција и тој бил уапсен. Ристеска во полиција пријавила дека била нападната и мајка ѝ.

„Пред два часа, татко ми Стојан Ристески од село Свето Митрани, неписмен бездушник и хроничен алкохоличар, се обиде да ме убие кога тргнав во кујна да земам храна. Ме нападна со тупаници и дрвено столче во главата, ми го скрши носот и ми ја измести вилицата“, напиша Ристеска.

Од МВР соопштија дека настанот кај нив бил пријавен вчера околу 22.30 часот и дека таткото на Моника е уапсен.

„На 26 мај, во 22.30 часот, на улицата Антон Чехов во Скопје, полициски службеници од СВР Скопје го лишиле од слобода С. Р. (64) од Скопје поради постоење основано сомнение дека сторил кривично дело. Претходно, ќерка му М. Р. (31) од Скопје пријавила дека околу 20.30 часот во семејниот дом на улицата Антон Чехов, по претходна расправија, таа и мајка ѝ К. Р. (62) од Скопје биле физички нападнати од татко ѝ С. Р. (64) од Скопје. Се преземаат мерки за расчистување на случајот“, се наведува во соопштението на МВР.

Техничкиот министер за внатрешни работи, Наќе Чулев, на „Фејсбук“ соопшти дека таткото на Ристеска ќе се гони за делото телесна повреда.

„Во однос на фотографиите објавени на социјалните мрежи, на кои се гледа лице со повреди на главата, ја информирам јавноста дека вчера во вечерните часови полициски службеници од СВР Скопје го лишиле од слобода С. Р. (64) од Скопје поради постоење основано сомнение дека сторил кривично дело по член 130 од Кривичниот законик и се преземаат мерки за целосно расчистување и документирање на настанот“, соопшти министерот Чулев.