Во однос на законот за ветинг, предлогот од ДУИ, премиерот Заев рече дека му бил доставен викендов, но не го разгледал.

Тој вели дека останува на ставот за ветинг и во судството и во другите институции, а причините што се уште не се спровел, е дефицитот на судии и обвинители.

„Распуштање со право на реизбор беше нашиот став за судството. Со европските партнери кога разговаравме побараа лична одговроност, а не колективна. А втората причина е ресурскиот капацитет како да се пополнат испразнетите судски и обвинителски места, ако тие заминат по ветингот“, рече Заев.

Додаде дека во државата има 750 судиски места според системизација, а во моментов има 520 судии.

Ако се прочистат уште 300 нема како да се пополнат, иако Академијата за судии и обвинители веќе има конкурс, додаде премиерот.

Новообјавените разговори за убиството на Мартин Нешкоски само потврдуваат како владеела претходната гарнитура и како се обиделе да скријат убиство, изјави премиерот Заев на прашање дали чувствува одговорност за обајвувањето на бомбите и насилните протести што се случија.

„Велат – триесетка со кромид да му дадете, тоа потврдува дека влијаеле во судството. Таму има уште многу разговори и јасно во сите се гледа дека се обидуваат да скријат убиство и да монтираат притвор и тоа го потврдувам“, рече Заев.

„И мене ми доаѓаше да ја кршам оградата на Владата затоа што се однесуваа како богови и одлучуваа за човечки судбини“, додаде Заев на прашање дали чувствува одговорност за сечење и монтирање на материјалите и за инцидентите по објавувањето на бомбата за Нешкоски.

Вицепремиерот задолжен за европски прашања, Бујар Османи, оствари средба со новоименуваната американска амбасадорка, Кејт Мари Брнс.

Како што информираат од кабинетот на вицепремиерот, тој упатил честитки до амбасадорката по повод нејзиното назначување и ѝ посакал успешна работа.

„САД не се само стратешки партнер на Република Северна Македонија туку и најважен пријател, чија поддршка може да се препознае во сите позначајни успеси на земјава од нејзината независност“, рекол Османи, при што потенцирал дека државата останува доверлив партнер на САД на Балканот.

На средбата Османи и Брнс разговарале и за поддршката на САД за членството на државава во НАТО во очекување на ратификацијата на протоколот за НАТО од страна на Сенатот во наредните месеци.