Македонија
Арсовска од Аеродром: Инопарк, мултимедијален центар и подобрување на инфраструктурата на општината

Независната кандидатка за градоначалник на град Скопје поддржана од ВМРО-ДПМНЕ, Данела Арсовска, утрово се сретна со жителите од општина Аеродром. Разговараше со пазарџиите и потрошувачите на пазарчето во трговскиот центар Бисер и се сретна со голем број жители и поддржувачи од општината.
„Се обврзувам дека ќе изнајдеме решенија за сите проблеми со кои се соочуваат жителите од оваа општина уште од првиот ден од мојот мандат и ќе ги решиме во првите две години. Ќе бидам градоначалник кој во договор со сите граѓани ќе работи на проекти кои се од суштинско значење со цел подобрување на квалитетот на животот во општината, во градот и на сите нас. Фокусот ќе го ставиме на подобрување на инфраструктурата, решавање на проблемите во сообраќајот, брз, безбеден и квалитетен јавен превоз, повеќе пешачки и велосипедски патеки, повеќе зелени површини. Во општина Аеродром е планиран и нов Мега парк, по примерот на градски парк, како и повеќе паркови низ сите населби кои се дел од општината“, изјави Арсовска на средбата со жителите од општината.
Жителите на општината се пожалија и на лошиот квалитет на воздухот од дивите депонии и од Вардариште, за што Арсовска најави итно санирање и чистење.
Таа, исто така го престави и својот проект за изградба на Скопје Инопарк на површина од 7000 метри квадратни за економско јакнење на општината преку користење на ИТ ресурсите и потенцијалите од индустријата и овозможување професионален раст за младите од оваа општина но и од целиот град. Арсовска најави и изградба на мултимедијален центар кој ќе нуди содржини за сите посетители.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Намалена затворската казна на Марјан од “Доказ М”, дел за уцените ќе се суди одново

Апелациониот суд Скопје во интерес на јавноста и медиумите информира дека донесе пресуда со која жалбата на Основното јавно обвинителство С., ја одби како неоснована, а жалбите на обвинетиот М. С. од С., делумно ги уважи. Oбвинетиот М. С. го осуди на единствена казна затвор во траење од 2-две години и 6-шест месеци и на парична казна во износ од 5.000 евра во денарска противвредност од 308.450,00 денари.
На обвинетиот М. С. од С. му се изрекува и Забрана за вршење професија, дејност или должност поврзани со кривичните дела односно забрана да врши регистрација на домеин и да се јави како регистрант или сопственик на портал за време од 6-шест години и престанок на регистрацијата на сите регистрирани домеини во кои обвинетиот се јавува како сопственик на портал.
Пресудата на Основниот кривичен суд Скопје, во делот за кривичното дело уцена, ја укина и предметот во тој дел го врати на првостепениот суд на повторно судење, од причина што првостепениот суд не ги утврдил со сигурност решителните факти кои се од влијание за правилна примена на материјалното право, по однос на елементот од битието на кривичното дело Уцена.
Македонија
Ќе одговара ли и битолчанец за претепувањето на Пендиков, новопечениот Бугарин му открил детали на обвинителот

Новопечениот бугарин Христијан Пендиков само што дошол во Охрид отишол во обвинителство за да направи препознавање на второто лице кое наводно го натепало поради етнички причини. Тој пред обвинителот објаснувал со какви повреди се здобил, по кои делови од телото го удирале, како и кои биле последиците од постапувањето на вториот осомничен.
Станува збор за засебна постапка која се води против битолчанец на возраст од 23 години.
Од обвинителството за Макфакс велат дека и во овој случај Пендиков има својство на оштетен. Повеќе детали не се споделуваат а приказната која Пендиков ја раскажа во обвинителството утре ќе треба да ја соопшти и пред судија.
Според првичните информации битолчанецот се сомничи дека сторил кривично дело тешка телесна повреда, а за него се бараше да се определи мерка за обезбедување присутност. Доколку исказот на Пендиков се соодејствува со доказите кои се обезбедени од обвинителството меѓу кои и снимката од тепањето тогаш младиот осомничен битолчанец ќе седне на обвинителна клупа.
Македонија
Арсовска се жали дека плаќа туѓи долгови: 2,3 милиона евра Градот ќе плати отштета на Комерцијална, 2 милиона на „Скопски саем“, милион за галиите

Од Град Скопје се побаруваат над 10 милиони евра за отштети по судски спорови и камати за нив за проекти што се реализирале во мандатите на градоначалниците пред Данела Арсовска. Таа денес уверуваше дека Град Скопје во последните 18 месеци е во добра финансиска состојба и покрај блокирањето на сметката и на советниците им кажа кој сè го тужи Градот и чека отштета.
„Дали знаете кои сè спорови ги има Град Скопје до овој момент и зошто? Еве јас ќе ѝ презентирам дел на јавноста за да знаат што е она што се случувало во изминатите години. Комерцијална банка АД Скопје, тужен Град Скопје – 1.171.900 евра, без камата и судски трошоци. Наплатена бесправна банкарска гаранција. Поведен спор. Основниот долг зголемен со затезна камата ќе изнесува 2.335.000 евра, што значи дека на овие 1.171.900 евра имате уште толку судски трошоци и камати од Комерцијална банка за спор што е поведен од 8.11.2017 година, кој се водел до 2023 година и кој е во своето финале. Значи, Градот ќе биде оштетен по основ на камати и судски трошоци за над 1 милион евра само по основ на овој спор“, рече Арсовска.
Спор против Градот повело и Друштвото за градежништво „Интернационал“ на 7.2.2019 година. Арсовска рече дека тие побаруваат 176 милиони денари, односно речиси 3 милиони евра, на кои треба да се додадат судските трошоци и каматите.
Арсовска објасни и за долгот кон „Скопски саем“.
„’Скопски саем’, вредност 110 милиони денари, тоа е неполни речиси 2 милиона евра. Исплатени се средствата во Градот на 19.12.2007 година. Издадено им е одобрение за градење на 31.1.2008 година, поништено им е во меѓувреме и станува сопственост на 19 септември на Друштвото за недвижен имот ‘Ист гејт’. Поведена е тужба, таа сега беше доставена во Град Скопје за наплата. Покрај овие основни средства од речиси 2 милиона евра, кои беа побарувани, Градот беше задолжен да плати по основ на камати и 480.000 евра“, рече градоначалничката Арсовска.
Арсовска од советниците на ВМРО-ДПМНЕ побара објаснување зошто досега не поднеле кривични пријави за каматите.
„Сакам да ве прашам, затоа што имаме советници од ВМРО-ДПМНЕ што одржаа драматична прес-конференција дека за камати ќе пуштале кривични пријави, дали поднесовте кривична пријава за овие камати? Дали поднесовте кривична пријава бидејќи на прес-конференција рековте дека ќе поднесете доколку во одреден спор Градот плати 1 евро камата по основ на она што се случуваше со приватните превозници. Еве тука имате правосилно решение за 480.000 евра камати. Ако не е, ме интересира кога ќе ја поднесете?“, праша градоначалничката Арсовска.
На листата со долгови што треба да ги исплати Градот е и Друштвото за транспорт „Гренадар“ со 253 милиони денари и судска постапка со тужба од 16.1.2020 година. Арсовска очекува дека и во овој спор сумите за камати ќе бидат милионски, а кои Градот ќе треба да ги плаќа.
Побарување од нешто повеќе од еден милион евра од Градот има и за галиите за тужба од 2020 година, во која се бара надомест на штета од 68 милиони денари.
„Да не ги набројувам понатаму затоа што има доста и мора да кажам дека сумите што се побаруваат се милионски, но исто така милионски се и каматите што Градот треба да ги плати. Така што, Градот во овие изминати 18 месеци е во добра финансиска состојба, финансиски е консолидиран, кредитниот рејтинг ни е задржан со позитивен изглед и имаме драстично зголемување на можноста за кредитно задолжување од 1,2 милион евра во ноември 2021 година за сега да имаме меѓу 25 и 30 можности за кредитно задолжување“, рече градоначалничката Арсовска.
Извештајот за финансиската состојба на Градот и јавните претпријатија е прва точка на дневниот ред на денешната седница на Советот на Град Скопје.