Поради премиерот Зоран Заев и вицепремиерот задолжен за економски прашања, Кочо Анѓушев, една и пол година 1.200 работници од „Југохром“ поминуваат низ вистински пекол, обвини портпаролот на ВМРО-ДПМНЕ, Димче Арсовски, и додаде дека семејствата немаат приходи поради неодговорноста на власта што ги лаже за рестартирањето на работата на комбинатот.

„На 18 јуни 2017 година Зоран Заев лично вети дека ќе се ангажира за рестартирањето на ‘Југохром’ за на 12 октомври истата година Владата да излезе и со конкретно ветување дека фабриката ќе почне со работа најдоцна до мај-јуни оваа година, а еве помина цело лето, поминува и ноември, за жал, ‘Југохром’ сè уште не почнува со работа.

1.200 вработени се без работа и немаат основни средства за егзистенција, а виновниците за тоа имаат име и презиме, тоа се Зоран Заев и Кочо Анѓушев. Пред точно два дена власта која ветуваше целосно рестартирање, сега вели дека комбинатот ќе почне со работа в година до јуни, со што спасени ќе бидат 550 вработени“, рече Арсовски.

Портпаролот на ВМРО-ДПМНЕ праша како власта ќе им објасни на работниците дека 650 од нив ќе останат без работа. „Кои се тие што ќе ги бркате, а кои ќе останат да работат? Што ќе прават 650 луѓе што ќе останат без работа од “Југохром’?“, праша Арсовски.

Опозицијата додава дека како еден од снабдувачите со струја на „Југохром“ додека работела се јавува ЕДС – компанијата што била во сопственост на Кочо Анѓушев.

„Тоа можеме да го видиме од возниот ред на МЕПСО, кој ви го презентираме во заднина (на видеото од прес-конференцијата) од 8 јуни 2016 година, од која се гледа дека ЕДС на Анѓушев во тоа време се јавува како доставувач на струја за “Југохром’. Власта треба итно и неодложно да одговори дали зад нерестартирањето на ‘Југохром’ се кријат нечии бизнис-апетити и дали можеби некој заткулисно се пазари? СДСМ една и пол година е на власт и не оствари ниту едно ветување, а не успева затоа што и во еден ‘Југохром’ се кријат лични бизнис-интереси на поединци од власта и политичко пазарење за сметка на маката на напатените работници“, рече Арсовски.

Ова е најцрно време за македонската економија и за граѓаните, заклучува опозицијата.