Република Северна Македонија, како и целиот свет, денеска слави една уникатната традиција, верување и култура – културата на Ромите, како значајна вредност во светското и македонското културно наследство, рече премиерот Оливер Спасовски во обраќањето по повод Меѓународниот ден на Ромите.

Како што кажа Спасовски одбележувањето на овој празник е дел од изградба на концептот „Едно општество за сите“, по углед на големата европска идеја за обединување во различностите.

„Различностите во нашето општество ги сметаме за наша предност. За наше заедничко богатство“, посочи премиерот.

Спасовски нагласи и дека годинава Меѓународниот ден на Ромите го прославуваме во вонредна состојба и без јавни настани заради мерките преземени против заканата од коронавирусот.

„И во овие услови, кога зборуваме за ‘Едно општество за сите’, зборуваме за наше заедничко учество и почитување на мерките и препораките кои ни помагаат да ја совладаме опасноста и да го запреме ширењето на вирусот“, рече премиерот.

Тој вели и дека како никогаш до сега, токму сега е време да се сплотиме и обединиме за да покажеме дека умееме да бидеме модел за успешно и функционално општество и во вонредна состоја.

Владата на денешната седница на предлог на Министерството за здравство и Министерството за труд и социјална политика дозволи посебен режим на движење за лицата со попреченост.

За овие наши граѓани нема да важи забраната за движење во периодот од 19:00 до 20:00 часот, од понеделник до петок, а во деновите на викенд од 11:00 до 13:00 часот.

Оваа мерка за дозвола на движење за лицата со попреченост се однесува и на лицата што ги придружуваат овие граѓани за време на дозволеното движење во наведените временски периоди.

Во финална фаза е подготовката на 50 социјални пакети, со храна и средства за хигиена, за 50 ранливи домаќинства од Карпош. Денеска пакетите се подготвуваа во пунктот на Црвен крст во Момин Поток. Прехранбените продукти и средства за хигиена се набавени од страна на компанијата „СМС ШОПС ДООЕЛ“.

Локалната самоуправа искажува благодарност до оваа општествено одговорна компанија и ги повикува сите други, правни субјекти, да се вклучат во поддршка на заедницата.

Во претстојниот период ќе бидат доделени уште 30 социјални пакети за помош на социјално загрозените домаќинства, како резултат на соработка меѓу Општина Карпош и Црвениот крст.

Овие хуманитарни активности имаат за цел да го олеснат живеењето на граѓаните, во период на пандемијата со Ковид – 19.