„Тргнавме од определбата да создаваме праведно општество, кое вистински се грижи за намалување на социјалната нееднаквост во општеството и креиравме социјална реформа која целосно го менува начинот на кој се грижиме за ранливите групи граѓани и значително ја зголемуваме финансиската помош што ја добиваат“, рече во изјавата за медиумите претседателот на Владата, Зоран Заев, кој денеска заедно со министерката за труд и социјална политика, Мила Царовска, и со директорката на ЈУ Меѓуопштински центар за социјална работа, Наташа Станојевиќ, имаше средба со корисници на социјална помош и социјални работници.

Средбата беше организирана за да се чујат граѓаните и нивните пораки за мерките од социјалната реформа и за нејзината реализација според нашите очекувања.

„Тргнавме од определбата да создаваме праведно општество, кое вистински се грижи за намалувањето на социјалната нееднаквост во нашата земја. Креиравме социјална реформа, која целосно го менува начинот на кој се грижиме за ранливите групи граѓани и значително ја зголемува финансиската помош што ја добиваат најсиромашните. Новиот систем овозможува поддршка, обуки и советувања за да може секој човек исто така да почне да работи“, рече премиерот Заев.

Реформите во социјалната и детската заштита ги правевме многу внимателно, истакна на средбата премиерот Заев, со цел да ги опфатиме сите ранливи категории и да овозможиме еднакви шанси за секое дете бидејќи тоа е определбата на оваа Влада и таква држава заслужуваат нашите граѓани.

„Оваа реформа, што ја направивме оваа година, и веќе шест месеци можеме да кажеме дека ги дава резултатите, опфаќа повеќе од 120.000 граѓани. Важно е да се каже дека со социјалната пензија или државната пензија веќе опфативме 4 илјади корисници, што значи дека полека ги достигнуваме таргетите. Образовниот и детскиот додаток ги даваат своите резултати, тие ги дополнуваат приходите на семејството сè со цел идните генерации да ги стимулираме да излезат од сиромаштија преку образование“, истакна министерката Мила Царовска.

Таа додаде дека со социјалната реформа се воведува и нов начин на работа на социјалните центри. Лицата во социјален ризик добија семеен социјален работник, кој ќе работи директно со нив сè до извлекување од ризикот во кој се наоѓаат.

Директорката на ЈУ Меѓуопштински центар за социјална работа, Наташа Станојевиќ, нагласи дека новиот систем овозможува поддршка, обуки и советување за да може секој човек да почне да работи и дека граѓаните веќе ги чувствуваат придобивките од социјалната реформа.

Овие придобивки ги потенцираа и корисниците на социјална помош, кои рекоа дека новите реформи со зголемената финансиска поддршка и особено мерките за стекнување квалификации за вработување, им отвораат реални шанси да се извлечат од наследената сиромаштија.

На средбата беше кажано дека вкупно 27.000 семејства во моментот ја примаат гарантираната минимална помош, 27.130 деца земаат детски додаток, образовниот додаток го користат 8.678 деца, а со мерката социјална пензија се опфатени 4.148 возрасни лица. Се очекува овие бројки да продолжат да растат.

Членовите на собраниската Комисија за прашања на изборите и именувањата едногласно го одбија барањето за апанажа на поранешната специјална јавна обвинителка Катица Јанева, која е осомничена во случајот „Рекет“.

„Од формално-правен аспект не постојат причини за прифаќање на барањето бидејќи таа не е избрана од Собранието“, беше констатирано на попладневното продолжение на седницата во Собранието.

Јанева од притворот во Шуто Оризари испрати барање да ѝ се одреди апанажа. Претседателот на Комисијата, Илија Димовски, минатиот месец образложи дека првиот допис до Комисијата бил испратен од адвокатката Ирена Фрчкоска во име на Катица Јанева, а по неколку дена добиле барање и лично од Јанева.

Ексспецијалната обвинителка е во притвор од 21 август кога беше уапсена како осомничена во случајот „Рекет“. Од Собранието беше разрешена на 14 септември, еден ден пред да ѝ истече мандатот.

Бизнисменот Орце Камчев по судењето за „Рекет“, запрашан за врските меѓу него и министерот за здравство, Венко Филипче, не сакаше многу да коментира, а за средбата и проектот меѓу нив двајца и Бојан Јовановски – Боки 13 рече дека станува збор за небитни работи бидејќи тој проект не се реализирал.

Прашањето следуваше кога во судницата Бојан Јовановски го праша што правел во неговиот дом меѓу 15 и 20 март, а Камчев рече дека бил таму зашто го викнале за одредена работа што тој ја одбил. Бизнисменот потврди дека на средбата биле присутни и Зоран Милески – Кичеец и министерот за здравство, Венко Филипче.

Камчев вели дека станувало збор за некако јавно-приватно партнерство што го смислил Бојан Јовановски и им го понудил нему и на министерот Филипче, но дека проектот не држел вода.

„Небитен е проектот бидејќи Бојан Јовановски бладаше. Сè што зборува се глупости. Имаше идеја да прави некакви јавни-приватни партнерства и бла, бла, бла. Беше еден состанок од мене не потврден, исто и од министерот. Беше само еден муабет“, рече кусо Камчев.

Камчев тврдеше дека Филипче не барал ништо од него на тој состанок. На инсистирање од новинарите да даде одговор на прашањето која е конекцијата меѓу него и Филипче, бизнисменот Камчев рече дека тие се пријатели и таа релација ќе остане.

„Ако Венко Филипче барал нешто на тој состанок, да знаете, сигурно ќе беше пријавено. Јас и Венко Филипче со години сме пријатели. Над 20 години. Тој работеше во нашата болница одреден период. Тој ми беше пријател и ќе ми биде пријател. Бојан Јовановски имаше идеја да се прави некое јавно-притватно партнерство за некоја болница. Ние му рековме дека тоа не држи вода иако тој може преку некои негови врски тоа да го лобира. И тоа беше тоа на состанокот“, додаде Камчев по судењето.