Новинарка од Бугарија на крајот од прес-конференцијата на македонскиот и бугарскиот премиер му врачи подарок на Димитар Ковачевски. Таа излезе од публиката и му даде црвено јаболко по што му посака успех.

„Господине Ковачевски, дозволете да ви подарам здраво бугарско црвено јаболко во знак на благодарност дека вие ќе го запазите единството меѓу Бугарија и Северна Македонија“, рече новинарката.

На гестот бугарскиот премиер Кирил Петков се насмеа и рече: „Нашето убаво јаболко“, а Ковачевски го понесе со себе.

Некогашниот специјален јавен обвинител, Гаврил Бубевски, стана шеф на скопското Јавно обвинителство, а неговиот колега од СЈО, Стевчо Донев, е избран за јавен обвинител во Вишото јавно обвинителство во Штип. Ова се последните одлуки донесени од Советот на јавните обвинители.

Новиот шеф во скопското Обвинителство, Бубевски, застапуваше неколку предмети на СЈО пред судот против високи поранешни функционери. Меѓу нив се „Насилство во Општина Центар“, „Монструм“, „Титаник 3“. Обвинителот Стевчо Донев е познат по тоа што го води случајот „Тендери“, во кој е обвинета ексминистерката за култура, Елизабета Канческа-Милевска.

На денешната седница избрани се и јавни обвинители во Јавното обвинителство на Република Македонија, а таму ќе бидат Соња Симовска и Љупчо Коцевски. Во тетовското Јавно обвинителство јавен обвинител ќе биде и Бесар Алиу.

Премиерот на Бугарија, Кирил Петков, не одговори конкретно на прашањето во која држава се наоѓа и кој јазик се зборува во неа. Наместо тоа, посочи дека дефиницијата за јазикот е јасна во договорот за добрососедство. Македонскиот премиер Димитар Ковачевски пред својот колега посочи дека сме признаена држава со македонски јазик. Петков, за разлика од некои од неговите интервјуа, овој пат не кажа дали и натаму останува на ставот дека македонскиот јазик го признава по 1944 година.

„Ќе обрнеме внимание на работите што нѐ зближуваат, а на другите работи ќе им дадеме подолг рок. Сакам да кажам многу јасно дека во договорот за добрососедство има многу јасна дефиниција за јазикот. Тука е прашањето дека Бугарија го почитува и се гордееме што ја признавме независноста на Северна Македонија и истовремено со тоа го почитуваме самоопределувањето на сите граѓани во Северна Македонија и користењето на сите ваши јазици како што се во Уставот. Имаме полно почитување на тоа“, рече Петков.

Премиерот Ковачевски рече дека историските прашања ќе бидат во втор план, а целта на двете влади ќе биде зближување на народите.

„Се договоривме да формираме работни групи од повеќе области – инфраструктурата, економијата, трговијата, деловната соработка, образованието и исто така тука спаѓа и Комисијата за историско-образовни прашања, која има свој план за работа. Тие треба да информираат што е договорено и начинот на кој е договорено. Во однос на јазиците, ние сме држава признаена од Бугарија, со македонски јазик, со потпишани билатерални договори, со кои се регулира начинот на кои се потпишани тие договори, македонскиот јазик е дел од повелбата на ОН и другите институции и организации во кои членуваме. Сите прашања што се однесуваат на историските делови ќе бидат во втор план, а во прв план е да го градиме зближувањето на граѓаните, кој ќе ни даде стимул и аргументи за постигнување договор со Бугарија и почнување на преговорите со ЕУ“, рече Ковачевски.

Премиерот на Македонија додаде дека се надева оти договореното помеѓу членовите на Комисијата ќе биде мост кон иднината, а не враќање кон минатото.