Македонија
Групата „Блупринт“ се повлекува од процесот за изработка на новиот Кривичен законик: „Постапката суштински го озаконува незаконитото“

Групата на граѓанските организации за реформи во правосудството„Блупринт“ соопштува дека се повлекува од понатамошно учество и давање придонес во процесот на изработка на новиот Кривичен законик.
Тие сметаат дека нивното учество е беспредметно во постапка, која, како што велат, „суштински го озаконува незаконитото, што е дополнително спротивно на нашата мисија за конструктивно, транспарентно и засновано на докази градење политики“.
„Клучната причина за нашето повлекување од процесот се последните измени на Кривичниот законик од 6 септември 2023 година, што беа предложени од страна на Владата на РСМ. Постапката во која беа донесени и содржината на овие измени во делот на трите клучни дела за борба против корупција се целосно спротивни на владеењето на правото. Измените во трите спорни кривични дела беа донесени со заобиколување на работната група, која работи на нов Кривичен законик, без нејзино консултирање, без соодветно консултирање на стручната јавност, како и без претходно анализирање и проценување на потребата од тоа“, соопшти групата „Блупринт“.
„Во ваква ситуација и состојба сведоци сме на дрска злоупотреба на т.н. европско знаменце, европско право и казнени политики во овие рамки. Успешниот обид за измени и намалување на казните на трите клучни дела за борба против висок криминал и корупција озакони хронично неказнување високи функционери и вршители на јавни функции. Новата политика, наместо да ја врати довербата на граѓаните во законодавната и извршната власт, уште повеќе влијае кон нејзино поткопување, со недвосмислено праќање порака до обичниот граѓанин дека плаќа двојно.
Дополнително, неминовно и тесно поврзано со нашиот став за повлекување од процесот за изработка на нов Кривичен законик е и нашата одлука за неодамнешното повлекување од работната група за изработка на нацрт-предлогот за Законот за конфискација на имотот во граѓанска постапка. Неоспорно е дека и Кривичниот законик и Законот за конфискација на имотот во граѓанска постапка се суштински и тематски поврзани во борбата против криминалот и корупцијата. Оттука, доколку постои намера преку намалените казни во Кривичниот законик да дојде до застареност на кривичното гонење, а преку Законот за конфискацијата во граѓанска постапка да се создаде привид дека ќе се одземе нелегално стекнатиот имот, тогаш се работи за пристап со кој суштински и концептуално не се согласуваме.
Вклученоста на граѓанскиот сектор во процесите на креирање политики е од суштинско значење за владеење на правото, но доколку граѓанскиот сектор е навистина вклучен во нив преку конструктивно работење. Вклученоста на граѓанскиот сектор не смее да се користи како алатка за давање легитимитет на процесите и да служи како декор во рамките на работните групи за измена на закони.
Со оглед на целосната состојба, каде што се дава легитимет на нелигитимното, групата „Блупринт“ нема да учествува во процеси во кои правото и правниот систем се извртуваат и злоупотребуваат, личниот интерес на поединци ги надминува јавниот интерес и општественото добро, а политичките цели и интересите се издигнуваат над темелните вредности“, се додава во соопштението на групата „Блупринт“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Арсовска: Во Чаир издигната дивоградба на 12 ката, вселени се и станари кои на инспекторите им ги исекоа гумите

Градоначалничката на Град Скопје, Данела Арсовска повторно се вклучи од Чаир на социјалните мрежи, од пред зграда на 12 ката за која вели дека е градена небезбедно, без проект, со обид да се прикаже дека е од 2011 година.
Арсовска рече дека објектот поседува нелегален приклучок на струја и нелегален приклучок на вода.
„Дрскоста оди до таму што денес копаат булевар за диво да се приклучат на водоводна и канализациона мрежа, демек во недела нема никој да ги фати, а на струја веќе див приклучок си направиле“, рече Арсовска.
Соопшти дека во зградата таа и инспекторите затекнале луѓе кои веќе живеат таму.
„Истите на лице место се закануваа на нашите инспектори од Град Скопје и им ги исекоа гумите со нож. Се работи за организирана кримнална банда“, рече Арсовска.
Најави дека во текот на утрешниот ден Основното јавно обвинителство за гонење на организиран криминал и корупција ќе добие уште еден предмет со илјадници страни фалсификати и злоупотреби од Општина Чаир. Инволвирани се, како што вели, повеќе функционери и вработени во општина Чаир.
Македонија
Во Брисел имало обид да се нанесе удар на македонскиот јазик, Мицкоски рече дека успеале да амортизираат

Премиерот Христијан Мицкоски добил вознемирувачки информации во насока на тоа дека одредени политичари од ЕУ се обидуваат да нанесат нов удар на македонскиот јазик и идентитет. Тој рече дека успеал да стапи во контакт со сите од Брисел, па успешно на некој начин бил амортизиран ударот.
„Некој повторно сакаше да нанесе удар врз македонскиот идентитет и јазик, доформулирајќи го, дообјаснувајќи го со модерен или сегашен македонски јазик, само да се обидат да креираат некоја нова нација, а со тоа да го нарушат и кредибилитетот на самата ЕУ“, изјави Мицкоски, додавајќи дека Македонија повеќе нема да молчи за вистината.
За жал, вели премиерот, постојат и такви членови на Европскиот парламент, но среќа за нас е што огромното мнозинство таму, застануваат зад нашите аргументи.
„Ние се бориме да ја кажеме нашата вистина за Македонија, вистина која што ја чувствуваат граѓаните, без разлика дали е тоа во Берлин, Брисел, Лондон или Вашингтон“, додаде премиерот кој денес присуствуваше на свеченото пуштање на патниот правец Гевгелија-Богданци.
Македонија
Филипче: Во администрација се вработува само со списоци, сите останати граѓани се понижени и дискриминирани

Владата на ВМРО-ДПМНЕ и ЗНАМ не само што не ја рационализираше администрацијата, туку ја претвори во продолжена рака на партиските штабови. Вработувањата се политички награди, не резултат на квалитет и труд. Ова го истакна Венко Филипче на трибината „Македонија понижена – Една година Влада“.
– Ветуваа ред и рационализација во администрацијата. Ветуваа мерит-систем. Што добивме? Нови министерства, илјадници нови партиски вработувања, листи за вработување по штабови кои се споделуваат на социјалните мрежи, рече Филипче.
Тој нагласи дека партизацијата на институциите е официјализирана, а партиската книшка е главна квалификација за работа во државата.
– Нивните функционери отворено кажуваат дека вработувањата во болниците и секаде на друго место се само по партиска заслуга. Тоа го кажуваат гордо, без срам – како да е нормално, посочи Филипче.
Според него, администрацијата денес не е сервис на граѓаните, туку огледало на системот на ВМРО-ДПМНЕ.
– ВМРО-ДПМНЕ ја претвори администрацијата во огледало на нивниот систем: хаос под контрола, сервилност наместо компетентност, заклучи Филипче.