Македонија
Вархељ: На младите Роми треба да им обезбедиме целосен пристап до образование, здравство, домување, вработување

Домаќин на годишниот министерски состанок, четврти по ред по усвојувањето на „Декларацијата на партнерите од Западен Балкан за интеграција на Ромите во рамките на процесот на проширување на ЕУ“ – Познањска декларација, е Република Северна Македонија. На состанокот добрите пракси од своите држави, како и гледиштата за идните чекори, ги истакнаа министрите од Северна Македонија, Црна Гора, Србија, Босна и Херцеговина, Албанија и од Косово.
Министерскиот состанок со поздравни обраќања го отворија Јована Тренчевска, министерка за труд и социјална политика, Оливер Вархељ, комесар за проширување и соседски односи од Европската комисија, Ана Лирман, државен министер за Европа и клима во Германија, Дејвид Гир, амбасадор на Европската Унија во Република Северна Македонија, и Жељко Јованович, директорот на Ромската иницијатива при фондациите „Отворено општество“ (Open society).
Тренчевска, отворајќи го настанот, ја истакна важноста на годишниот состанок за интеграција на Ромите посочувајќи дека размената на добри пракси може да придонесе во унапредувањето на политиките и мерките, кои го подобруваат квалитетот на живот на Ромите. Таа им посака добредојде на сите присутни и повика на плодна дискусија, која ќе оди во прилог на сите земји учеснички.
„На младите Роми треба да се залагаме да им обезбедиме целосен пристап до образование, здравство, домување, вработување и учество во зелената агенда“, истакна Вархељ.
Тој посочи дека постојат голем број успешни проекти, кои ги вклучуваат Ромите и придонесуваат кон унапредување на нивниот животен стандард, меѓутоа ја искажа и својата убеденост дека земјите во регионот можат уште повеќе.
Лирман во своето видеообраќање ја истакна силната поддршка на Германија во процесот на интеграција на Ромите и ја искажа својата визија за инклузивна Европа, која еднакво ќе ги вклучува Ромите, како и сите маргинализирани групи во сите општествени процеси.
Амбасадорот на Европската Унија во Република Северна Македонија, Дејвид Гир, ја истакна важноста на соработката за успешна интеграција на ромската заедница во сите општествени процеси.
„Соработката е клучна за постигнување значаен напредок. Ова значи тесна соработка со институциите на ЕУ, релевантните меѓународни организации, граѓанските организации предводени од Ромите и што е најважно – самите ромски заедници. Нивните гласови мора да се слушнат, а нивните перспективи мора да ги водат нашите заложби. Како заклучок – стоиме на клучен момент во нашето патување кон вклучување на Ромите во Западен Балкан. Предизвиците се застрашувачки, но и одлучноста да се надминат“, изјави Гир.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Извршниот одбор на СДСМ донесе неколку заклучоци

Извршниот одбор на СДСМ го потврди предлогот на Ковачевски и кандидат за претседател на Собранието го избра Јован митревски, координатор на пратеничката група на СДСМ.
„Митревски е пратеник со искуство, вреден, отворен, чесен и посветен на интересот на граѓаните, докажан во неговиот ангажман во Собранието. Сигурни сме дека Митревски ќе ја извршува функцијата на највисоко ниво“, рече портпаролот на СДСМ Дарко Каевски.
ИО го задолжи генералниот секретар да го подготви роковникот за постапка, начин и критериуми за кандидат за претседател на претседателските избори, согласно статутот на партијата.
За шеф на централниот изборен штаб на СДСМ, извршниот одбор го предложи Миле Зечевиќ Вардарски.
Македонија
Османи во посета на Женева

Министерот за надворешни работи, Бујар Османи утре ќе учествува на настанот на високо ниво за Одбележување на седумдесет и пет години од Универзалната декларација за човекови права, организиран од Обединетите Нации во Женева.
Преку неговото обраќање, Османи ќе ги презентира заложбите на Северна Македонија во овој важен домен.
За време на престојот во Женева, Османи ќе оствари низа билатерални средби со високиот комесар за човекови права Волкер Турк и високиот комесар за бегалци Филипо Гранди, како и генералните директори на светската здравствена организација и меѓународната организација за миграции Тедрос Аданом и Ејми Поуп, соопштија од МНР.
Македонија
Ковачевски: Кандидатот за претседател на државата ќе биде од СДСМ, а не од ДУИ

Ковачевски пристигна во штабот на СДСМ каде во 19 часот ќе се одржи состанок на извршниот одбор и рече дека денеска ќе биде потврдена неговата одлука – координаторот на пратеничката група, Митревски, да седне во фотелјата на Талат Џафери. На прашањето дали би поддржал претседател Албанец од ДУИ, како што вчера најави Османи, премиерот рече дека нема никаква дилема оти кандиндатот за претседател ќе биде од СДСМ.
„Сите политички партии имаат свои амбиции, меѓутоа претседателскиот кандидат ќе биде од СДСМ, како што беше на минатите избори и ќе ја има најшироката поддршка од политичките партии и граѓанските организации, поединци итн. Тоа ќе биде претседалот на државата и во следниот мандат“ , рече премиерот.
Во врска со дилемите околу тоа дали ВМРО-ДПМНЕ ќе предложи свои членови во техничката влада, Ковачевски верува дека опозицијата ќе го стори тоа бидејќи така се договорила на лидерската средба.