Потпретседателот на ВМРО-ДПМНЕ, Владо Мисајловски на денешната прес конференција во врска со трагедијата во Тетово и прашањето за оставки во Владата истакна дека оставката секогаш билa и ќе биде чин на одговорност.

Според Мисајловски, одбивањето на оставки во Владата после еден таков трагичен настан како во Тетово значи само две работи: Оваа влада нема морал, и оваа влада не чувствува одговорност.

„ВМРО-ДПМНЕ не бара одговорност од владата поради политичка малициозност или затоа што има лични мотиви против Заев или Венко Филипче туку поради тоа што се неспособни, но и поради објективна истрага која мора да ја има. Тоа што премиерот Заев го штити министерот Филипче значи дека и Заев треба да си поднесе оставка поради негово активно учество во несмасниот обид да се одговорат прашањата кои ја мачат целата јавност“, нагласи Мисајловски.

Од ВМРО-ДПМНЕ поставија неколку прашања: „Kој е виновен што сме земја со највисока смртност во Европа од Ковид? Кој е виновен што нема нови протоколи за лечење од Ковид? Кој е виновен што нема персонал во болниците, и роднини одат да се грижат за пациентите? Кој е виновен што немаше вакцини и сеуште не оди добро процесот на вакцинација? Кој е виновен што народот нема доверба во системот и во вакцинирањето?“, рече Мисајловски.

Побара одговори и на прашањата кој е виновен што немало технички прием на модуларната во Тетово?

„Кој е виновен што немало ПП апарати? Кој е виновен што е направена со ПУР пена и никој не водел сметка дали истата е запалива? Кој е виновен што не се дозна кој ги исекол цевките за довод на кислород во модуларната болница во Тетово на почетокот? Кој е виновен што се плаќало по 1000 денари од роднини на пациенти на сестри, доктори болничари да водат грижа за пациентите, и дали е тоа нормално? Кој е виновен што дополнително надвор од тендерска постапка се поврзувале кислородните цевки?“, запраша потпретседателот на ВМРО-ДПМНЕ.

Бугарија ѝ донира на Македонија 50.000 вакцини од „Фајзер“. Вакцините вчера пристигнале во земјата.

„Вчера, Северна Македонија доби донација од повеќе од 50 илјади вакцини на ‘Фајзер’ од Бугарија“, објави министерот за надворешни работи Бујар Османи на социјалните мрежи.

Тој додава дека вакцините се дистрибуирани и подготвени за употреба.

„Важен гест за пријателство и солидарност“, напиша Османи.

Полицијата вчера казни 173 возачи во Скопје, од кои 48 за брзо возење, соопшти Министерството за внатрешни работи.

„На територијата на град Скопје изречени се вкупно 173 мерки, меѓу кои за возење повеќе од дозволената брзина 48 санкции, 12 за возење без возачка дозвола, три за возење под дејство на алкохол, десет за технички неисправни и нерегистрирани возила“, велат од МВР.

Изречени се 12 мерки за користење мобилен телефон, шест за некористење сигурносен појас, 5 прекршоци што ги прават возачите на мотоцикли, седум за непрописно престигнување и обиколување, 54 за непрописно паркирање.

Од МВР најавија дека засилените акциски сообраќајни контроли продолжуваат и апелираат до граѓаните да ги почитуваат сообраќајните правила и прописи.