Македонија
(Видео) Арсовски: 23 надворешни советници на Заев го чинат народот 246.000 евра годишно
Во моментот сме среде најголема здравствена и економска криза, каде што секојдневно броиме починати, а Зоран Заев и Владата се расфрлаат со луксуз, обвини портпаролот на ВМРО-ДПМНЕ, Димче Арсовски.
„Зоран Заев завчера си ги објави платите на своите кабинетски советници, што, мора да признаеме, покажува невидена дрскост, ароганција и практично им се смее на граѓаните в лице. Најпрвин не се објавени сите плати на сите советници, а не се објавени ниту платите на националните координатори, што Зоран Заев ги поставува за да има примирје во својот кабинет од сите оние што останаа без функција.
Зоран Заев го советуваат дури 23 советници, кои земаат плата над 55.000 денари.
Вкупната сума што се издвојува месечно за нето-плата за овие советници на Заев изнесува секој месец над 20.000 евра. Годишно од државниот буџет и од буџетот на граѓаните за плати на овие кабинетски советници на Заев се издвојуваат над 240.000 евра. 240.000 евра годишно за 23 луѓе кои се нарекуваат советници на Зоран Заев.
Во време кога граѓаните живеат со 2 евра дневно, кога Република Македонија тоне во сиромаштија, кога државата е најзадолжена досега и е во ризична зона, кога над 40.000 ученици не може да следат онлајн-настава само поради тоа што нивните родители немаат доволно услови да им обезбедат ИТ-технологија, еден советник на Заев секој месец прима над 55.000 денари.
Толку од штедливоста на Заев. Единствено гледаме луксуз и расфрлање на парите на граѓаните.
Никој не знае дали и колку инвестиции донел Љубе Бошковски како советник на Зоран Заев за странски инвестиции, иако граѓаните знаат дека не донел ниту една ниту, пак, воопшто извршил разговор со која било странска компанија. Никој не знае што работи, на пример, поранешната задолжена за протокол на Зоран Заев, г-ѓа Хаџиевска, која е советник за меѓународни односи и зема плата над 55.000 денари, а од меѓународни односи гледаме само гафови на погрешени знамиња, буквално на секоја средба каде што самите си ги резилиме државата и македонскиот народ и дури граѓаните се срамат од нив.
Дополнително, кога Зоран Заев и Кабинетот имаат намера да ги објават платите на националните координатори што ги постави Зоран Заев и, нормално, колку се на број?
Кога ќе видиме отчетност што сработиле националните координатори заедно со овие кабинетски советници?
Додека нема услови во болниците да се лекуваат болните, Заев троши стотици илјади евра на нето-плати за своите советници, кои, како што можевме да видиме, ништо паметно не го советувале изминатиов период“, истакна Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Радев: Преговорите помеѓу Бугарија и Северна Македонија завршија пред две години
Преговорите меѓу Бугарија и Северна Македонија завршија во јули 2022 година, кога двете земји го потпишаа билатералниот протокол по Договорот за добрососедство и соработка, изјави бугарскиот претседател, Румен Радев, кој смета дека нема потреба од посредништво во дијалогот помеѓу Македонија и Бугарија.
Со овие зборови тој одговори на прашање за изјавата на премиерот на Христијан Мицковски, дека е подготвен за преговори со бугарскиот претседател.
Радев посочи дека секогаш бил отворен за дијалог, но мора да се прави разлика меѓу дијалог и преговори.
„Преговорите меѓу Бугарија и Северна Македонија завршија во јули 2022 година, кога двете земји го потпишаа билатералниот протокол по договорот за добрососедство и соработка“, рече Радев, пренесува „Новини.бг“.
Според него, доколку се зборува за дијалог, тој треба да се води меѓу Северна Македонија и Европската комисија и врз основа на преговарачката рамка за Северна Македонија усвоена во исто време.
„Дијалогот е таму, а се работи за условите што мора да ги исполни Северна Македонија, за да можат да почнат преговорите за членство на земјата во ЕУ“, додаде.
Радев истакна дека Бугарија може и треба да помогне во овој процес, за Северна Македонија побрзо и поефективно да ги исполни условите и самоуверено да го тргне својот европски пат.
Македонија
Уште еден земјотрес почувствуван во Македонија
Земјотрес со јачина од 3,6 степени според Рихтеровата скала вечерва е регистриран во близина на граничните премини помеѓу Македонија, Косово и Србија.
Според информациите на ЕМСЦ земјотресот се случил на длабочина од 10 километри, на 9 километри од Врање.
Граѓаните веднаш се огласија на социјалните мрежи и, како што велат, ова е четврти земјотрес од синоќа.
„Добро удри! Немаше нишање, повторно вертикално“, сведочи граѓан на Врање кој го почувствувал потресот, пренесува „Б92“.
„Силно, но кратко“, се дел од коментарите на корисниците на EМСЦ.
Земјотресот бил почувствуван во делови од Македонија, Србија, Косово и Бугарија.
Претходно утрово, земјотрес со јачина од 4 степени според Рихтеровата скала ја погоди јужна Србија, а беше почувствуван и во Македонија и во Бугарија.
Македонија
Огромни гужви на грчко-македонската граница: „Се чека и до три часа“, се жалат граѓани
Колони возила има попладнево на граничниот премин Еврзони од грчка страна, додека голем број македонски граѓани се враќаат од продолжениот празничен викенд кој го поминаа на туристичките места во Грција.
Според информациите од АМСМ, за влез во земјава се чека повеќе од еден час.
Граѓани пак, сведочат дека чекаат и до три часа.
„Колони има до патарина“, се жалат македонските туристи.
Гужви има и на велешката патарина, а колона возила стои во место и на влезот на Гостивар од „Стража“.
Според последните информации, на Табановце времето за чекање веќе е намалено откако претходно денес и таму беше забележано зголемено движење.
(Фото: архива)