Пукнатини во ѕидовите на пекарницата „Специјал“ како можност за задржување храна што ги привлекува глодачите и несоодветно воден дневник за поставените мамки за глодачи, се пропустите што ги откриле инспекторите при вонредниот инспекциски надзор во пекарницата, каде што беше сликан стаорец на маса. Во интервју за „Макфакс“ и „А1. он“ директорот на Агенцијата за храна и ветеринарство, Зоран Атанасов, образложува зошто нема казна за пекарницата, туку се пропишани едукативни мерки и пекарницата работи непречено.

„За такво нешто не е предвидено веднаш да се затвора објектот. Каде би стигнале ние ако за такво нешто би ги затворале сите објекти во државата? Таму се наредени мерки, спроведени се и законодавецот е тој што кажува кога што се прави“, рече директорот Атанасов.

Тој вели дека инсистира инспекторите максимално одговорно да ги спроведуваат контролите и ја отфрли можноста за корумпирани инспектори кои би фаворизирале објекти и би им прогледувале низ прсти при евентуални пропусти.

„Инспекторот е самостоен орган кој носи факсимил и печат и одговара за своите постапки. Не можете за некого да кажете дека е таков или ваков. Сè уште мислам дека инспекторите се некорумпирани, тоа е моето мислење, за другото треба да се докаже“, вели директорот Атанасов.