Македонија
(Видео) ВМРО-ДПМНЕ: Фирма-донатор на СДСМ го доби тендерот за набавка на возила во Одбрана

Фирма-донатор на СДСМ го доби тендерот за набавка на возила во одбрана, обвини портпаролот на ВМРО-ДПМНЕ, Димче Арсовски, на прес-конференција.
„Министерството за одбрана на чело со Радмила Шекеринска распишува повик, а ‘Делукс ауто’ од Куманово, инаку многу познат донатор на СДСМ во повеќе кампањи наназад, го добива тендерот во висина од девет и пол милиони денари, при што набавени се 11 возила од марката ‘шкода’. Прашуваме како е можно ‘Делукс ауто’ од Куманово, фирма што не е генерален увозник на возилата од марката ‘шкода’ туку само дилер од втора рака, се јавува како фирма која е поповолна од фирми коишто се генерални застапници на истите возила во Република Македонија“, праша Арсовски на прес-конференција.
Тој обвинува дека единствена предност на оваа кумановска фирма е тоа што се јавува на донаторските списоци на СДСМ каде што Радмила Шекеринска е заменик-претседател.
„Дали СДСМ и Радмила Шекеринска со пари од граѓаните ги враќаат долговите кон фирмите донатори во партиските кампањи на СДСМ? Криминалниот картел ја претвори државата и парите на граѓаните во средство за поткусурување и враќање стари долгови кон нивните донатори. Недозволиво е државата да се злоупотребува во име на партијата“, вели портпаролот на ВМРО-ДПМНЕ.
Арсовски додаде дека сите институции мора да ги почитуваат законите и да се однесуваат согласно со законските постапки бидејќи секое поразлично дејствување ќе биде санкционирано во иднина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски жестоко му одговори на Филипче: Доста беше со итроштини, народот веќе не заборава, вие продадовте сѐ

Премиерот Христијан Мицкоски денеска остро одговори на изјавата на лидерот на СДСМ, Венко Филипче, за нова декларација во Собранието за евроинтеграциите, нарекувајќи ја политика на „итроштини“ и обид за манипулација со граѓаните.
Премиерот потсети дека СДСМ и ДУИ веќе еднаш гласале декларација за неприфаќање на ултиматуми од Софија, но потоа, како што рече, прифатиле сè.
„СДСМ и ДУИ го потценуваат народот. Играт на картата на кратка меморија. Ама граѓаните добро знаат, прво донесоа декларација дека нема да се менува името, па го променија. Рекоа дека ќе го почитуваат референдумот, па не го почитуваа. Сè што ветија, изневерија“, истакна Мицкоски.
Тој порача дека Владата што ја предводи има јасна стратегија за иднината: „Нашата цел е развој, реформи и изградба. Ова не е игра за итроштини и ситни маневри. Тоа го видовме седум години и видовме каде стигнавме“.
Осврнувајќи се на поранешните функционери од СДСМ и ДУИ, премиерот рече дека граѓаните јасно гледаат „како со години се збогатуваа, а денес располагаат со милионски имот во земјата и странство“.
Лидерот на СДСМ, Венко Филипче, претходно изјави дека Собранието треба да донесе заедничка резолуција за евроинтеграциите и дека доколку Бугарија повторно стави вето, Македонија треба да ги прекине преговорите со ЕУ. Според него, Владата води „неискрена политика“ и свесно го пролонгира процесот.
Македонија
(Фото) Почина поранешниот директор на Здравствен дом – Скопје, д-р Виктор Исјановски

Тажна вест ја потресе македонската здравствена јавност попладнево. Почина д-р Виктор Исјановски, психијатар и поранешен директор на Здравствен дом – Скопје.
Неофицијално, Исјановски починал во Грција, каде што престојувал на летување. Вчера на социјалната мрежа Инстаграм Владимир Ристов – Камењар сподели фотографија од Таверна Фарос каде што е во друштво со д-р Исјановски и со кошаркарската легенда Перо Антиќ.

Фото: Инстаграм
Д-р Исјановски беше на чело на најголемата здравствена установа во државата од јуни 2019 до 2024 година. Јавноста најмногу го памети по неговиот ангажман за време на пандемијата на коронавирусот, кога Здравствен дом – Скопје со сите ресурси беше ставен во служба на граѓаните, особено во процесот на масовната вакцинација.
По професија специјалист психијатар, зад себе остави богата професионална кариера. Роден е на 21 јули 1978 година во Скопје, каде ги заврши основното и средното образование, а Медицинскиот факултет во Скопје го завршил во 2003 година.
Приватно, д-р Виктор Исјановски беше сопруг и татко на две деца.
Скопје
ДПМНЕ и Арсовска го држат Скопје во хаос, вели Шукова и ветува крај на блокадите

Кандидатката за градоначалник на Град Скопје од СДСМ, Каја Шукова, денеска упати жестоки критики кон ВМРО-ДПМНЕ и актуелната градоначалничка Данела Арсовска, обвинувајќи ги дека со години ги блокираат проектите од витално значење за градот.
„Секојдневно гледаме како капитални проекти кои се клучни за скопјани стојат заглавени поради политички игри, опструкции и незаинтересираност за реалните потреби на граѓаните“, изјави Шукова во посета на Карпош.
Таа како пример го посочи булеварот од мостот кај Љубљанска до улицата Скупи, кој според неа е од огромно значење за растоварување на метежот и подобро поврзување на Карпош со остатокот од градот.
„Сè е готово – проектна документација, експропријација, дури и обезбедени 190 милиони денари. Единствено се чека дозвола од Министерството за култура за теренски истражувања. Но веќе две години, блокада и застој!“, потенцираше Шукова.
Таа најави дека како идна градоначалничка ќе се заложи целосно да ја деблокира изградбата на овој булевар и мост, како и сите други стопирани проекти што им се потребни на граѓаните.
„Како ваша градоначалничка, ќе направам сè во моја надлежност оваа блокада да заврши. Ќе инсистирам истражувањата веднаш да завршат и да ја почнеме изградбата. Граѓаните одамна заслужуваат современа, функционална и европска инфраструктура и ќе ја добијат!“, порача Шукова.