Премиерот Христијан Мицкоски изјави дека Владата ќе ги заврши сите обврски поврзани со евроинтеграциите, но дека нема да дозволи булинг врз Македонија во процесот.

„Ние ќе направиме сè што е во нашата моќ да ја завршиме домашната работа, ајде да видиме тогаш што ќе се случи. Пред 8 години, кога менувавме имиња и презимиња, ни велеа дека сме фронт ранери и дека за 3-4 години ќе бидеме во ЕУ. Тие 3-4 години изминаа и и каде сме? Таму каде што бевме пред 25 години,“ изјави Мицкоски.

Тој додаде дека не прифаќа нови притисоци во процесот.

„Ако го смениме Уставот, уште ако може и да не сме Македонци, да сме нешто друго – ќе бидеме најдобри. Токму така како што некој ни прави булинг и сака да ја сопре Македонија да напредува кон ЕУ. Тоа нема да го дозволиме“ рече Мицкоски.

Во однос на црвените линии во спорот со Бугарија, Мицкоски изјави: Подготвени сме да седнеме и да разговараме, ама не е коректно некој да очекува дека оваа влада, додека сум јас премиер наеднаш ќе рече, е добро, ова што досега го зборувавме не важи, сега ќе седнеме и ќе направиме уставни измени. Вакви предавства и капитулации додека сум јас премиер нема да се случат, заклучи премиерот одговарајќи на новинарски прашања.

Премиерот Христијан Мицкоски денеска изјави дека моралот не му дозволува да се согласи со зголемување на платите во правосудниот сектор, коментирајќи ги шесте предложени реформи во законите од областа на судството и обвинителството. Тој порача дека главната реформа во тие закони е токму зголемувањето на платите, што според него е неприфатливо поради состојбата со буџетот.

Мицкоски наведе дека следната година државата треба да врати над 2 милијарди евра долг, поради задолжувањата од минатото, и дека покрај тоа треба да обезбеди пари за плати, пензии и социјални трошоци.

„Ако некои мислат дека треба да им ги дуплираме платите на судиите и обвинителите – нека кажат. Еве, јас ќе ја донирам мојата плата. Ама да обвинуват и да судат според законите“, изјави премиерот, додавајќи дека нема да поддржи реформи чија суштина е само финансиско зголемување и додаде: „Знам дека ќе ме нападнат, но моралот не ми дозволува да се согласам со тоа“.

Премиерот во таа насока додаде и дека Македонија не може да троши повеќе средства на правосудството отколку најразвиените земји во Европа.

Мицкоски најави и дека Владата до крајот на годината ќе достави измени на Кривичниот законик во Собранието. Ги обвини претходните власти за измените на Кривичниот законик кои, како што рече, овозможиле политичка амнестија.

На новинарско прашање во врска со процесот за разрешување на државниот јавен обвинител Љупчо Коцевски, Мицкоски рече: „Што се однесува до Љупчо Коцевски, почекајте и ќе видите.“

Со свечено поставување на камен-темелник денеска официјално започна изградбата на новата спортска сала во рамките на ООУ „Блаже Конески“ во Мичурин, со што стартува втората фаза од доградбата на ова училиште – еден од најзначајните и најголеми капитални проекти во Општина Аеродром.

На површина од 1.800 метри квадратни, втората фаза опфаќа изградба на современа спортска сала, како и 10 нови училници, кабинет за информатика, нова библиотека и простран хол за дружење и заеднички активност. Партерно уредување на целиот двор на училиштето со нова урбана опрема, ново отворено спортско игралиште, садници и зеленило.

Училиштето ќе добие комплетно нова опрема, клупи, столчиња, плакари, табли. Исто така, ќе биде изграден и нов паркинг за потребите на училиштето. Со изградбата на новата сала, ООУ „Блаже Конески“ ќе добие вкупно две спортски сали, современо опремени за спроведување на квалитетна настава по физичко и здравствено образование, што ќе придонесе за подобрување на спортските активности и развојот на младите.

Вкупната вредност на втората фаза изнесува 253 милиони денари, со предвиден рок за изведба од 18 месеци.

„Со овој камен-темелник започнуваме ново поглавје во развојот на образованието во Аеродром. ‘Блаже Конески’ е едно од најстарите училишта во нашата општина, изградено уште во 1954 година. Создаваме подобри услови за учениците и наставниците, и со тоа покажуваме дека нашите ветувања не остануваат само зборови,“ изјави градоначалникот на Општина Аеродром, Дејан Митески.

Премиерот Христијан Мицкоски, кој присуствуваше на поставувањето на камен-темелникот, истакна дека Владата ќе продолжи да поддржува вакви проекти кои инвестираат во иднината на децата.

„Станува збор за многу значајна инвестиција со која ќе им се овозможи на децата да учат и да растат во современи услови. Како Влада, ќе продолжиме да ги поддржуваме ваквите иницијативи што создаваат подобра иднина за младите,“ рече Мицкоски.

Во првата фаза од проектот, која е при крај, училиштето добива десет нови училници и осум кабинети по предметна настава, како и голем хол со бина, главни скали и лифт, кујна со трпезарија, нови тоалети и санитарии за лица со попреченост.

Со реализацијата на втората фаза, „Блаже Конески“ ќе прерасне во едно од најсовремените училишта во земјата – простор во кој знаењето, спортот и пријателството ќе бидат темел на новите генерации.