Министерот за здравство, Венко Филипче, вели дека обидот на ВМРО-ДПМНЕ за блокада на измените на Законот за заштита на населението од заразни болести е смислен и тенденциозен обид за дневнополитички поени кој директно го загрозува здравјето на населението.

Тој е дециден дека барањето за формирање нова Комисија од страна на ВМРО-ДПМНЕ, која ќе ја избира Собранието, е само начин да се прикаже наводна грижа и конструктивност и истото е целосно неиздржано.

„Во Комисијата за заразни болести членуваат врвни професионалци, експерти во својата област. Од почетокот на кризата сите одлуки, препораки и мерки на Комисијата за заразни болести се носат врз издржани епидемиолошки анализи и единство во интерес на заштитата на здравјето на граѓаните. Уште еднаш повикувам на разум и одговорност, јавното здравје е над партиските интереси. Вирусот не чека, мерките мора да се донесат во најкраток можен рок“, порача тој.

Според министерот, од почетокот на  ковид-кризата во земјата опозицијата делува неконструктивно, со опструкции и критики кон сите кои даваат максимални напори во справување со вирусот во земјата.

Барањето на ВМРО-ДПМНЕ за формирање специјална комисија која ќе се справува со коронавирусот е уште едно во низата деструктивни дејствувања на опозициската партија, обвини Костадин Костадинов, портпарол на СДСМ.

„Наместо носење на измените на Законот за заштита на населението од заразни болести, кои се важни за поголема заштита од коронавирусот, ВМРО-ДПМНЕ и губитникот Христијан Мицкоски прават се за да го кочат процесот. Тоа е опасно по јавното здравје и спротивно на интересите на граѓаните и здравствените работници. Комисијата за заразни болести е составена од стручни, докажани професионалци во здравството и нема никаква потреба од формирање нова, паралелна комисија“, изјави Костадинов.

Според него, тоа нема да придонесе во поефикасна борба со коронавирусот, туку само дополнително ќе го усложни целиот процес.

„Сите, а особено опозицијата треба да се насочат кон заштита на здравјето на граѓаните, а не кон политички игри. Здравјето на граѓаните е најважно. Како народни претставници имаме обврска да работиме во интерес на граѓаните и заштита на јавното здравје. Да бидеме одговорни и да ги донесеме измените на Законот за заштита на населението од заразни болести“, рече портпаролот на СДСМ.

Отворени сме во секој момент да разговараме суштински за решенија за декриминализација и депенализација, преку измени во Кривичниот законик и Законот за прекршоци, изјави портпаролот на Владата, Душко Арсовски.

„Потребно е секако да има широка стручна дебата каде што ќе бидат вклучени сите засегнати страни, институции, граѓански здруженија, медицинската фела. Треба да се видат ефектите од користењето, понатаму системот за контролирање, како ќе се контролира и изведе ова. Ова е процес во кој неопходен е ставот на сите.  Владата предложи донесување измени и дополнување на Законот за опојни дроги, ќе се овозможи извоз на цвет од канабис за медицински цели, со што ќе се поттикнат нови инвестиции и нови работни места“, изјави Арсовски.

Тој соопшти дека во овој момент одгледувањето канабис е дозволено само на правни лица кои имаат одобрение за одгледување канабис, издадено од Министерството за здравство, а по претходно добиена согласност од Владата.

Министерството досега има издадено 55 одобренија на фирми за одгледување канабис за медицински цели, додека 17 имаат поднесено барање кои се на повторен увид во владина процедура.