Амбасадорот на Република Турција – Хасан Мехмет Секизќок, денес ја посети општина Битола, каде имаше средба со градоначалникот Тони Коњановски. На средбата се разговараше за повеќе важни теми и области, низ кои континуирано се продлабочува соработката на Битола со градови од Турција.

Посебен акцент на средбата беше ставен на економската соработка, која се потврдува и со сериозната заинтересираност на турска компанија за инвестиција во Битола, која се очекува наскоро да биде реализирана. Градоначалникот информираше за отвореноста на локалната самоуправа и поддршката која ја овозможува општината во рамките на својата надлежност и за развој на други бизнис идеи кои ќе придонесат за економско јакнење на Битола.

На средбата, се разговараше и за историската поврзаност на двете држави, како и посебното значење на Битола и нејзината привлечност за голем број турски туристи, кои се чести гости во градот. Во овој контекст, беа разгледани и новите можности кои треба да се создадат за понатамошен напредок на туризмот и збогатување на туристичката понуда.

Исто така, се разговараше и за соработката во областа на образованието и културата, а после средбата во кабинетот, градоначалникот Коњановски и амбасадорот Секизќок, прошетаа низ Старата битолска чаршија и посетија дел од значајните културно – историски обележја на Битола, меѓу кои и Хаџи Махмуд Беј џамијата, која што покрај своето верско значење, некогаш важела и за важен просветителски, образовен дом и институција.

Пратеникот од редовите на ВМРО-ДПМНЕ – Бојан Стојаноски на денешната собраниска седница за поставување пратенички прашања го праша премиерот Ковачевски за тоа дали ќе биде прифатен предлогот на ССМ за линеарно покачување на плата и линеарно зголемување од 2,806 денари, бидејќи во моментов е навистина тешко да се врзе крај со крај за македонскиот работник.

Стојаноски рече дека овие прашања се директно произлезени од синдикатите и се нивна желба. ССМ и КСС како најголеми синдикални организации во државата се обратија до сите политички партии во Парламентот и до сите координатори со испратени писмени барања со барање за изнаоѓање на пратеничка група со која таа тие нивни барања ќе ги преточи во амандман за тие да бидат расправани и усвоени.

„Имаме секојдневни штрајкови од различни синдикални организации, можеме да просведочиме дека во моментов е навистина тешко да се сврзе крај со крај за македонскиот работник затоа што имаме историски највисока инфлација, сиромаштијата галопирачки расте, цената на горивата никогаш не била повисока, цената на храната исто така не била никогаш повисока и не престанува да расте а цената на енергенсите галопирачки исто така се вивнува во облаците и не престанува да расте таа цена“ – рече Стојаноски.

Тој посочи дека власта не се прави ништо за да се сопре и така разгорената инфлација која се случува во моментов.

„После денешните објави на новите цени едно е јасно, РКЕ е надвор од реалноста и од страдањата на овој народ кој едвај врзува крај со крај. Власта повторно удри по џебот на граѓаните. Најголемиот број од домаќинствата, согласно тарифните блокови 3 и 4 ќе плаќаат и до 138% поскапа струја. Тарифниот модел кој го воведе власта е само маска за новото поскапување кое ќе стапи на сила од 01 јули. Зад неразбирлива пресметка за граѓаните се обидуваат да го протнат енормно високото поскапување на цената на електричната енергија“ изјави меѓудругото на денешната прес-конференција портпаролката на ВМРО-ДПМНЕ, Марија Митева.

Таа напомена дека „најголем дел од домаќинствата се наоѓаат во вториот и третиот блок и тие ќе имаат покачување од 10,3%, односно 18,3%. Ваква катастрофална енергетска политика не може да помине неказнето. Ни помалку страшна не е и состојбата кај малите потрошувачи ( институции, дуќанчиња, мали бизниси со помалку од 50 вработени и два милиони евра годишен приход)“.

„Зголемувањето на цената ќе предизвика колапс на нивните бизниси. Имено, кај нив со новиот тарифен систем се дефинира т.н. висока тарифа од 13,794 ден/kWh и ниска тарифа од 10,116 ден/kWh, кои се за 4-5 пати повисоки од досегашните. Со ова најголемиот товар од поскапувањето освен домаќинствата од втор, трет и четврт блок, годинава ќе го понесат и малите потрошувачи со оваа неколкукратно зголемена цена“ рече Митева.

Таа вели дека „ова е вистински масакар врз домаќинствата кои се греат на електрична енергија, особено ако се земе во предвид дека во изминатиов период преку мерки беше стимулирано греењето на инвертер клими како опција за греење на домаќинствата доколку тие извршат замена на нивните грејни тела на дрва со таканаречени инвертер клими. Така истите во зимскиот период од октомври до април ќе плаќаат 138% поскапа струја, а со тоа греењето на нивните домови ќе стане практично невозможно“.

„Затоа што оние домаќинствата кои за греење на струја плаќале сметки од 12.000 денари во грејниот период сега ќе треба да плаќаат 28.560 денари“ рече Митева.