Македонија
(Видео) Костовски: Заев за една година исплатил 350 илјади евра за хонорарци, а можел да купи 7 болнички возила
Пратеникот на ВМРО-ДПМНЕ, Дарко Костовски, на прес-конференција обвини дека премиерот Зоран Заев за една година исплатил 350 илјади евра за хонорарци, а можел, како што вели, да купи 7 болнички возила.
„Овие 350 илјади евра да се потрошеа на болнички возила можеби ќе можеше едно од нив да го спаси животот на овчарот од Кратовско, кој почина во болница, откога претходно 5 часа доктор на раце го носеше за да го спаси затоа што немаше болничко возило што можеше да го земе.
Овие 350 илјади евра, наместо за хонорарци на Заев, можеа да се потрошат за вработување медицински персонал, па можеби ќе имаше кој да ѝ даде кислород на жената што почина во штипската болница“, истакна Костовски.
Според него, со тие пари можеле да се набават десетина илјади вакцини, но наместо за тоа, се потрошиле за исплати кон синот на Самка Ибраимоски, претседателот на СДММ, Марко Михаилоски, независниот колумнист Петрит Сарачини и други апологети на Заев.
„Со 350 илјади евра власта можеше да набави десетина илјади теста на Ковид-19, таблети и разни терапии, но наместо за лечење и спасување човечки животи, 350 илјади евра во ек на пандемија беа потрошени за згрижување коалициски партнери, функционери од партијата, нивни роднини и таканаречените независни колумнисти“, рече тој.
Исто така, нагласи дека со тие 350 илјади евра можело да се спасат стотици животи, но Заев избрал да ги дава за хонорарци, негови партиски активисти, коалициски партнери и дежурни фалбаџии во медиумите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево време со температура до 25 степени
Времето утрово е студено со појава на магла по одделни котлини и речни долини. Преку денот, ќе биде сончево со мала локална облачност. Ќе дува слаб ветер претежно од југоисточен правец. Минималната температура ќе биде во интервал од -3 до 5, а максималната ќе достигне од 18 до 25 степени.
Во Скопје минималната температура ќе се спушти до 2, а максималната ќе достигне до 23 степени, јавува УХМР.
Во наредните денови продолжува периодот на стабилно и претежно тивко време со студени утра и температури кои наместа ќе се спуштаат под нула степени. По одделни котлини ќе има услови за појава на утринска магла или ниска облачност. Дневната температура ќе биде без значителни промени.
Македонија
Не е за пиење водата во тетовските села Мерово, Луковица и Седларево, како и во прилепското село Ропотово
Регионалниот центар за управување со кризи Тетово, извести дека од Центарот за јавно здравје ЈЗУ – Тетово добиле информација дека испитаните примероци на вода за пиење од селата Мерово, Луковица и Седларево (Општина Желино) не одговара на законските и стручни прописи за бактериолошка анализа.
„Потребно е да се врши редовна дезинфекција на водата за да може да се употребува за пиење“, велат од ЦУК.
РЦУК Битола, информира дека од Центар за јавно здравје ЈЗУ – Прилеп е докажана здравствена микробиолошка неисправност на водата за пиење од регионалниот водовод (Општина Долнени) во с. Ропотово и во основното училиште на с. Ропотово.
Македонија
Се’ уште забранета водата за пиење во Струмица
Изречената забрана за пиење на водата од струмичкиот водоснабдителен систем останува на сила, соопшти Агенција за храна и ветеринарство (АХВ) по резулатите од анализираните мостри земени на 18 октомври годинава во рамки на спроведениот вонреден инспекциски надзор во водоснабдителниот објект – фабрика за вода на ЈКП „Комуналец” Струмица.
Од АХВ информираа дека кај сите мостри претходно зголеменото ниво на манган е во рамки на дозволените вредности, но микробиолошки, четири од земените мостри не ги исполнуваат безбедносните критериуми поради детектирано зголемено присуство на колиформни бактерии во водата.
Целта на контролата беше увид во досегашните активности спроведени од страна на ЈКПД Комуналец од Струмица во однос на спроведувањето добра производствена и добра хигиенска пракса, како и други технички зафати во водоснабдителниот систем.
Во рамки на надзорот, земени се 6 мостри за анализа на водата од водоводната мрежа на ЈПКД Комуналец Струмица и тоа: една мостра од сирова вода која доаѓа од браната, сирова вода од чешма во фабриката, втора мостра на хлорирана/третирана вода за пиење од чешма во фабриката за вода, три мостри вода за пиење од мерните места одредени од ЈПКД Комуналец во нивниот мониторинг план за земање мостри вода за анализа и една мостра вода за пиење земена по случаен избор на инспекторот од водоводната мрежа на ЈПКД Комуналец.