Пратеникот од СДСМ, Ненад Коциќ, на прес-конференција потсети дека Владата предводена од СДСМ ги утврди измените и дополнувањата на Законот за здравствената заштита.

Преку овие измени, како што објасни Коциќ, трошоците за дијагонстицирање и лекување на ковид-пациенти ќе се се движат од 40.000 до максимални 305.000 денари.

Според пратеникот од СДСМ, овие чекори се преземаат за да се овозможи здравствените услуги во приватните болници да бидат еднакво економски достапни за сите граѓани, со што ќе се заштитат јавното здравје и економските интереси на сите граѓани.

Покрај ова, додаде тој, со предложените законски измени е предвидено и користење на ресурсите на приватните болници доколку условите го наложуваат тоа во согласност со состојбата предизвикана од пандемијата во име на заштита на јавното здравје и се забранува преземање здравствени работници од јавното здравство од страна на приватните здравствени компании.

„Истовремено, предвидени се и измени во делот на глобите за прекршоци доколку приватните здравствени установи не постапуваат во согласност со законските одредби. Измените на Законот за здравствената заштита во Собранието набргу ќе се најдат пред пратениците во Собранието. Како парламентарно мнозинство, ги повикуваме сите пратеници да ги поддржат овие измени со кои цените за третман на пациенти во приватните болници ќе бидат финансиски поиздржливи за сите граѓани“, рече Коциќ.