Министерството за надворешни работи одлучи да прогласи еден дипломат од руската амбасада за непожелна личност и тој треба да ја напушти земјата во рок од седум дена.

Како што соопшти македонското МНР, на 14 мај бил повикан амбасадорот на Руската федерација, при што била врачена нота со која се наложува на посочениот дипломат да ја напушти земјата.

Министерството нагласува дека одлуката е донесена во согласност со членот 9 од виенската конвенција за дипломатски односи.

Во Зоолошката градина во Скопје пристигнаа шест нови пингвини од Русија, од кои три мажјаци и три женки.

Пингвините пристигнаа вчера, и, како што беше соопштено од Зоолошката градина, тие се прилагодуваат на новите услови.

По пристигнувањето во Скопје, ставени се во краток карантин.

„Пингвините се добро и супер се адаптираат. По пристигнувањето на скопскиот аеродром, веднаш се препуштија на уживање во внатрешниот базен, а по краткиот карантин, ќе го отвориме и надворешното живеалиште“, велат од скопската Зоолошка градина.

Најавено е дека дополнително ќе бидат објавени повеќе информации за возраста, имињата и карактеристиките на животните.

Претседателот на Владата, Зоран Заев, денеска патува за Брисел каде што е предвидено да оствари средби со високи претставници од Европската Унија и со лидерите од Западен Балкан.

Вечерва, на покана на потпретседателот на Европската комисија, Жозеп Борел, Заев ќе присуствува на заедничката работна вечера со лидерите на земјите од Западен Балкан. На состанокот, како што соопшти владината прес-служба,  ќе се разговара за актуелни прашања за регионот во контекст напредокот на земјите во процесот за нивно пристапување во ЕУ.

Непосредно пред вечерата, премиерот Заев ќе оствари куса средба со потпретседателот на Европската комисија и висок претставник за безбедносна и надворешна политика на ЕУ, Жозеп Борел.

Премиерот Заев оваа посета на институциите на ЕУ во Брисел ќе ја заврши утре со средба со претседателот на Европскиот совет, Шарл Мишел.