Македонија
(Видео) Кузеска: Клинчаров бил главен поддржувач на Мицкоски и ВМРО-ДПМНЕ, ОЈО да постапи

Портпаролката на СДСМ, Богданка Кузеска на денешната прес-конференција истакна дека е добро што Државната комисија за спречување на корупција отворила предмет за судир на интереси, непотизам и корупија во врска со тендерите во министерството на Стефан Андоновски.
СДСМ, рече Кузеска, тоа го поздраува.
Очекуваат скандалот, финансиската афера во која жената е Државен секретар а мажот добива тендери да биде целосно брзо расчистен и да следува одговорност.
Според Кузеска, фактите се кристално јасни: фирмата на сопругот на Клинчарова добила два тендери, а министерот Андоновски е потписник на договорите.
„Иако се обидуваше да ја оправда оваа скандалозна ситуација со апсурдни изговори сепак ги призна тендерите. Ова не е само судир на интереси – ова е очигледен случај, основано сомнение за корупција. Денеска ќе објавиме дека сопругот на државната секретарка, Мартин Клинчаров, кој ги добвал тендерите во министерсвото на Андоновски е жесток поддржувач на Мицкоски и ДПМНЕ. На неговиот профил на Фејсбук може да се види дека учествувал на партиски состаноци во Белата палата, за што објвувал и слики. Во своите објави Клинчаров жестоко го брани Мицкоски од, како што самиот вели „бардовите“ на новинарството. Ова е потврда дека станува збор не само за семејсна туку и за партиска поврзаност, директен линк и со ДПМНЕ“.
Ете, вели Кузеска, каде завршуваат парите на граѓаните.
Според неа, одговорност за овој скандал мора да има.
Оценува дека првиот чекор на ДКСК е во вистинска насока, но сега, како што додаде, е на ред завршница на предметот но и вклучвање на Јавното обвинителство и правдата мора да биде задоволена.
Кузеска нагласи дека тендерските мрежи на ВМРО-ДПМНЕ мора да бидат разобличени, а одговорните санкционирани.
СДСМ, прецизира таа, нема да дозволи оваа афера да биде заташкана, а секој чинител во оваа криминална мрежа мора да одговара пред законот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Игуменот Георгиј избран за нов митрополит на Дебарско – кичевската епархија

Игуменот Георгиј (Ѓорѓевски) е избран за нов духовен водач на Дебарско-кичевската епархија
Тој е назначен на местото на упокоениот митрополит Тимотеј.
Георгиј, инаку, поранешен македонски амбасадор во Ватикан, неодамна се замонаши.
„На 28 мај 2025 година, кога Светата Црква го прославува Одданието на Воскресение и споменот на светите Гаврил Велички и Ахил Преспански, Неговото Блаженство Архиепископот Охридски и Македонски г. г. Стефан, отслужи Божествена Литургија во манастирот „Свети великомаченик Георгиј“ – Криви Дол, Скопје. На Литургијата Архиепископот го ракоположи во јероѓаконски чин монахот Георгиј (Ѓорѓевски).”, објави Скопската епархија на МПЦ-ОА на својата веб-страница.
Ѓорѓевски е македонски теолог и универзитетски професор. Тој е редовен професор на Православниот богословски факултет „Св. Климент Охридски“ при Универзитетот „Св. Кирил и Методиј“ во Скопје, каде што предава предмети од областа на Старозаветната теологија, вклучувајќи Библиска историја и археологија, Вовед во Стариот Завет и Егзегеза на Стариот Завет.
Своето високо образование го започнал на истиот факултет, каде што дипломирал теологија. Потоа продолжил со постдипломски студии на Понтификалниот универзитет „Грегоријана“ во Рим, Италија, каде што магистрирал и докторирал во областа на библиската теологија.
Во периодот од 2010 до 2014 година, Ѓорѓевски ја извршувал функцијата амбасадор на Македонија при Светата Столица (Ватикан).
Ѓорѓевски е автор на бројни научни трудови и книги. Во периодот од 2016 до 2023 година, тој бил декан на Православниот богословски факултет „Св. Климент Охридски“ во Скопје.
Македонија
Муцунски на проштални средби со амбасадорките на Србија и Шведска

Министерот за надворешни работи и надворешна трговија, Тимчо Муцунски, денеска оствари одвоени проштални средби со амбасадорката на Република Србија, Невена Јовановиќ, и амбасадорката на Кралството Шведска, Еми Ларсон Џејн.
На средбите, министерот Муцунски изрази благодарност за севкупниот ангажман и придонес на двете амбасадорки во унапредувањето на билатералните односи и меѓусебната соработка за време на нивниот дипломатски мандат во нашата земја.
Соговорниците изразија заедничко задоволство од континуираниот политички дијалог на високо ниво и успешната соработка во сите области од заемен интерес. Притоа, беше реафирмирана заедничката посветеност за натамошно продлабочување на односите и одржување на отворен и конструктивен дијалог по сите прашања од заеднички интерес.
Македонија
(Видео) Началници, инспектори, министри, сите тие кои требало да спречат се штитат во истрагата, вели Талески за трагедијата во Кочани

Во Кочани изгореа 62 млади животи. Изгореа во дискотека која работела незаконски, под носот на институциите. Изгореа во објект кој требало одамна да биде затворен. Изгореа зад заклучени врати, по наредба на актуелните службеници во МВР. И денес, додека родителите плачат, а државата треба да донесе правда, директните виновници се штитат од истрага, истакна на прес-конференција Миле Талески, пратеник на СДСМ.
Три месеци по трагедијата, вели тој, нема вина, нема одговорност за оние кои ако делувале вечерта, трагедијата ќе била спречена. Вистинските виновници сè уште се на слобода.
„Началници, инспектори, министри, сите тие кои требало да спречат се штитат во истрагата. Истрагата се затвора без ниеден обвинет актуелен функционер.
Наредбата со која била затворена вратата на дискотеката, клучната причина за високата бројка на жртви, до ден денес е мистерија. Никој не признава. Никој не потпишал. Никој не знае ништо. И сите зборуваат за сè освен за суштината. Кој е одговорен за тоа што децата не можеа да излезат живи, вели Талески.
Според него, оперативниот план на полицијата, наместо да се отвори пред јавноста, е прогласен за тајна.
Прашува, зошто се крие вистината за одговорноста на полицијата.
„Додека трагедијата уште боли, се штитат директните виновници:
– Дејан Салтировски, началникот на СВР Штип, човекот кој ја дал наредбата, добива политичка заштита од својот поранешен адвокат сега министер, и од самиот Мицкоски.
– Драган Петрушев Казак, службеникот што ја спровел наредбата, иако знаел дека е спротивна на процедурите.
– Кристина Јованова, која дозволила фирма со блокирана сметка да работи на црно, да организира забави за деца.
– Томо Донев, кој не мрднал прст, ни кога било јасно дека се користи пиротехника без дозвола.
Фирмата ММММ ДООЕЛ, без дозвола за пиротехника, без овластени лица, работела без проблем. Не само што никој не ја спречил – се отвора сомнеж дека имала политичка заштита. Дали затоа што била блиска до ВМРО-ДПМНЕ? Затоа што организирала митинзи за партијата? Не добиваме одговор ниту на ова прашање“.
Ова според Талески е системско злосторство.
„Кога државата не ги штити децата, туку ги штити оние што ги загрозиле, тоа веќе не е држава. Тоа е режим. Сите гледаме дека одговорност се бара кај келнери, кај диџеи, кај обезбедување. Кај последните во синџирот, но обвинителството е слепо за оние над нив. Се бараат виновници од 2012 година наваму, но не и оние кои вечерта можеле да го спречат пожарот. Никој не сака да погледне во вистинските виновници и тоа е трагедија за целиот овој процес“, додава тој.
Нагласува дека СДСМ нема да молчи и тоа не е политичка пресметка, туку должност.
„Ќе ја раскажеме вистината за Кочани, секој ден, секој детал, сè додека не паднат маските и не се појават сите имиња и од полициските командни штабови, и од владиниот врв.
Ова е масовно убиство со државен потпис и за тоа ќе има одговорност“, потенцира Талески.