Македонија
(Видео) Мисајловски: Заев на четири дена пред избори гласа финансиска помош за 159 фирми, ДКСК да отвори постапка
Во моментот Зоран Заев одржува седница на Владата за одобрување средства за поткуп на фирми. Заев спротивно на Изборниот законик, денес, на дневен ред на Владата ставил точка за гласање без расправа – доделување финансиска поддршка на 159 компании на 4 дена пред одржување на локалните избори, изјави Владо Мисајловски, потпретседател на ВМРО-ДПМНЕ.
„Ова е предлог-дневен ред за одржување на денешната владина седница, од него се гледа дека се прави флагрантно кршење на Изборниот законик и институционален поткуп за што следува одговорност.
Зоран Заев и сите членови на Владата денес треба да знаат дека со гласањето на оваа точка на Владата прават кривично дело за кое ќе одговараат. Со ова се крши член 8а од Изборниот законик, чиј ст. 1 и 2 најстрого забрануваат исплаќање буџетски средства во тек на кампања.
Чл. 8-а ст.1 т.3 вели: „Не може да се вршат исплаќања на плати, пензии, социјална помош или други исплати и материјални надоместоци од буџетски средства или од средства на јавните фондови што не се редовни месечни исплати, односно сите едногодишни трансфери и исплати или еднократни трансфери од буџетски средства или од средства на јавни фондови, ниту да се отуѓува државен капитал ниту да се потпишуваат колективни договори“.
Истиот член ст.2 т.1 забранува да се исплаќаат субвенции што не се редовни месечни исплати во периодот од 20 дена пред почнување изборна кампања, па до завршување на изборот“, рече Мисајловски.
ВМРО-ДПМНЕ ја повика ДКСК да реагира и да отвори постапка.
„Ова е очајнички обид на Заев и СДСМ преку поткуп да извршат влијание на волјата на избирачите. Ако СДСМ е сигурен во победата, исплатата може да ја направи една недела по изборите. Доколку, пак, им мислеа добро на фирмите, тоа ќе го направеа многу порано пред изборите.
Многу е важно да знаат и граѓаните и фирмите дека финансиската помош на компаниите и поединците ќе продолжи со ВМРО-ДПМНЕ, но тоа нема да се прави на 4 дена пред гласање, туку континуирано. Владата е слуга на народот и не смее државните средства да се злоупотребуваат за изборни цели.
За ова грубо кршење на законите и поткуп од невидени размери, ќе бидат известени сите меѓународни организации што го следат изборниот процес, како и странски претставници во земјата, а истовремено и ќе поднесеме соодветни пријави до институциите“, порача Мисајловски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Неколку скопски општини денеска без струја
Од ЕВН Македонија известуваат дека за денеска се планирани неколку прекини во снабдувањето со електрична енегија на корисниците од градот Скопје и неговата околина:
· од 06:00 – 10:00 часот, корисниците од ул. Пајак и ул. Наум Наумовски Борче. (Општина Центар)
· од 08:00 – 12:00 часот, дел од корисниците од ул.Пејо Јаворов (општина Кисела Вода)
· од 09:00-11:00 часот корисниците од улиците со бр. 406 и бр, 408 во с. Марино. (Општина Илинден)
· од 09:00-15:00 часот корисниците од улица со бр. 101 во нас. Волково. (Општина Ѓорче Петров)
· од 09:00-15:00 часот корисниците од улиците Индира Ганди, Брсјачка Буна, Овчеполска, Пелагонија, Демирхисарска, Сландол, Хаџи Јован Шишков,Злетовска, Тиквешка и ул.Нов Живот. (Општина Шуто Оризари)
Македонија
Претежно облачно, попладне и кон крајот на денот повремен дожд
Променливо облачно, попладне и во текот на ноќта ќе има повремени локални врнежи од дожд, а на повисоките планини врнежи од дожд и снег. Ќе дува умерен, а долж Повардарието повремено засилен ветер од југоисточен правец.
Минималната температура ќе биде во интервал од 1 до 6, а максималната ќе достигне од 6 до 12 степени.
Во Скопје, претежно облачно, попладне и кон крајот на денот ќе има повремен дожд. Ќе дува слаб до умерен, а во делови од котлината повремено засилен ветер од југоисточен правец.
Минималната температура ќе се спушти до 3, а максималната ќе достигне до 11 степени.
Времето во наредните денови
Продолжува период на променливо облачно време со повремени врнежи од дожд, кои локално ќе бидат пообилни. На повисоките планини врнежите од дожд ќе преминуваат во врнежи од снег. Ќе дува умерен, повремено засилен јужен ветер што ќе услови до недела релативно високи температури. Од недела попладне ќе започне да дува северен ветер и температурите ќе бидат во опаѓање.
Македонија
Магла на неколку патни правци, слаб снег на Попова Шапка
Сообраќајот на државните патишта се одвива во зимски услови, по претежно влажни коловози. Слаби врнежи од снег на Попова Шапка без задржување на коловоз. Намалена видливост поради појава на магла има на планинските премини Плетвар до 100 метри, Стража до 80 метри и кај Крушево до 30 метри, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

