На вчерашната Годишна конференција на УМС на ВМРО-ДПМНЕ на која се обрати претседателот на ВМРО-ДПМНЕ, Христијан Мицкоски истакна дека Македонија е се подалеку од Европската Унија, а тоа е така не само заради блокадата од страна на Бугарија, туку поради власта.

Исто така истакна и дека Зоран Заев е таткото на спорот со Бугарија, а нашиот идентитет наша црвена линија.

„4 години украден живот. 4 години на силна политизираност на судството и недостижност на правдата. Македонија треба веднаш да почне преговори со Европската Унија. Овие луѓе овде, но и тие кои што денеска не се со нас, македонскиот народ, нација и држава заслужуваат веднаш без дополнителни условувања, без дополнителни анекси, стратешки документи или како сакате наречете ги, веднаш следниот понеделник или вторник да добие почеток на претпристапните преговори со ЕУ.“ истакна Мицкоски

Тој додаде дека македонскиот народ тоа го заслужува и дека вредностите кои што овој народ ги споделува се истите како и вредностите на останатите граѓани од земјите членки на ЕУ.

Мицкоски упати порака и кон европските лидери каде што побара ЕУ повеќе да не одолговлекува и што поскоро Македонија да започне со преговори со ЕУ, не заради Зоран Заев и останатите криминалци, туку заради македонскиот народ.

Мицкоски повторно испрати порака, искуството и делата говорат дека на Зоран Заев не може да му се верува околу тајните преговори со Бугарија, но и потврди дека ВМРО-ДПМНЕ и идната недела ќе продолжи со протестите.

„Искуството и делата велат дека на Заев не може да му се верува. За тоа сме на улица, за тоа сме на овие протести и за тоа ќе продолжиме и во понеделник, и во вторник следната недела. За тоа ВМРО-ДПМНЕ ќе биде заедно со народот на улица. Едноставно кога нема како, во услови на медиумски мрак мора да излезе вистината на виделина. За тоа што на Зоран Заев едноставно не може да му се верува“, додаде Мицкоски.

На крај претседателот на ВМРО-ДПМНЕ повтори дека нашите црвени линии се македонски, тоа е идентитетот, посебноста, историјата, јазикот, културата, обичаите и дека не смееме да дозволиме уште едно национално предавство.

Пратеникот на ВМРО-ДПМНЕ и претседател на Комисијата за надворешна политика, Антонијо Милошоски, соопшти дека за среда во 15 часот ќе закаже седница на Комисијата, со цел, министерот за надворешни работи, Бујар Османи, да ги претстави предлог Акцискиот план и предлог-патоказот кој Заев и Бучковски го преговараат со Софија.

Тој најави и дека протестите на ВМРО-ДПМНЕ ќе продолжат во понеделник и вторник пред МНР од 17 до 19 часот.

„На 11 јуни, после неколкудневни протести на опозицијата, министерот за надворешни работи Османи изјави дека е спремен да реферира пред пратениците за контраверзните преговори што двоецот Заев-Бучковски ги води со Бугарија.Да потсетам, пред цели 6 месеци, на 16ти јануари истата оваа влада усвои заклучок дека пред пратениците ќе бидат презентирани информации за предлог Акцискиот план кој го преговараат со Бугарија, но досега наместо отчетност имавме молк, нетранспарентност и чести понижувања на Македонија. Заклучокот е дека во нормални демократии за најбитните национални теми владите сами иницираат дебата со парламентот, додека во хибридните режими како во Македонија, потребни се протести за да натераш владин министер да даде отчет пред пратениците“, истакна Милошоски.

По повод денешниот протест против сечата на дрвјата на улицата Орце Николов, општина Центар тврди дека останува посветена на остварување на заложбите за создавање на еколошка општина која треба да претставува пример за другите општини во државата.

Велат дека во целост го разбираат најавениот протест и го поддржуваат правото на слобода на говор и изразување, но појаснуваат дека осумте дрвја биле исечени по претходно извршени испитувања од надлежните стручни служби, каде е утврдено дека се работи за стари, болни и оштетени дрва.

„Крошните на дрвата чии гранки се кршеа при секое поголемо невреме во градот претставуваа опасност за граѓаните и минувачите. Во повеќе наврати до општината од жителите од околните згради има пристигнати писмени барања за отстранување на дрвата. Оние дрва што се отстранија, ќе се заменат со нови, висококвалитетни садници, а за останатите ќе се бараат дополнителни решенија. Проектот за улицата „Орце Николов“ веќе две години е изложен на увид во Општина Центар, објавен е на општинската веб страна, неколку пати е објавуван и во јавноста и сите засегнати граѓани можат да дојдат во општината и лично или електронски, на следниот линк, да се уверат во содржината на истиот. Извршена е ревизија и проектот за улицата „Орце Николов“ ги има поминато сите фази на контрола при изработката. Крајната наша цел е граѓаните да добијат квалитетна и безбедна реконструирана улица“, наведува општината.

Оттука додаваат дека еден од нивните приоритети и на градоначалникот Саша Богдановиќ е заштитата на животната средина.

„Со носењето на новите 8 ДУП-ови успеавме да сочуваме 13.000 метри квадратни урбано зеленило, паркови и зелени површини и ја воведовме обврската за обезбедување на 20% зеленило во секоја градежна парцела. Политиките за зазеленување на општината се евидентни со сите наши активности и проекти, меѓу кои и замената на старите фасади со нови, еколошки и ефикасни, проектот „Цел Центар на точак“, поставување на енергетски-ефикасни фасади на детските градинки и училишта, Зелената еко зона на Сквер Јадран, но и со секојдневното одржување и обновување на уличното и парковското зеленило во надлежност под општината“, додава општината.