Има мнозинство во парламентот кое очекуваме дополнително да се зголеми, изјави министерот за надворешни работи, Бујар Османи одговарајќи на новинарски прашања на прес-конференција за буџетот.

„Можам да потврдам дека има мнозинство, очекуваме со овие разговори ова мнозинство дополнително да се зголеми и да да биде стабилно за да може во наредните месеци и години да се продолжи со овие сериозни активности на Владата“, изјави Османи.

Министерот не даде конкретен одговор кој е тој 61 пратеник за кој СДСМ вели дека го има како владејачко мнозинство и дали можеби станува збор за пратеник од редовите на Алијанса за Албанците.

За преговорите со Алтернатива, Османи рече дека тие разговори се заеднички помеѓу сите коалициски партнери, меѓутоа, во име на сите нив и со заедничка координација ги води премиерот Зоран Заев.

Министерот во оставка од Движењето Беса, Аријанит Хоџа ја искоментира фотографијата што се појави на социјалните мрежи, а на која тој седи заедно со поранешниот висок функционер на ДУИ, Муса Џафери.

Хоџа напиша дека средбата со Џафери се случила на јавно место без да се крие од никого и без никакво влијание во политичко дејствување. Праша кои се луѓето кои го следат секој негов потег и како безбедносните органи го оправдуваат нарушувањето на неговата приватност.

„Гледам дека почна да се споделува моја фотографија со Муса Џафери, од средба која се случила на јавно место без да се кријам од никого и без да имам никаков товар во моето политичко делување. Како активна личност во политиката остварувам стотици средби со луѓе кои сакаат да разговараат за актуелните политички прашања. Прашањето што се поставува е: кои се луѓето кои го следат секој мој потег и дали ова е мониторинг со институционални инструкции и како безбедносните органи го оправдуваат нарушувањето на приватноста на едно министерство во оставка на актуелната Влада“, напиша Хоџа.

Сопственикот на автопревозникот „Беса Транс“, Беким Хаџиу, преку социјалната мрежа „Фејзбук“ се огласи во врска со автобуската несреќа во која загинаа 45 македонски патници, а 7 успеаа да преживеат.

,,Алах да им даде рај на починатите, а на повредените што поскоро опоравување. Овие зборови ги кажувам со жалење и со повредено срце. Тие беа исто така наше семејство, бидејќи секогаш кога патувавме и патниците ги сметавме за фамилија. Четири дена бевме заедно во Истанбул и забележав дека повеќето и порано доаѓале со нас на тури со нашите автобуси за Истанбул. Овие тестови се од Алах и верувам дека се прифатени од секој верник, неговата волја не може да биде променета ни за минута и бараме од Алах никого да не тестира”, напиша Хаџиу на Фејсбук.