Во врска со изјавата на Бојан Јовановски, кој денеска беше осуден на девет години затвор во случајот „Рекет“, а кој по изречената пресуда изјави дека парите треба да се бараат кај лидерот на СДСМ, Зоран Заев, и неговиот брат Вице, генералниот секретар на СДСМ, Љупчо Николовски, рече дека денешните пресуди потврдуваат дека правда и одговорност ќе има за секој во државата кој ќе се огреши.

„Слушнавме со кого Мицковски седел, разговарал во претходните месеци и години и поврзаноста на ВМРО-ДПМНЕ со целокупниот случај. Да не мисли дека некој ќе го спаси од одговорност. Добро е што дојде време и сме среќни  што денеска имаме пресуди за вакви крупни случаи што се отворија во државата. Тоа потврдува дека правда и одговорност ќе има за секој во државата кој ќе се огреши.

Очекувам од сега натаму целосна разрешница на сите случаи, над триесет, во коишто е вклучено и целото актуелно раководство на ВМРО-ДПМНЕ, на многу структури. Да расчистиме еднаш со остатоците од режимот, да има одговорност и за ‘Талир’ и за ‘Империја’ и за кој било случај за којшто се зборува во јавноста и имаше постапки. Законот за Јавно обвинителство, којшто стапува на сила, тоа силно го овозможува. Поради тој закон  денеска добивме силна потврда и поддршка од Европската Унија.

Поради тие процеси, во државата следат одлични години, доаѓа еден убав период во којшто ќе ги трансформираме институциите и ќе одиме напред, а и ќе преговараме со Европската Унија. Тоа беше сон на многу генерации и  среќен сум, како дел од генерацијата млади политичари, што денеска  направивме крупни чекори и што ќе има одговорност и правда за сите. Тоа го потврдуваат пресудите што денес ги слушнавме“, истакна Николовски.