Македонија
(Видео) Николоски: Не добивме кредибилен демант од власта дека граѓаните во Македонија не се следат

Денес, се одржа комисија за надзор на работата на Агенцијата за национална безбедност и Агенцијата за разузнавање со една исклучително интересна тема. Имено, комисијата побара извештаи од страна на 4 институции, тоа се Министерството за внатрешни работи, Агенцијата за национална безбедност, Агенцијата за разузнавање и военото разузнавање, во однос на тоа дали во Македонија нелегално се следат комуникации, од една страна, дали се произведува софтвер со кој може да се следат нелегално комуникации, и од друга, истакна Александар Николоск,и потпретседател на ВМРО-ДПМНЕ.
„Во однос на користењето на таканаречениот малициозен софтвер, имено, прислушувањето веќе во Европа добива други димензии, а тоа е, покрај следењето на гласовната комуникација, односно телефонските повици и СМС-пораките, веќе има масовно следење приватни фотографии, приватни видеа, средби што ги прават граѓаните помеѓу себе, кои може да бидат документирани, односно снимени, како и влегување во домот, односно сите или повеќето од нас користиме паметни телевизори, кои најчесто се поврзани на кабелски оператор и на тој начин телевизорите се користат како начин да се снимаат разговорите дома, аудио, а оние што имаат можност и видео и практично да се влезе во домот на секој граѓанин, што ќе се согласите е застрашувачки, како и да се прави профилирање на граѓаните преку локациите на кои присуствувал, што исто така може да се следи со овие малициозни софтвери, веб-страниците што ги отворал, луѓето со кои што комуницирал и на тој начин да се прави цел профил“, појаснува Николоски.
Не добивме, вели тој, кредибилен демант дека во Македонија не се прави вакво следење.
„И ова е максимум што можам да кажам имајќи предвид дека е државна тајна. Значи, да повторам, не добивме кредибилен демант дека во Македонија не се случува следење на граѓаните со таканаречен малициозен софтвер, односно напредни софтвери, кои буквално влегуваат во домот.
Она што исто така можам да го кажам е дека кај нас како најголема политичка партија во Македонија постои сериозно сомневање дека сме под континуирано физичко следење како опозициски политичари, што, најверојатно, се прави нелегално од страна на одредени структури што се во безбедносниот сектор во државата.
Тоа што исто така можам да го кажам, а што дел ѝ е познато и на јавноста, е дека во Македонија се произведувал ваков малициозен софтвер. Една компанија, тоа е компанијата „Сајтрокс“, веќе е и на црната листа на САД баш поради оваа работа“, потенцира Николоски.
За него, како што констатира, многу позначајно е тоа дали се произведувал ваков софтвер, дали се користел тој софтвер, затоа што, како што вели, тоа отвора многу сомнежи за слободата на движење на граѓаните, за приватноста на домот.
„Значи, овие софтвери може да влезат многу подлабоко од она што досега беше класично прислушување, односно следење комуникации преку гласовна комуникација и преку СМС-пораки.
Исто така, би сакал да ве информирам дека на редовната есенска сесија на Парламентарното собрание на Советот на Европа, што трае една недела и ќе се одржи во текот на втората недела на октомври, една од главните точки ќе биде злоупотребата на системите за следење ‘Пегасус’ и ‘Предатор’, кои се врв на овој таканаречен малициозен софтвер. Јас ќе учествувам на таа сесија и во таа дебата, како што веќе учествував на сослушувањето што беше во Париз за злоупотребата на ‘Пегасус’ и ‘Предатор’, каде што новинари и политичари од три земји, Шпанија, Полска и Грција, сведочеа за своите лоши искуства со овој начин на следење. Значи, темата е голема, огромна, Македонија ја афектира на два начина. Првиот начин е, за жал, преку производство на ваков софтвер, кој потоа е користен за што денес институциите немаат дадено одговор каде сè е продаден и во која сè држава е користен. И вториот е следењето на комуникациите дома затоа што ,како што кажав, не добивме кредибилен демант дека тоа не се прави и во Македонија“, додаде Николоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бектеши објави кои маркети се затворени оти не ги намалиле цените

Министерот за економија Крешник Бектеши рече дека во скопскиот регион се затворени маркети на „Веро“ и „Вива фреш“ поради непочитување на владините мерки за намалување на цените на прехранбените производи.
„Не верувам дека не се објавени ланците на супермаркети кои го прекршиле законот. Им дадовме одреден рок да се усогласат мерките. Во скопскиот регион се „Веро“ и „Вива Фреш“. Осум до десет ланци супермаркети имаат маркети во секој град. И вие медиумите треба да ги објавите маркетите кои го прекршиле ова, но сигурно ургираат кај вас затоа што се рекламираат. Јас немам проблем да ги кажам. Граѓаните да бидат спокојни, овие мерки ќе бидат спроведени во целост“ рече Бектеши. по посетата на компанијата „Алма-М“.
Во саботата, според директорот на Државниот пазарен инспекторат Горан Трајковски, биле извршени над 50 контроли при што затворени се пет големи ланци на маркети по основ на Законот за потрошувачи, односно по основ на нечесни трговски пратки, а седум маркети се казнети поради непочитување на владината одлука.
Македонија
Вицепремиерката Грковска во работна посета на Словенија

Заменичката на претседателот на Владата на Република Северна Македонија задолжена за политики за добро владеење, Славица Грковска, од денеска до 27 септември 2023 година ќе биде во работна посета на Република Словенија.
Во рамки на оваа посета таа ќе оствари средби со словенечката министерка за дигитална трансформација, Емилија Стојменова Дух, со министерката за правда на Република Словенија, Доминика Шварц Пипан, како и со потпретседателката на Судскиот совет д-р Уршка Кежмах.
Исто така, вицепремиерката Грковска вечерва ќе присуствува на приемот организиран од Амбасадата на Република Северна Македонија во Словенија по повод 30 годишнината од воспоставувањето дипломатски односи меѓу двете земји и отворањето на амбасадата во Љубљана, која беше првото дипломатско претставништво отворено по прогласувањето на независноста на нашата држава.
Македонија
Петровска до командантот на Националната гарда на Вермонт: Македонија е ваш сојузник на кој можете да се потпрете

Министерката за одбрана Славјанка Петровска во Министерството го пречека командантот на Националната гарда на Вермонт, генерал-мајор Грегори Најт со кого разговараше за три-децениското партнерство помеѓу Армијата и Националната гарда и начините за нејзино уште поголемо интензивирање во иднина.
На прес-конференцијата со генералот Најт, министерката истакна дека Северна Македонија е сојузник на кој Вермонт може да се потпре и дека преку партнерството и двете вооружени сили станаа еден тим способен да одговори на сите предизвици.
„Нема посилен и појасен приказ за нашето заедништво од тоа што го покажаа нашите припадници во наменските сили Феникс во Авганистан во 2010 година, кога функционираа како едно, една Армија. Нема поголем доказ за нашата блискост од континуираните вежби и обуки од кои придобивка имаат и Армијата и Националната гарда на Вермонт. Нема поголем израз на волја за да продолжиме на овој пат кон уште поголема интероперабилност, од нашите постојани контакти и средби на највисоко ниво од кои произлегуваат одлични идеи кои ги реализираме во целост“ рече Петровска.
Министерката Петровска се осврна и на големиот број заеднички вежби чиј интензитет ќе се зголеми во иднина.
„Зад нас се неколку големи вежби кои беа навистина успешни, а веќе сме во фаза на планирање на следните заеднички вежби, кои ќе бидат уште поголеми и позначајни за нашиот заеднички развој. Северна Македонија е подготвена со задоволство позитивно да одговори на интересот за заеднички активности со партнерските земји на Вермонт, Австрија и Сенегал, со што нашето пријателство ќе се прошири и продлабочи“, подвлече министерката.